1 Ana Jekop yobama bogl konbauna ede eigo, Jekop kan eglke iro ede Iso ya yagl 400 ikra wigwa kanugwa. Ye kandre, gagiglma mano Lea ya Resel ya nigl kogon abu suo meglmara akie akie ede enaiglmedi dedugwa. 2 Ye nigl kogonmo abu suo gagroma bogl ede okna enaiglmedi dedidre, Lea gagiglma bogl okuo enaiglmedi dedidre, Resel ya Josep okuo kaima enabredi dedugwa. 3 Yegl dedidre, yene ede okna pi agigle Iso umara ogwa. Ye pi moglsre, bage bage goglko bodugl, bre magide togwa. Ege 7-pela taim yegl ersre, ede pi agigle umara magigl ogwa. 4 Ede magigl ogo, Iso ye tegigl yenabugledi muku di ede pi Jekop umara pidre, ye nugo kugro, pauna si nogo, ye kai eribrika.

5 Ana Jekop ya Iso kai eribriko, Iso kan iro ede, abu 4-pela i gagroma bogl meglkwa kanugwa. Ye kandre, Jekop di pre, Yoba ene akie wigwa i, ira meglme? dugwa. Dugo, Jekop di ikne ede, God na aragan ere narumara gak wagle i, na ene nigl kogonen yoba moglka i, narumiwe di, yegl dugwa. 6 Yegl dugo, nigl kogon abu suo gagroma bogl magigl udre, goglkono bodugl, bitno magide teigwa. 7 Yegl eriko, Lea ama gagiglma bogl magigl udre, goglkono bodugl, bitno magide teigwa. Ye yegl eriko, Resel ya Josep mokonomugl udre, ye ama goglkono bodugl, bitno magide tebrika.

8 Abu gagroma bogl mudu u goglkono bodugl, bitno magide teigo, Iso ere mogl, yegl dugwa, Na konbo bage u kaniga, yoba ene aglnen buglanen mere kide mage i ede okna eigo, kaniga. Ene mabuno siragl pre dedinga eime? dugwa. Dugo, Jekop di ikne ede, yegl dugwa, Yagl kade yo, ene na wakai kanatnga pre na aglna buglana i ene teiwe dugwa. 9 Jekop yegl dugwa ba Iso aglke kor dugwa, Agra yo, na agl bugla pra kuglka. Aglnen buglanen enene kuratniwe dugwa. 10 Dugo, Jekop di ikne ede, Mane dugwa. Ene na wakai kan, na aglna buglana ene teiga i, inatniwa. Na ene motnara wigo, ene ka wakai di natnga pre na ene guman dran erme kaniga i, God guma dra kan, gun yenaglmere mere yegl ene guman dran kan, gun yeiga 11 Te, God na ere wakai ere naruko, taragl mere kuglka pre na taragl tau ene teiga i, inatniwe dugwa. Ana Jekop ka giglede dugwa pre Iso taragl ikra pra yugwa.

12 Ana Iso ere mogl, Nono akie ede omno! dugwa. Na ede okna ebo, ene na mokonamugl wio! di, yegl dugwa. 13 Yegl dugwa ba Jekop di ikne ede, yegl dugwa, Yagl kade yo, na gagra kebra yobuglno kogl paikrukwa ya aglna buglana tau gagro am te meglkwa, na pre yubun deiga i, ene ama pre kan etnga. Na ege swara ta tabre ede enaiglmedi magibo, aglna buglana goraiglkwa pamiwa. 14 Yegl pre yagl kade yo, ene yobanma bogl ede okna pio. No okuo kie kiede unamga. Na aglna buglana mage i wiga i ya gak kebra wigwa i akie konbauna ta unaiglmere yegl mere u, ene dumo makan Seir kipai motnara unamniwe dugwa.

15 Jekop yegl dugo, Iso ere mogl, yegl dugwa, Ana na yobanama tau dedibo, ene agre i ede unaiglmiwe dugwa. Yegl dugwa ba Jekop di ikne ede, yegl dugwa, Yagl kade yo, ene na wakai kan, i swara wakai kaima praglka ba ene yobanma no agre i ede unaiglkwa i, ye kogonono ta paikrumiwe dugwa.

16 Jekop yegl dugwa pre Iso ade swara i mina ede ikne Seir kipamara enagledi ede ogwa. 17 Ede ogo, Jekop ede dumo ta Sukot we dimara pidre, yugu ta kipaugwa. Yugu ta kipadre, ye aglmo buglamo yugu teka si edugwa. Yegl pre yoba ere mogl, dumo i Sukot* we digwa.

18 Ana Jekop ye dumo Mesopotemia ikra kide kodidre, ede ogwa igne i ye dumo Sukot i, pi kipadre, okuo dumo i kide kodidre, wakai wan ede pi dumo ta Sekem we dimara, dumo Kenan suna yogwa i pidre, taun bina sel yugu kipaugwa. 19 Ye kipadre, sel yugu kipamara makan i topo sugwa. Ye yagl ta kagie Hamor we digwa wama mige silva 100 tedre, makan i yugwa. Hamor wama i, swara ta kagie Sekem we digwa. 20 Jekop makan topo sidre, dumo igle kobuglo bogl ta kuglkwa. Kuglsre, ye kobuglo bogl i kagie God ye Israel Godno Moglkwa, kagie yegl yogwa.