1 Ana dumo Kenan suna i, kidan podo yei pai moglkwa. 2 Yei pai moglkwa pre Jekop wama kugl mogo dumo Isip topo sidre, yuigwa i, ye yobama bogl ne kodigwa. Ne kodigo, ye neno di te, Ene ede ikne pi, kugl mogo tau nono nenamga topo sio! dugwa. 3 Yegl dugwa ba Juda di ikne ede, yegl dugwa, Yagl ikra ka kaima no di noro, Ene agro okuo ta agre yukribi, ene na gumana ta kankraiglmiwe dugwa. 4 Yegl pre ene no agro okuo bogl akie enaiglmedi dedin, no pra, kugl mogo topo sinamnedi enamga. 5 Ba ene ta dedikitn, ta pikramga. Yagl ikra no di noro, Agro okuo ene bogl akie ukribi, ene na gumana ta kankraiglmiwe dugwa ikra pre pikramniwe di, Juda yegl dugwa.

6 Juda ka yegl dugo, ye nem di ikne ede, yegl dugwa, Ene ere mogl, yagl ikra di te, Agro okuo ta ama moglme digwa i, na mabuno kide ere narimiwe dugwa. Ene siragl pre dime? di, yegl dugwa. 7 Yegl dugo, ye di ikne ede, yegl digwa, Ye ere mogl, Agro okuo agre yuio! dugwa i, ye yegl dinabedi prikrumga. Yene no di pre, Ene neno kor moglmo? didre, Agro ta ama moglmo? dugwa. Ye dugo, no yoko ka tau di prukwa i di ikne edumniwe di, yegl digwa.

8 Ye yegl di kodigo, Juda ama ere mogl, ye nem Israel yegl di togwa, Na ene wan Benjamin sugl morabedi dedin, no ede enamga. Ta manan, no ene bogl ya gak kebra kunga i bogl mudu goramga. 9 Wan Benjamin dedin, na ka kaima ye sugl moraglka. Aglau ta panan, nana mabuno moraglka. Te, na ye i ede ikne u ene motnara ta edekribo, na aimadi kamin mabuno moraglka. 10 No ta ene pra we dinatnedi sugl kan moglrumna, no ege suo ede Isip pidre, ede ikne u kodumgo we di, Juda yegl dugwa.

11 Ana Juda ya ye agiglema neno Israel ere mogl, ye yegl di togwa, Konbauna pere ta yekran, ene yegl erio, taragl wakai kaima magigl i paigwa tau yagl i tenamnedi bek mina gre i ede enaiglmiwa. Ede nuglo tau demene wakai erukwa ya brume nuglo ya te, ede pistasio mogomo ya ede amon mogomo idre, ede enaiglkwa pre diga. 12 Te, mige silva we, Isip yoba ene te ikne edinamnedi primo mo prikrimo mo i ta kiurumga pre ene mige i, i pi tedre, mige tau kugl mogo kor topo sinamnedi i pidre, yegl eraiglmiwa. 13 Te, ene agro okuo ama idre, ede pi yagl i moglmara enaiglmiwa. 14 Ene ede ebi, God Yobuglo Podo Paugwa ye yagl i ene mitno gorabedi ere edenan, ye ene mitno goglsre, agro komono Simeon ya agro okuo Benjamin ene bogl akie ede ikne unaiglkwa pre pra we dinabiwa. Te, ye ta giur, na ye mitno goraglka mere yegl ta panan, yegl panabiwe di, yegl dugwa.

15 Ana ye neno Israel ka yegl dugwa pre Josep agiglema taragl wakai tau ye tenamnedi idre, mige tau okna teigwa i ya mige tau kugl mogo aglke kor topo sinaiglkwa pre idre, agro okuo Benjamin ama idre, ede dumo Isip eigo, Josep agiglema mudu ye moglmara pidre, adigl meglkwa. 16 Josep moglmara adigl meglko, Benjamin ye ama moglko, Josep kanugwa. Kandre, ye nigl kogonmo yagl ta ye yugumo sugl moglkwa i di te, yegl dugwa, Yagl magigl meglkwa i, ene ye i pi na yuguna yugugl edidre, agl bugla ta si keo! No belo igne kaya mokna akie nenamniwe di, yegl dugwa. 17 Josep yegl dugo, ye nigl kogonmo yagl i ye dumere ere, Josep agiglema agre i ede pi Josep yugumo yugugl edenagledi ogwa.

18 Ana Josep nigl kogonmo yagl i ye Josep agiglema agre i ede pi Josep yugumo yugugl edenagledi ogo, ye kudugl goglsre, ka di ikne ikne ede, yegl digwa, Nono okna umga igne, migeno noro ikne ede, bek mina atne edigwa ikra pre nono yugugl edenabuka pamiwa. Ye mige i Ene kunogl nemiwe didre, nono nigl kogon yoba moraiglmedi no si kane sidre, donkinono ama inabuka mere pamiwe di, yegl digwa. 19 Yegl didre, ye ede Josep yugumo pi yugugl enamnedi erikwa igne, Josep nigl kogonmo yagl ikra dua wagle adigl moglko, Josep agiglema ye moglmara magigl pidre, 20 yegl digwa, Yagl kade yo, no okna ege swara ta ede dumo Isip magigl i kugl mogo topo sinamnedi umga. 21 No u, kugl mogo topo sidre, ede ikne omga igne, no bage ta eduer ugl panamnedi ersre, bekno yaurumga, no swara swarade mige tomga i, mudu yagl swara swarade bekno mina atne paugo, kanumga. Yegl pre no mige i, idre, ede ikne umga. 22 Te, no mige pere ama kugl mogo aglke kor topo sinamnedi idre, umga. Ira no migeno gre ikne bek mina atne edugwa i, no ta kankrumniwe di, yegl digwa.

23 Josep agiglema ka yegl digo, Josep nigl kogonmo yagl ta ye yugumo sugl moglkwa i di ikne ede, yegl dugwa, Ene nomane sikre, kudugl goglkrio! Ene Godno, ene neno Godmo ama moglkwa i, mige ikra ene tenagledi bekno mina atne edugwa pai dumiwa. Ene mige tau kugl mogo topo sinamnedi teigwa i, na i kodiwe di, yegl dugwa. Yegl didre, ye ede Simeon kane yugu moglmara pi, i meda edidre, agre i ede u Josep agiglema meglmara edugwa. 24 Edidre, ye Josep agiglema mudu agre i ede pi Josep yugumo yugugl edidre, ye kaglno nigl koraiglmedi nigl kogl togo, kaglno nigl keglkwa. Nigl keglko, Josep nigl kogonmo yagl i ama kugl tau i pi donkino nenaiglmedi togwa. 25 Te, Josep agiglema we, Josep, Belo igne kaya mokna akie nenamne dume digo, prikwa pre ye taragl tau ye tenamnedi yuigwa ikra i meda ede, ye tenamnedi ere wakai ere yeigwa.

26 Ana okuo Josep ede yugumo yugugl ugo, ye agiglema taragl tau ye tenamnedi yugugl yeigwa ikra tedre, goglkono bodugl, gumano drano makan mina edigwa. 27 Yegl eriko, Josep ere mogl, Ene wakai meglmo? didre, te, Ene neno kidagl pre digwa ikra we, pra moglmo? di, yegl di prukwa. 28 Yegl di pruko, ye Owo digwa. No neno kidagl, ene nigl kogonen yoba mere yegl moglkwa i, wakai moglmiwe di, yegl didre, ye Josep pre i mitna edinamnedi goglkono aglke kor bodugl, gumano drano makan mina edigwa.

29 Ana Josep agiglema yegl eriko, Josep ere mogl, ye agigle okuo Benjamin, mano swara moglkwa i kandre, ye agiglema di prukwa, Ene agro okuo kaima ta moglme digwa ikra we, magigl i moglmo? di, yegl di prukwa. Yegl di pruko, ye Owo digo, Josep ere mogl, Benjamin yegl di togwa, Wana yo, God ene ere wakai ere tenabiwe di, yegl dugwa. 30 Yegl didre, ye agigle okuo muduo prisre, kai nugu sugwa. Kai nugu sugwa pre ye tabre agiglema meglmara kide kodidre, dumo ta mogl, kai eragledi dokidre, ede kiule pamara pi, kai erukwa. 31 Ye kai ere kodidre, guma dra nigl koglsre, ede ikne agiglema meglmara ugwa. Ye ede ikne udre, aglke kor kai erabuka pai dugo, ye Na muduna prika i kan dinaiglme di kai erekre, ye nigl kogonmo yoba di te, Kaya mokna yu norio! dugwa. 32 Yegl dugo, ye nigl kogonmo yoba kaya mokna yu, yubu si teigwa. Ye yubu si teigwa i, kaya mokna tau Josep yene pere mogl nenabedi tedre, tau Josep agiglema pere mogl nenaiglmedi tedre, Isip yoba tau ege ege Josep yugumo mogl, kaya mokna neigwa i pere mogl nenaiglmedi tau tedre, erikwa. Isip yoba ye Hibru yoba bogl akie mogl, kaya mokna nenaiglkwa i, kide kaima prikwa pre erikwa. 33 Ana Josep nigl kogonmo yoba ye kaya mokna yubu si tenamnedi erikwa igne, Josep agiglema ye Josep gumamugl swara swarade aglo mere ame dinaiglkwa i ama obuno di teigwa. Ye obuno di teigwa i, Josep agiglema bugla yugu nemere obuno di teigwa. Ye agigle komono kaima moglkwa i, komono kana ame dinabedi obuno di tedre, ede pi ye agigle okuo kaima moglkwa i, okuo kaima ame dinabedi obuno di teigwa. Yegl eriko, Josep agiglema ye nagino koglsre, kan ikne ikne edigwa. 34 Josep nigl kogonmo yoba ye agiglema aglo mere ame dinaiglkwa i obuno di te kodidre, ye kaya mokna Josep tebolmo wagle idre, agiglema swara swarade nenaiglmedi yubu si teigwa. Ye yubu si teigwa i, Josep agiglema mudu ye yoba swara nenabere mere yegl yubu si teigwa ba ye agigle okuo Benjamin we, yoba 5-pela nenaiglmere mere yegl yubu si teigwa. Yubu si teigo, Josep agiglema ye Josep bogl kaya mokna mere nedre, wain nuglo mere nedre, erikwa.