1 Ana Josep nem kidagl goglko, Josep ye nugo kugro, pauna si nedre, kai ere togwa. 2 Yegl ersre, ye ere mogl, nem kidagl ogo nagie bugl dinabedi ye doktamo tau marasin ya ki ogo nagie mina akenaiglmedi dedugwa. Dedugo, ye dumere yegl erikwa. 3 Yoba geglko, ogono nagino bugl dinaiglmedi marasin akigwa i, ege ege 40-pela de mere yegl ere meglkwa pre Josep dokta dedugo, ye ama ege 40-pela de ere meglkwa. Dokta yegl ere meglko, Isip yoba ege 70-pela de kai ere teigwa. 4 Kai ere tedre, gaba buko digo, Josep ere mogl, Isip king yobamo kade tau di te, yegl dugwa, Ene we, ene na wakai kanibi, na ka ta ene di tenarika i, ene i pi king di teo! 5 Na nina kidagl kor moglkwa igne, ye yegl di narukwa, Na we, na kuri ta mogl, goraglka. Na goglbo, ene na i pi dumo Kenan suna kobuglo mur ta nana wakai ere perika i yomara yenatniwa. I pre na ka giglede di nare padiglo! di, nina kidagl yegl dugo, na ye dumere ka giglede di te padiglka. Yegl pre king ta pra we dinan, na nina kidagl goglkwa i pi dumo i kobuglo mur atne yedre, ede ikne unaluwe di, Josep yegl dugwa. 6 Josep yegl dugo, king yobamo kade i, ede pi king di teigo, king ye Josep di te, Ene nen kidagl ka giglede di nare padratne dumere yegl ere, nen kidagl goglkwa i, i pi kobuglo mur atne yeo! di, king yegl dugwa.

7 Ana king yegl dugwa pre Josep ye nem kidagl goglkwa i, i pi kobuglo mur atne yenagledi ede ogwa. Te, Isip king yobamo kade ama akie eigwa. Ye yobamo kade tau king nomane teigwa yeigo, tau dumo Isip sugl meglkwa i yeigo, mudu Josep bogl akie eigwa. 8 Te, Josep agiglema ya yobama ya ye nem kidagl nem agiglema ama Josep bogl akie eigwa. Ye mudu eigwa ba ye gagro kebra ya kau ya meme ya sipsip kiglkwa i ta i pikre, dumo Gosen kanige erikwa. 9 Te, Isip soldia karis mina wanigwa i ya hos au sidre wanigwa i ama tau akie eigwa. Yoba mere kide kaima Josep bogl akie eigwa.

10 Yoba i mudu ede pi dumo ta Atat we dimara eigo, Josep ye di te, yegl dugwa, Na nina kidagl goglkwa pre nono dumo magigl i ege 7-pela de kai ere tenamne dugo, ye mirie goglsre, ege 7-pela de kai podo ere meglkwa. Dumo Atat i, nigl Jordan umara magigl yedre, yoba kugl mogo ugla peglmara dumo yogwa. 11 Ana yoba Josep bogl akie eigwa i kai ere meglko, Kenan yoba magigl kipaigwa i kandre, yegl digwa, Yoba ta goglkwa pre Isip yoba i, mirie podo goglsre, kai erime digwa. Yegl pre ye dumo nigl Jordan umara magigl yogwa i kagie kor yei, Abel Misraim* we digwa.

12 Ana Jekop kor moglkwa igne, ye wama di tomere mere erikwa. 13 Ye ogo nagie boglo ere ede pi dumo Kenan suna pidre, kobuglo mur ta dumo Makpela we digwa yomara atne yeigwa. Kobuglo mur i Abraham okna ye giglmo pene yenabedi Hit yoba ta Efron we digwa mige tedre, makan magigl i yogwa ya kobuglo mur akie topo sugwa. Makan i, dumo Mamre we dimara magigl yogwa. 14 Ana Josep ya ye agiglema ya yoba mudu ye bogl akie ye nem kidagl goglkwa i pi kobuglo mur yenamnedi eigwa i, ye i pi kobuglo mur atne yedre, aglke ede ikne Isip eigwa.

15 Ana Josep agiglema we, ye neno kidagl goglkwa pre ye kudugl goglsre, yegl digwa, Nono okna mabuno kide kaima ta Josep ere tomga. Ana erme we, Josep dem ta kubro pai moran, nono mabuno kide ere tomnara ere noro ikne edenabiwe di, yegl digwa. 16 Yegl didre, ye ka ta Josep prabedi dede, yegl digwa, Josep yo, no neno kidagl goragledi erukwa igne, ye yegl di norukwa, 17 Na ka ta dinarika i, ene i pi Josep di tenaiglmiwa. Na yegl diga, Josep yo, ene agiglnma we, ye tadaglme ersre, mabuno kide ene ere teigwa. Yegl erikwa ba na ene di prika i, ye tadaglmeno gugl edinatnedi priwe di, neno kidagl yegl dugwa. Ana erme we, no neno Godmo nigl kogonmo yoba munga i, ene no tadaglmeno gugl edinatnedi prumniwe di, yegl digwa. Yegl digo, yoba ta kano i pi Josep di togo, ye prisre, kai erukwa.

18 Ana okuo Josep agiglema ede u ye moglmara udre, goglkono bodugl, bitno magide, gumano drano makan mina edidre, ye di te, No ene nigl kogonen yoba muniwe digwa. 19 Yegl digwa ba Josep di ikne ede, yegl dugwa, Ene kudugl goglkrio! Na God moglkrika pre na ene mabuno kide erimara ere ikne ede tekraglka. 20 Ene na mabuno kide ere naramnedi prikwa ba God ye taragl wakai ta plau dinabedi kanige erukwa. Taragl wakai ta plau dinabedi prukwa i, nono erme kamga. Yoba mere kide goglkre, kor meglkwa. 21 Yegl pre ene kudugl goglkrio! Na ene ya ene gagroma sugl moraluwe di, yegl dugwa. Ye ka wakai yegl di togo, deno muduno aragan erukwa.

22 Ana Josep ya ye nem kidagl nem agiglema mudu dumo Isip kipai mogl pai meglkwa. Pai meglko, Josep bugla yugu 110 nogwa. 23 Ye wam Efraim gak tau kuglkwa i, Josep kanugo, Efraim gagiglma i ama kade mogl, abu i, gak kiglko, ye kor mogl, kanugwa. Te, Josep wam Manase we, ye yagl gak ta kuglkwa, kagie Makir we dugwa. Makir yake kade moglkwa igne, ye ama ere mogl, yagl gak tau kuglkwa. Ye yagl gak tau kuglkwa i, yoba i pi Josep teigo, ye bikie wagle padigl, kugro moglkwa. 24 Josep ye bugla yugu mere kide nedre, ye ere mogl, agiglema yegl di togwa, Na we, na gorarika. Na gorarika ba God ye ene sugl moglsre, okuo ye ene dumo Isip magigl i moglkraiglmedi agre i ede pi dumo Kenan edenabuka. Dumo Kenan i, ye Abraham ya Aisak ya Jekop ka kaima di te, Ene ya ene gawanoma tenaluwe dumiwe di, Josep yegl dugwa. 25 Ye yegl didre, ya ama ere mogl, ye agiglema yegl di togwa, God ene ka kaima sugl morabuka. Te, ene Israel yoba dumo magigl i kide kodidre, ede dumo Kenan ebi, ene na yobuglna ama i pi dumo Kenan maugl sinaiglmiwa. I pre ka kaima di nare padilo! di, yegl dugo, ye ka giglede di te padiglkwa. 26 Ana Josep bugla yugu 110 ikra nedre, goglkwa. Goglko, yoba ye ogo nagie bugl dinabedi marasin ya ki akidre, ogo nagie kofin boks wagle atne edidre, dumo Isip suna i yeigwa.