1 Ana Abram bugla yugu 99 ne kodugwa igne, Yawe ye moglmara plau didre, ka yegl di togwa, Na God Yobuglna Podo Paugwa moliwa. Na kana duglo boglsre, mabuno na wakai kaniga i ero! dugwa. 2 Ana na we, na ka kaima okna di te padiglmere ikra eraglka. Na ene gawanma mere kide moraiglme dimere ikra ere edenagle di, yegl dugwa.

3 God yegl dugo, Abram yage kobragai padre, guma dra i pi makan mina paduglkwa. Yegl eruko, God ye ka di te, yegl dugwa, 4 Na we, na ka kaima ta ene di te padiliwa. Ene gawanma ede bage bage pi, yugobuno pere pere mere kide moraiglkwa. 5 Te, ene kagn we, yoba Abram we digwa ba kagn i kide kodidre, kagn Abraham* we dinaiglkwa. Na ene gawanma mere kide moglsre, yugobuno pere pere moraiglmedi ere edenaglka pre kagn kor Abraham we dinaiglkwa. 6 Na ene gawanma mere kide moraiglmedi ere edibo, ye yugobuno pere pere moraiglkwa. Meglbi, ene gawanma tau ama yoba kade king moraiglkwa. 7 Na ka kaima di te padiglka i, ene pre panan, ene gawanma okuo moraiglkwa pre ama aimadi panabuka. Na ene Godnen moglsre, ene gawanma okuo moraiglkwa ama Godno moraglka. 8 Na ene gawanma Godno moglbo, na ama dumo Kenan magigl i etne suna wan motnga i, ene ya ene gawanma mudu tenaglka. Erme makan i, yoba pere makano yogwa ba mudu ene gawanma bogl makanono aimadi yenabuka pre tenagle di, yegl dugwa.

9 Te, God ere mogl, ka ta ama Abraham di togwa, Na ka ta ama di te padiglbo, ene ka i duglo boratnga. Ene duglo bogln, ene gawanma okuo aimadi duglo boraiglkwa paugwa. 10 Na kana ene ya ene gawanma okuo moraiglkwa duglo boraiglkwa i, yegl diga, ene yagl mudu gagno puduo gagie boraiglkwa. Yagl gak kebra ya te, yagl kade ya te, yagl kidagl pra, mudu gagno puduo gagie boraiglkwa. 11 Ene gagno puduo gagie beglbi, ene praiglkwa, God ka kaima di noro paduglkwa ikra nono pre pamedi praiglkwa. 12,13 Yagl gak mudu ene gawanma okuo kuraiglkwa i, ade 8-pela meglbi, ene gagno puduo gagie boraiglkwa. Ene gawanma pre ya te, ene nigl kogono yoba tau yagl gak kuraiglkwa ya te, yoba yugobuno pere nigl kogono yoba topo boramnedi yuibi, ene topo sinaiglkwa i, pra akie pre diga. Ene yegl eribi, ene gagno wagle kandre, yegl praiglkwa, God ka kaima di noro paduglkwa i, nono pre aimadi panabedi praiglkwa. 14 Ba yagl ta moran, gagie puduo gagie ta boglkran, yagl i na ka di te padiglka i, duglo boglkrukwa pre ye ene meglmara si pi eglke edibi, ye pere morabiwe di, yegl dugwa.

15 Te, God ama ere mogl, ka yegl dugwa, Ana ene ebin kidagl Sarai we, ene erme kagie Sarai i kide kodidre, kagie Sara we dinatnga. 16 Na ye ere wakai ere tebo, ye ene wan kurabuka. Te, na ye ere wakai ere tebo, ye gawama ede bage bage pi, yugobuno pere pere moraiglkwa. Yugobuno pere pere meglbi, ye gawama tau yoba king moraiglmiwe dugwa. 17 God yegl dugo, Abraham aglke kor yage kobragai padre, guma dra i pi makan mina paduglkwa. Yegl erukwa ba ye gaugl sim ersre, yegl kina gudu prukwa, Na bugla yugu 100 nenaglka igne na ka kaima gak ta kuraglo? Te, Sara bugla yugu 90 ne kodugwa. Ye ama ka kaima gak ta kurabo mo, yegl kina gudu prukwa. 18 Abraham yegl kina gudu prisre, ye ere mogl, God yegl di prukwa, Ene na wana Ismael sugl moglsre, ere wakai ere tenatnba, yegl dugwa. 19 Yegl dugo, God di ikne ede, yegl dugwa, Ene kaima dinga ba ene ebin kidagl Sara ene wan ta kurabuka. Ye kuran, ene kagie Aisak* we dinatnga. Na ka kaima di te padiglka ikra, yagl gak i ya ye gawama okuo moraiglkwa i pre aimadi panabuka. 20 Te, Ismael we, ene dinga prika. Na ye ere wakai ere tebo, ye gawama mere kide moraiglkwa. Mere kide meglbi, ye yugobono pere ta moraiglkwa. Te, Ismael yagl gak 12-pela kurabuka. Yagl gak wagle i yagl kade moglsre, yugobuno pere pere sugl moraiglkwa. 21 Ismael yegl mere ere wakai ere tenaglka ba na ka kaima okna di te padiglka ikra, Aisak pre panabuka. Sara erme bugla yugu swara mere moglsre, yagl gak i kurabiwe di, yegl dugwa. 22 God ka yegl di kodidre, ye ede ogwa.

23 Ana God ka yegl dugwa ade swara i mina Abraham ye God kamo duglo boglsre, ye wam Ismael ya te, ye nigl kogonmo yoba yagl gak kiglkwa ya te, ye nigl kogonmo yagl ye topo sugwa, yoba yagl mudu i makai sidre, gagno puduo gagie bogl togwa. 24 Ana Abraham gagie puduo gagie beglkwa igne, ye bugla yugu 99 ne kodugwa. 25 Te, ye Ismael gagie puduo gagie bogl togwa igne, Ismael bugla yugu 13 ne kodugwa. 26 Ade swara i, yoba Abraham gagie puduo gagie bogl teigo, Abraham ama ere mogl, wam Ismael gagie puduo gagie bogl tedre, 27 nigl kogonmo yoba yagl gak kiglkwa ikra ya nigl kogonmo yagl yoba yugobuno pere topo bogl neigo, ye topo sugwa ikra, yoba yagl mudu gagno puduo gagie bogl togwa.