1 Ana okuo Yawe ere mogl, Noa yegl di togwa, Yoba mudu erme meglkwa i we, ye mudu mabuno kide erikwa. Kide erikwa ba ene swara yoba du motnga kaniga. Yegl pre ene yobanma mudu bogl ede sip yugugl pio. 2 Ana agl bugla ya ki yegl meglkwa i we, tau yoba si gogl, tawa naraiglkwa kuno erukwa, tau kuno erekrukwa. Ana taragl tau kuno erukwa i we, ene taragl swara swarade kumugl 7-pela idre, abai 7-pela idre, ede sip yugugl enaiglkwa. Te, taragl tau kuno erekrukwa i we, ene taragl swara swarade kumugl swara ta idre, abai swara ta idre, ede enaiglkwa. 3 Ana kua i we, kua kane kane meglkwa i, ene ama swara swarade kumugl 7-pela idre, abai 7-pela idre, ede sip yugugl enaiglkwa. Ene yegl eribi, taragl kane kane meglkwa kumugl ya abai tau goglkre, kor mogl, gagro kuraiglkwa. 4 Ana na we, na ege 7-pela de mogl, kamun dedenaglka. Kamun dedibo, ege 40-pela de etne sidre, eduer sidre, erabuka. Eran, taragl ere yeiga makan mina meglkwa i we, mudu goraiglmiwe di, yegl dugwa.

5 Yawe ka yegl di te kodugo, yagl Noa i we, ye Yawe dumere mudu duglo boglkwa.

6 Ana Noa bugla yugu 600 ne kodugwa igne, nigl kamun ikra si, makandile mudu ake wai dugwa. 7 Ana Noa yogo, ebie yogo, wama ebino bogl yeigo, ye nigl kamun ikra sinabukra we di prisre, ede sip yugugl eigwa. 8 Eigo, agl bugla kane kane yoba si gogl, tawa tenaiglkwa kuno erukwa ya te, agl bugla kane kane yoba si gogl, tawa tenaiglkwa kuno erekrukwa ya te, kua kane kane ya taragl kane kane makan mina wanigwa i, 9 mudu suo suode wigwa. Taragl kane kane wigwa i we, ta kumugl yogo, ta abai yogo, suo suode ede u sip yugugl Noa moglmara wigwa. God unaiglmiwe di Noa di tomere wigwa. 10 Ana ege 7-pela de ikra dudugo, nigl kamun ikra sugwa.

11 Ana Noa bugla yugu 600 ne kodugwa igne ikra, ba 2 mun, de namba 17 i we, makan buko dugo, nigl podo makan atne ede egli ugwa. Ugo, kamun podo kaima sugwa. 12 Kamun etne si, eduer si moglkwa. Ege 40-pela de togokre, si pai moglkwa.

13 Ana kamun podo kaima sugwa ba kamun mabuno bogl sugwa ade swara igne i we, Noa yogo, ye ebie yogo, Noa wama Siem ya Ham ya Jafet yeigo, ebino yeigo, ede pi sip yugugl eigwa. 14 Ana dua kabu kane kane ya te, agl bugla kane kane ya te, taragl kebra kane kane makan mina wan meglkwa ya te, kua kane kane ama sip yugugl meglkwa. 15 Taragl mudu ir mina pipode igwa i, suo suode ede u Noa sip yugugl moglmara u kodigwa. 16 Sip dua God yene yogugl togwaTaragl kane kane mudu meglkwa ta kumugl yogo, ta abai yogo, suo suode, God unaiglme dumere ede sip yugugl u kodigwa. Ana yoba ya taragl kane kane sip yugugl u, mogl kodigo, Yawe dua yogugl togwa.

17 Ana kamun ege 40-pela de si moglko, nigl makan ake wai didre, ede mitna pi, sip ake ple dugwa. 18 Ake ple didre, ede mitna kaima ogo, sip nigl yaudomugl wan moglkwa. 19 Sip nigl yaudomugl wan moglko, nigl ede mitna pi mogl mogl, kamin muglo mudu uglo koglo koglo paigwa i, i atne ede kodugwa. 20 Nigl kamin muglo mudu i atne edidre, 7 mita mere ede mitna ogwa. 21 Nigl kamin podo yegl sugwa pre taragl kane kane makan mina meglkwa mudu geglkwa. Kua ya, agl bugla ya, dua kabu ya te, taragl kebra kebra makan mina wanigwa ya, yoba ama mudu geglkwa. 22 Taragl kane kane makan gaba mina wandre, ir mina pipode igwa i, mudu geglkwa. 23 Ana God yegl mere yoba ya agl bugla ya dua kabu ya kua ya taragl kebra makan mina wanigwa mudu si goglko, Noa bogl akie sip yugugl meglkwa ikra keme goglkre, kor meglkwa. 24 Ana nigl ege 150 de makan mudu ake wai di pai moglkwa.