1 Ana okuo bugla yugu suo ede ogo, Isip king ere mogl, ugl kubu ta kanugwa. Ye ugl kubu kanumara i, kanugwa, ye nigl Nail we dimara i, nigle bina adigl moglkwa. 2 Ye nigle bina adigl moglko, kau 7-pela nigl Nail mina plau didre, ede mitna u kugl nigle bina moglmara ne meglkwa. Kau 7-pela i, podo mogl, wam podo beglkwa. 3 Ye kugl ne meglko, kau 7-pela kor nigl Nail mina plau didre, ede mitna wigwa. Kau 7-pela kor wigwa i, wam paikre, yobuglno mogigwa. Ye ede mitna udre, kau wakai 7-pela ikra meglmara pi magigl meglkwa. 4 Magigl moglsre, ye ere mogl, kau 7-pela wakai i mudu si neigwa. King ugl kubu yegl kandre, aduglkwa.

5 Ana Isip king aglke kor ugl padre, ugl kubu kor ta kanugwa. Ye ugl kubu ta kanugwa i, kugl mogo edie swara ta adigl paugo, kanugwa. Ana kugl mogo edie swara i, piglade si, bage 7-pela koglkwa. Te, kugl mogo koglkwa i, podo kogl, wakai kaima keglkwa. 6 Koglko, kan moglko, okuo edie swara i mina bage 7-pela aglke kor koglkwa. Koglkwa ba kugl mogo okuo koglkwa i, ir niga dugwa ta ade umara u sugwa pre kebra keglkwa. 7 Ana kan moglko, kugl mogo bage 7-pela kebra keglkwa i ere mogl, kugl mogo bage 7-pela komono kana podo keglkwa ikra mudu si neigwa. King ugl kubu yegl kandre, aduglkwa. Aduglkwa igne, ye ugl kubu kaniedi pre pogl sugwa.

8 Ana king tagna mogl aduglkwa igne, ye nomane sugwa pre ye kumo giai yoba ya yoba nomane podo paugwa dumo Isip meglkwa i mudu agle dugo, wigwa. Wigo, king ugl kubu suo kanugwa i ye di togwa ba ye pre pogl sikrikwa pre mabuno di nogugl ede tekrikwa.

9 Ana king ugl kubu kanugwa i, yoba swara ta mabuno di nogugl ede tekriko, yagl ta yoba nigl wain bekidre, i pi king suru teigwa ye sugl moglkwa ikra ere mogl, yegl dugwa, Aya, na aglau erika. Na ka ta okna ene di tenaglka paugwa ba na ene di tekrika. 10 Ene aglke ta na den kubro narsre, yagl ta yoba bret gaglsre, yu ene teigwa ye sugl moglkwa i, den kubro tedre, etnga. Yegl ersre, ene no si kane si i pi kane yugu edinga. Kane yugu i, yagl ta soldia tau ene yugun sugl kan meglkwa ye bitno moglkwa i, yugomugl yogwa. 11 Ene no si kane si i pi kane yugu edingo, no suo akie eduer ege swara mina ugl kubu pere pere kanubuglka. Ugl kubu kanubuglka i, mabuno pere pere paugwa. 12 Ana kane yugu i mina Hibru yagl kulu ta ama moglkwa. Ye yagl ta soldia tau sugl moglkwa ikra nigl kogonmo yagl moglkwa. No ugl kubu pere pere kandre, yagl i di tobuglka. Di tobuglko, ye ugl kubu kanubuglka i mabuno pere pere paugwa i, di nogugl ede norukwa. 13 Di nogugl ede noruko, ye dumere pai yugwa. Ene na kogon okna erika aglke kor eratnedi dedidre, yagl ta bret sugl moglkwa ikra si gogl, ede mina wedigl yeniwe di, yegl dugwa.

14 Yagl wain sugl moglkwa i ka yegl dugo, king ye yoba tau Josep yunaiglmedi dedugwa. Dedugo, ye ede pi Josep tabre kane yugu i meda edigwa. I meda edigo, ye pauna yugo guglidre, kugugl gagl kor edidre, ede pi king moglmara ogwa. 15 Ye ede king moglmara ogo, king ye di te, yegl dugwa, Na ugl kubu ta kaniga ba yoba ta mabuno di nogugl ede naraiglkwa kuno erekrukwa. Yoba ta di nogugl ede narekrikwa ba yoba ta di nare, yegl dugwa, Yoba ugl kubu kanigwa i, Josep prisre, mabuno di nogugl ede kanumiwe di, yegl dugo, prie di, king yegl dugwa. 16 King yegl dugo, Josep di ikne ede, yegl dugwa, Nana di nogugl ede tenaglka kuno erekrabuka. Ba God we, ye mabuno di nogugl ede tenabuka. Tenan, ene den mudn aragan erabiwe di, yegl dugwa.

17 Josep ka yegl dugwa pre king ere mogl, ye yegl di togwa, Na ugl kubu kaniga i, na nigl Nail bina adigl moglka. 18 Adigl moglko, kau 7-pela nigl Nail mina plau didre, ede mitna u, kugl nigle bina moglmara ne meglkwa. Kau 7-pela i, podo mogl, wam podo beglkwa. 19 Ye kugl ne meglko, kau 7-pela kor nigl Nail mina plau didre, ede mitna wigwa. Kau 7-pela kor wigwa i, kide meglkwa. Ye wam paikre, yobuglno mogigwa. Kau 7-pela kide meglkwa i, na dumo Isip suna kau kide yegl ta okna kankrika. 20 Ana kau kide wam paikre, yobuglno mogigwa i ere mogl, kau 7-pela wakai i mudu si neigwa. 21 Mudu si ne kodigwa ba yoba ta ye kandre, taragl podo nemedi kankraiglkwa mere yegl meglkwa. Ye okna wam paikre, yobuglno mogigwa i, yegl mere mogl pai meglkwa. Na yegl kandre, adiglka. 22 Na adiglsre, kuri ta mogl, aglke kor ugl padre, ugl kubu kor ta kaniga. Ugl kubu kor ta kaniga i, kugl mogo edie swara ta adigl paugo, kaniga. Kugl mogo edie swara i mina bage 7-pela mogo wakai kogl, mere kide keglkwa. 23 Ana okuo edie swara i mina mogo aglke kor bage 7-pela koglkwa. Koglkwa ba kugl mogo bage 7-pela okuo keglkwa i, ir niga dugwa ta ade umara u sugo, mogo i kebra kogl, gigle geglkwa. 24 Ana kugl mogo bage 7-pela kebra kebra keglkwa i ere mogl, mogo bage 7-pela wakai keglkwa i mudu si neigwa. Na ugl kubu yegl kandre, tagna kana adiglka igne, na kumo giai yoba di teiga ba yoba swara ta mabuno i di nogugl ede naraiglkwa kuno erekrukwa. Di nogugl ede narekrimiwe di, yegl dugwa.

25 Ana king ka yegl di kodugo, Josep ere mogl, king yegl di togwa, Ene ugl kubu suo kanga i, mabuno swara paugwa. Ugl kubu suo kanga i mina God taragl ta erarukwa i, ene i nogugl ede togwa. 26 Kau 7-pela wakai meglkwa i ya kugl mogo bage 7-pela wakai koglkwa i, bugla yugu 7-pela pre yegl paugwa. Ugl kubu suo kanga i, mabuno swara paugwa. 27 Te, kau 7-pela wam boglkre, yobuglno mogigwa, ye okuo ede mitna wigwa i ya kugl mogo bage 7-pela koglkwa, ir niga dugwa ade umara u sugwa pre kebra koglkwa i ama bugla yugu 7-pela pre yegl paugwa. Ba bugla yugu 7-pela i, kidan podo yenabuka. 28 Na ene di teiga ikra we, God taragl ta erarukwa ene i nogugl ede togwa. 29 Ene pro! Komno kana, bugla yugu 7-pela dumo Isip mudu kaya mokna podo kide panabuka. 30,31 Ba bugla yugu 7-pela i dudinan, bugla yugu 7-pela ta kidan podo yenabuka. Kidan podo kide kaima yenan, dumo Isip u kide kaima enabuka pre yoba Isip meglkwa kidan podo geglbi, okna bugla yugu 7-pela kaya mokna podo paugwa i, kinano torua sinabuka. 32 Te, ene ugl kubu swara keme kankre, suo kanga i we, mabuno yegl paugwa, God ye taragl yegl plau dinabedi padigl kodidre, tabre ere edenagledi prukwa.

33 Yegl pre ene yagl ta nomane wakai panabuka, konbauna wakai sinabuka yagl ta doko kanatnedi prika. Doko kan, yagl i dumo Isip sugl morabedi dedenatniwa. 34,35 Yagl i dumo Isip sugl morabedi dedidre, yagl kade tau ama dumo Isip sugl moglsre, kugl mogo si makai sinaiglmedi dedenatnga. Dedin, ye bugla yugu 7-pela kaya mokna podo panabuka igne i yoba Isip suna kugl mogo mudu si yunaiglkwa i, br 5-pela beglbi, br swara ta inaiglkwa. Ibi, ene ka giglede ta di padigln, ye i pi ene dumonen pere pere makai sidre, yoba kunogl i dinaiglmedi soldia tau sugl kan moraiglmedi dedenaiglkwa. 36 Ana kugl mogo si makai sinaiglkwa i we, bugla yugu 7-pela dumo Isip kidan yenabuka i mina Isip yoba ne moglsre, goglkraiglmiwe di, Josep yegl dugwa.

37 Ana Josep ka yegl dugo, king ya ye yobamo kade wakai prikwa. 38 Wakai priko, king ere mogl, ye yobamo kade yegl di togwa, Yagl i we, God Murubuglomo ye moglmara suna moglkwa. Yagl ye mere yegl ta dokumun, ta kankramgo priwe dugwa. 39 King ye yobamo kade yegl di tedre, ye ere mogl, Josep yegl di togwa, Taragl ta plau dinabuka ikra God ene swara di nogugl ede togwa. Yegl pre ene swara nomanen podo paugo, konbauna wakai singa yagle motnga. 40 Na kantri ta bitno mogl, sugl moglka i, ene sugl moratnga. Sugl motn, na yobanama mudu ene kanen prisre, duglo boraiglkwa. Na swara king moglka pre na ene bitn moraglka ba ene yoba mudu bitno mere yegl moratniwa.

41 Na erme ene dumo Isip mudu sugl moratnedi dediwe di, king yegl dugwa. 42 King yegl didre, ye ring ta ogo mogo mina paduglkwa gugl edidre, Josep ogo mogo mina padigl togwa. Ring i mina king kagie bogl padiglkwa. Ye ring i Josep ogo mogo mina padigl tedre, kugugl gagl kruo wakai yogwa tau ede tedre, gol bisi nugu ta nugu mina togo togwa. 43 King yegl ersre, ye ama Josep karis mina wanabedi karismo ta togwa. King karismo suo yogwa. Karismo namba 1 mina king yene wanugwa ba ye karismo namba 2 yogwa i, Josep togwa. Togo, Josep dumo aglo mere ta ogwa i, yoba tau ede okna pi, Agai teo! digwa. King yegl ere, Josep swara ye dumo Isip sugl morabedi edugwa.

44 King yegl ersre, ye ama Josep di te, yegl dugwa, Na swara king moglka ba Isip yoba mudu ene kanen praiglkwa. Ye siragl taragl eramnedi praiglkwa i, ene di prisre, eraiglmiwe di, yegl dugwa. 45 Yegl didre, king ama Josep kagie kor, Safenat Panea we dugwa. Yegl ersre, ye ama abu ta kagie Asenat we digwa i, Josep ebie morabedi Josep togwa. Asenat nem kagie Potifera we digwa. Ye dumo Isip suna taun Heliopolis we dimara moglsre, Isip yoba godno tawa togwa yagle moglkwa. King abu i Josep togo, Josep abu i yugwa. Ye abu idre, ere mogl, ede bage bage pi, dumo Isip kanugwa.

46 Ana Josep ye mabuno bogl Isip king kogonmo erukwa igne, bugla yugu 30 nogwa. Ye king moglmara kide kodidre, dumo Isip suna ede bage bage pi, kogonmo erukwa. 47 Josep bugla yugu 7-pela kaya mokna mere morabe dugwa ikra, Isip suna kaya mokna mere kide moglkwa. 48 Yegl pre Josep ere mogl, bugla yugu 7-pela i mina kugl mogo mere idre, i pi taun swara swarade makai sugwa. Taun swara swarade mina kugl mogo taun i bina si yuigwa i, taun i mina makai sugwa. 49 Josep yegl ersre, kugl mogo mere kide makai sugwa. Ye komono kana skel ersre, makai sugwa ba kugl mogo i, wesan mudi nigl bina mere kide moglmere yegl mere yogwa pre ye skel erabuka kuno erekrukwa. Kuno erekrukwa pre ye skel erukwa i kide kodidre, yoko si makai sugwa.

50 Ana kidan podo yenabuka igne ukrukwa pai moglko, Josep ye ebie Asenat bogl wano suo kiurka. Asenat, ye Potifera tawa togwa yagle taun Heliopolis we dimara moglkwa ikra, abuglo moglkwa. 51 Josep ya Asenat wano komono kiurko, Josep ere mogl, yegl dugwa, God na yubun podo iga ikra kinana torua sidre, nina agrama ama kinana torua sinabedi erumiwe di, yegl dugwa. Yegl didre, ye wam komono kagie Manase* we dugwa. 52 Te, ye wam okuo kuglkwa igne we, yegl dugwa, Na yubun podo imara dumo magigl i, God gak i narumiwe dugwa. Yegl didre, ye kagie Efraim* we dugwa.

53 Ana bugla yugu 7-pela dumo Isip kaya mokna podo paugwa ikra dudugo, 54 Josep okna dumere kidan podo bugla yugu 7-pela yenabuka ikra ugwa. Ugo, kantri pere pere ama kidan podo yogwa ba dumo Isip suna koglo koglo i we, kugl mogo si makai sigwa ikra yogwa. 55 Yegl pre kidan podo yenabuka ikra ugwa igne, Isip yoba mudu kidan goglsre, king moglmara pi Bret noro! digo, king ere mogl, Ene pi Josep moglmara pio! dugwa. Josep moglmara ebi, ye ka siragl mere ene di tenabuka i, erio! di, yegl dugwa. 56 Yegl pre dumo Isip ya kantri mudu kidan podo yogwa igne i Isip yoba Josep moglmara wigo, Josep yugu pere pere kugl mogo makai sumara dua yauruko, ye kugl mogo topo sigwa. 57 Te, kantri pere mudu ama kidan podo yogwa pre yoba kantri pere mudu meglkwa ama ede Isip u Josep moglmara kugl mogo topo sinamnedi wigwa.