1 Ana okuo God ere mogl, Abraham na kana pre medrabo mo pre mediglkrabo mo di, ere kanagledi ye Abraham ka ta di togwa. God Abraham yo dugo, Abraham, Na mogliwe dugwa. 2 Dugo, God ye yegl di togwa, Ene we, wan swara kaima ta moglkwa i, idre, ede dumo makan Moria we dimara po! Na ene wan Aisak, mudn suna moglkwa i pre diga. Ene dumo makan Moria we dimara en, na muglo meglbi ta ene obuno di tebo, muglo meglbi i mina ene wan i si goglsre, gagl tawa naratniwe di, yegl dugwa.

3 God ka yegl dugwa pre Abraham tagna kana adiglsre, taragl tau donki moko bolamugl edidre, wam Aisak ya nigl kogonmo yagl suo idre, te, tawa gagl tenagledi ede ekresre, ede dumo ta God enabe dumara enagledi ogwa. 4 Ye ege suota pi moglsre, de namba 3 ye eglke mogl, dumo ikra kanugwa. 5 Dumo ikra kandre, ye nigl kogonmo yagl suo di te, yegl dugwa, Ene igle mogl, donki sugl moglsro! Na wana bogl akie ede dage ibo pidre, God kagie kade tedre, ede ikne unabugle dugwa.

6 Ana Abraham tawa tenagledi ede ekrukwa ikra idre, ye wam Aisak kake idre, ede enabedi togwa. Tedre, yene naip ya doga yobugl akugo, wam bogl akie ede ebrika. 7 Ye pi miurko, Aisak ere mogl, Nina yo, dugwa. Dugo, Abraham, We, ene do dugwa. Dugo, Aisak ka yegl di prukwa, Nono ede ya doga yobugl yubuglka ba sipsip nagigle ta tawa tenabuglka i, aglo moglme? dugwa. 8 Aisak yegl dugo, Abraham di ikne ede, yegl dugwa, Wana yo, God yene sipsip nagigle ta gagl tawa narabredi norabiwe di, yegl dugwa. Dugo, ye akie ede ebrika.

9 Ana ye ede pi dumo ta God ye Abraham obuno di tomara ebriko, Abraham kobuglo bogl ta kuglsre, ede ekrukwa ikra i pi tebe egle koglkwa. Ede i pi kobuglo bogl mina tebe egle koglsre, ye wam Aisak ogo kagle kane sidre, i pi kobuglo bogl mina ede ikra egle koglmara tebe edugwa. 10 Ede egle koglmara tebe edidre, ye naip akidre, wam si goragledi erukwa. 11 Si goragledi eruko, Yawe Angelomo heven ibo moglkwa agle di, Abraham yo! dugwa. Dugo, Abraham Na mogliwe dugwa. 12 Abraham yegl dugo, Yawe angelomo dugwa, Ene wan si goglkro! Ye ka kaima sikro! Erme ene na God moglka i, kuduglna goglnga kaniga. Ene wan swara kaima moglkwa ba ene ye ake gi dikre, si gogl, tawa naragledi etnga. Yegl pre ene na kuduglna goglnga kaniwe di, yegl dugwa.

13 Ana Abraham kan koglo koglo edidre, kanugwa, sipsip kumugl ta ye moglmara mokomugl moglkwa kanugwa. Sipsip i bre yogagle mina ede kebra ta paimara warke gide paugwa. Abraham sipsip i kandre, ye pi idre, si gogl, gagl tawa togwa. Yegl erukwa pre sipsip i, Aisak agaimo yugwa. 14 Abraham sipsip gagl tawa tedre, ye ere mogl, dumo i Yawe Norabuka we di, kagie yei togwa. Yegl pre yoba erme digwa, Yawe kaminmo muglo mina norabiwe di, yegl di meglkwa.

15 Ana Yawe angelomo heven ibo moglkwa aglke kor Abraham agle didre, 16 yegl dugwa, Abraham yo, Yawe ene yegl di togwa, Ene wan swara kaima moglkwa i ene ake gi dikre, si gogl tawa naragledi etnga i pre nana kagna mina ka giglede ene di te padiglka. 17 Na kaima ene ere wakai ere tedre, ene gawanma mere kide moraiglmedi ere edenaglka. Ere edibo, kugl kuri mitna ibo mere kide keglmere ya te, wesan mudi nigl bina mere kide meglmere mere yegl moraiglkwa. Te, ene gawanma ama ye kuda ikne kuda bogl tedre, yobuglo eraiglkwa. 18 Te, ene na kana duglo boglnga pre yoba yugobuno pere pere moglsre, uglo koglo koglo moraiglkwa i we, na ene gawan ta morabuka ye mina mudu ere wakai ere tenaluwe di, Yawe yegl dume dugwa.

19 Ana Yawe angelomo ka yegl di kodugo, Abraham ya Aisak ede ikne pi, Abraham nigl kogonmo yagl suo ikra miurara ebriko, ye akie ede ikne dumo Berseba eigwa. Eigo, Abraham yobama bogl Berseba okna kipaimara ikra kipai meglkwa.

20 Ana okuo yoba ta Abraham moglmara u, ye agigle Nahor kamo di te, yegl dugwa, Nahor ebie Milka ama yagl gak tau kuglkwa. 21 Yagl gak komono kuglkwa i, kagie Us we digwa. Te, ye okuo Bus ya Kemuel ama kuglkwa. Kemuel ere mogl, yagl gak ta kuglkwa, kagie Aram we digwa. 22 Te, Milka yagl gak tau ama kuglkwa, kagno Keset ya Haso ya Pildas ya Jitlap ya Betuel we digwa. 23 Abraham agigle Nahor ebie Milka yagl gak 8-pela i kuglkwa. Te, Betuel ere mogl, abai gak ta kuglkwa, kagie Rebeka we dugwa. 24 Nahor ama nigl kogonmo abu, kagie Reuma we digwa, ye ebie namba 2 morabedi yugo, ye ama yagl gak 4-pela kuglkwa. Yagl gak 4-pela i, kagno Teba ya Gaham ya Tahas ya Maka we dimiwe di, yagl ta ugwa ikra Abraham yegl di togwa.