1 Ana Yawe God dua kabu ya ki kane kane ere yogwa meglkwa. Meglko, toki ta moglkwa. Toki i, ye swara nomane podo paugwa. Ana toki u, abu yegl di prukwa, God kaima ene di te, ede pra pra dumo wakaile paigwa i mogono uro nekriro dumo? toki yegl di prukwa. 2 Di pruko, abu di ikne ede, yegl dugwa, Ede dumo wakaile paigwa i, mogono uro nenabuglka. 3 Ba ede swara ta dumo suna paugwa. Ede i pre, God yegl di norukwa, Ene gogl dinabriwa. Ede i mogomo uro nekre, edemo akekre, eriro! dume di, abu yegl dugwa. 4 Dugo, toki ye di te, Ene ta goglkrabre dugwa. 5 God prukwa i, i ta uro nebr, ene nomane podo inabrika. God nomane podo pamere idre, mabuno kide wakai akie pre pogl si dinabrika pre dume dugwa.

6 Ana abu ere mogl, ede ikra mogomo koglkwa kandre, yegl di prukwa, Ede mogo i wakai kaniga. Yoba uro nebi, dogon erabuka. Na ama uro nebo, nomane podo inagle di prukwa. Prisre, mogomo tau uro nedre, ye wie magigl moglkwa ama tau togo, nogwa. 7 Nogo, yagl abu suo ye nomane idre, nono yokoko mugledi pribrika. Prisre, ede fik we digwa yaudo tau bro idre, taragl kaur mere ya kodai mere si bogl, ere pribrika.

8 Ana min paugwa igne i we, Yawe God dumo wakaile suna makandigle wan moglkwa, pribrika. Prisre, Yawe God no kan dinabedi ede paimara teke pabrika. 9 Ana Yawe God ere mogl, yagl Adam* we digwa i agle di prukwa, Ene aglo motne? dugwa. 10 Dugo, Adam di ikne ede, yegl dugwa, Na ene dumo wakaile wan motnga prisre, kudugl goglsre, teke paiga. Na yokoko moglka pre kudugl gole dugwa. 11 Ana God ere mogl, yagl di pre, Ira ene yokoko motnedi di tome? Na ede mogo swara ta uro nekro diga ikra uro neno? di, yegl di prukwa. 12 Di pruko, yagl yegl dugwa, Ene abu no akie morabredi beke natnga i, ye ede mogo uro naruko, na neiwe di, yegl dugwa. 13 Dugo, Yawe God ere mogl, abu di pre, Ene siragl pre etne? dugwa. Dugo, abu di ikne ede, Toki na bakagl naruko, neiwe dugwa.

14 Ana Yawe God ere mogl, toki yegl di togwa, Ene yegl etnga pre yubun podo inatnga. Agl bugla ya dua kabu mere meglmara ene swara yubun podo inatnga. Ene dan mina keme wandre, makan kugane nedre, yegl keme aimadi moratnga. 15 Yegl motn, na ama yubun yegl ene teiga, ene ya abu kuda ikne ikne morabrika. Kuda ikne ikne miur, ene gawanma ya ye gawamo ama kuda ikne ikne moraiglkwa. Meglbi, ye gawamo ene bitn egre kogl sinabuka. Sinan, ene kagle beye karatniwe di, toki di kide yei togwa.

16 Ana abu we, God ere mogl, ye yegl di togwa, Na yubun yegl ene teiga, gak kuratnga igne, giugl podo prisre, kuratnga. Yegl panabuka ba ene win aimadi wakai kan pai moratnga. Pai motn, ye ama ene bitn mere mogl, ene sugl morabe di, abu yegl di togwa.

17 Ana yagl we, God ere mogl, ye yegl di togwa, Ene ebin kamo prisre, ede mogo ta uru nekro diga nenga. Ene yegl etnga pre, na makan gaba ere kide ere teiga. Ene aimadi makan mina kogon podo ersre, kaya mokna i nenatnga. 18 Ana kaya mokna ere yaratnara kugl kide ya kugl kan kagigle boglkwa wi si panabuka. Wi si panabuka ba kaya mokna ama bogl panan, i nenatnga. 19 Ene kogon podo ersre, pitn boglsre, kaya mokna i nenatnga. Yegl keme aimadi ere mogl, gogln, ogn gagn ede ikne u, makan gaba wagle enabuka. Na makan gaba idre, ene bekiga pre ene gogln ede ikne makan gaba wagle enatniwe di, yagl yegl di togwa.

20 Ana Adam ere mogl, ye ebie kagie Ewa* yei togwa. Yoba mudu okuo moraiglkwa ye gawama keme moraiglkwa pre kagie Ewa we dugwa.

21 Ana Yawe God ere mogl, agl bugla ta si gogl, nagie kugl yaursre, kugugl gagl mere Adam ebie bogl ede togwa.

22 Ana Yawe God ere mogl, yegl dugwa, Yagl abu suo i we, ye etne u nono munere miurka pai dumiwe dugwa. Ye mabuno wakai ya mabuno kide akie pre pogl sibrika pre erme ede ta paugwa, yoba mogomo uro nebi aimadi kor moraiglkwa ikra, yagl abu uro nedre, aimadi kor mogl dinabriwe dugwa. 23 Yegl pre Yawe God ye yagl dumo Iden di meda edugwa. Ye okna makan gaba idre, yagl bekugwa. Ana erme yagl makan gaba i mina kogon ersre, kaya mokna ere yarabuka pre God ye di meda edugwa. 24 Ana ye yagl abu di meda edidre, angelo giglede meglkwa tau dumo Iden ade umara koglo kana kan moraiglmedi edugwa. Edidre, bainet ta ama edugwa. Bainet i, doga mere dedre, kur kur si pai moglkwa. Angelo i ya bainet i, yoba ede ikra pamara ede ikne u dinaiglmedi God ye konbauna sugl kan moraiglmedi edugwa.