1 Ana igne i dumo Kenan i, kidan podo yogwa. Abraham okna moglkwa igne, kidan podo yomere yegl aglke kor yogwa. Kidan podo yogwa pre Aisak ede dumo ta Gerar we dimara, Filistia yoba kipai meglmara ogwa. Dumo Gerar i, king ta sugl moglkwa, kagie Abimelek we digwa. 2 Aisak ede Gerar ogo, Yawe ere mogl, ye moglmara plau didre, ka yegl di togwa, Ene ede Isip pikre, na dumo ta ene di tenaglmara i moglo! 3 Dumo i we, ene dumo erme motnara i pre diga. Magigl i moglo! Motn, na ene motnara mogl tedre, ene ere wakai ere tenaglka. I siragl pre na okna ene nen Abraham ka kaima di te padiglka ikra dimere ersre, dumo makan magigl i mudu ene ya ene gawanma tenaglka. 4,5 Ene nen Abraham na kana duglo boglkwa. Na yegl ero! diga ye ersre, yegl erekro! diga ye erekre, yegl erukwa pre na ene gawanma mere kide moraiglmedi ere edenaglka. Kugl kuri mere kide keglmere, yegl mere moraiglkwa. Na yegl ere tedre, dumo makan magigl i mudu ene gawanma tenaglka. Tedre, ene gawan ta okuo morabuka ye mina yoba uglo koglo koglo yugobuno pere pere meglkwa i, mudu na ere wakai ere tenagle di, yegl dugwa. 6 Yawe yegl dugwa pre Aisak dumo Gerar kipai moglkwa.

7 Ana Aisak dumo Gerar kipai moglko, yoba tau ye ebie kandre, Abu i, ira moglme? digwa. Yoba yegl di prikwa igne, ye kudugl goglsre, Rebeka abu wakai kaima moglkwa pre makan nem ye inamnedi ersre, na na si gogl dinaiglmedi, prisre, ye Na ebina moglme dikre, Abara moglme dugwa. 8 Ye ka yegl didre, dumo i ege olto kipai moglkwa. Ana Filistia yoba kingno Abimelek ikra we, ye aglke ta yugugl mogl, windo mina kan atne ede, Aisak ye Rebeka nugo kugro moglko, kanugwa. 9 Kandre, ye Aisak Wo dugo, Aisak ugwa. Aisak ugo, ye ka yegl dugwa, Nogugl paugwa, abu i ene ebin moglkwa paugwa. Yegl pre siragl eruko, ene Na abara moglme dine? di, yegl dugwa. Yegl dugo, Aisak di ikne ede, yegl dugwa, Yagl ta ye inagledi ersre, na si gogl dinabedi yegl pre die dugwa. 10 Yegl dugo, Abimelek aglke kor dugwa, Ene mabuno i siragl pre ere notne? Na yobanama meglkwa i, yagl swara ta ere mogl, ebin yuma, bogl swara ta pabra, aglau i no mudu mabuno muna, aglau enene mitna paugo we di, yegl dugwa. 11 Yegl didre, ye yobama yegl di togwa, Yoba ta ere mogl, yagl i mo ye ebie ere kide ere tenan, nono ye ka kaima si goramniwe dugwa.

12 Ana Aisak taun Gerar i kipai moglsre, kugl mogo ere yaglkwa. Kugl mogo ere yaglkwa bugla yugu swara i mogo dogo, ye kugl mogo mere kide si yugwa. Yawe ye ere wakai ere togwa pre ye mogo swara swarade boglkwa, pare wi sugwa i, edie swara mina 100-de koglkwa. 13 Yawe ye ere wakai ere togo, ye taragl mere i makai si mogl, mogl, taragl mere kide kaima kan yogwa. 14 Ye sipsip ya meme ya kau ki mere kide kuglsre, nigl kogonmo yoba mere kide meglkwa pre Filistia yoba deno muduno u kide ogwa. 15 Deno muduno u kide ogo, Filistia yoba i ere mogl, Aisak nem Abraham kor moglkwa igne ye nigl kogonmo yoba maugl nigl tau perikwa i, ye makan gaba si atne ede, maugl nigl si bi digwa. 16 Si bi digo, Abimelek ere mogl, Aisak yegl di togwa, Ene yobugln podo paugwa. No yobuglno podo paikrukwa. Yegl pre ene no dumono kide kodidre, ede dumo pere ta po! dugwa. 17 Ye yegl dugo, Aisak dumo i kide kodidre, dumo auduno ta yogwa, Gerar we dimara sel yugumo i pi kipai moglkwa.Aisak maugl nigl mere perukwa ba makan nem yoba nonga si, mane digwa

18 Ana Aisak ede dumo auduno yogwa, Gerar we dimara i pi kipadre, ye nem Abraham kor moglkwa igne, ye nigl kogonmo yoba maugl nigl tau okna perikwa ikra yomara aglke kor perukwa. Abraham goglko, Filistia yoba okuo ere mogl, makan pere si bi digwa. Yegl pre Aisak aglke kor persre, maugl nigl i kagno Abraham okna yomere aglke kor yogwa.

19 Ana aglke ta Aisak nigl kogonmo yoba ere mogl, dumo auduno yomara ikra maugl persre, nigl ogo ta boglkwa kanigwa. 20 Ye kanigo, Gerar yoba agl bugla sugl meglkwa yoba i ka nonga si, Nigl i no niglno moglme! digwa. Ye nonga sigwa pre Aisak ere mogl, nigl i kagie Esek* we dugwa. 21 Ana Aisak nigl kogonmo yoba maugl nigl kor ta periko, makan nem aglke kor nonga sigwa pre Aisak ere mogl, nigl i Sitna* we dugwa. 22 Ye dumo i kide kodidre, ede bage ta ogo, ye nigl kogonmo yoba aglke kor maugl nigl ta perikwa. Periko, makan nem nonga sikrikwa. Yegl pre Aisak nigl i kagie Rehobot* we didre, ka ta ama yegl dugwa, Okna agai wakai ta moramga ta yekrukwa ba erme we, Yawe ake ple di noruko, agai pra yogwa. Yegl pre nono magigl i mun, nono kogonono u wakai enabiwe dugwa.

23 Ana okuo ye dumo i kide kodidre, ede pi dumo Berseba we dimara ogwa. 24 Ye Berseba ogo, ege swara i eduer Yawe ye moglmara plau didre, ka yegl di togwa, Na ene nen Abraham Godmo moluwa. Na ene motnara mogl teiga pre ene kudugl goglkro! Na Abraham ka kaima di te padiglka ikra pre na ene ere wakai ere tedre, gawanma mere kide moraiglmedi ere edenagle dugwa. 25 Yegl dugwa pre Aisak dumo i kobuglo bogl ta kuglsre, Yawe agle di prisre, kamage ere togwa. Ye dumo i sel yugumo kipaugo, ye nigl kogonmo yagl dumo igle maugl nigl ta ama perikwa.

26 Ana igne i Abimelek yogo, ye nomane togwa yagl kagie Ahusat yogo, ye ami sugl moglkwa yagl kagie Fikol yogo, ye taun Gerar i kide kodidre, ede u Aisak kanamnedi wigwa. 27 Wigo, Aisak yegl dugwa, Nono akie munga igne ene deno kubro narsre, na Ede dumo bage ta po! digwa. Ana ene erme siragl pre wime? di, yegl di prukwa. 28 Aisak yegl di pruko, ye di ikne ede, yegl digwa, Yawe ene motnara mogl togwa no kan pogl sumga. Yegl pre no yomun, ene yen, ka kaima di padramnedi umga. 29 No okna ene ere kide ere tekre, mabuno wakai keme ere tomga. No ama Ede po dumga igne, kuda bogl tekre, yoko Ede po dumga. No mabuno kide ta ene ere tekrumnere ene yegl ama no mabuno kide ta ere norokratnga i pre ka kaima di padramnedi prumga. Yawe erme ene ere wakai ere tomiwe digwa. 30 Yegl digo, Aisak ye yagl suota i kaya mokna nenaiglmedi podo ere togo, kaya mokna ya nigl ki akie neigwa. 31 Ne kodidre, ye ugl paigwa. Padre, kamun tagugo, ye tagna kana adiglko, Aisak ya Abimelek ka kaima di ikne ikne ede padiurka. Padiurko, Aisak, Ede pio dugo, ye deno muduno wida dugo, ede eigwa. 32 Ana ade swara i mina Aisak nigl kogonmo yoba u, yegl di teigwa, No maugl nigl perumga ikra we, nigl atne moglmiwe digwa. 33 Yegl digwa pre Aisak maugl nigl i kagie Siba* we dugwa. Yegl pre taun ta dumo i yogwa, erme ama yoba Berseba* we digwa.

34 Ana Aisak wam Iso we, ye bugla yugu 40 nogwa igne, abu suo yugwa. Ta kagie Judit we digwa. Ye Hit yoba ta Beri we digwa abuglo moglkwa. Te, ye ebie ta kagie Basemat we digwa. Ye Hit yoba ta Elon we digwa abuglo moglkwa. 35 Aisak ya Rebeka ye abu suo i kide kanibrika. Yegl pre deno muduno yubun dogwa.