1 Ana okuo, Jekop ya Lea abro Daina ikra ere mogl, makan mam abai kipai meglmara ye kanagledi ede ogwa. 2 Ede ogo, yagl ta kagie Sekem we digwa ikra ye kandre, ye gudu yu, mabuno kide ere togwa. Sekem i, ye Hivi yoba Hamor wam ta moglkwa. Hamor ye yagl kade moglsre, dumo magigl Sekem i ye sugl moglkwa. 3 Sekem ye Jekop abuglo Daina i pi mabuno kide ere tedre, ye abai i bubuno goglsre, wakai kaima kanugwa pre ye abai kina sidre, Ye na ama wakai na kanabe di, ka wakai di togwa. 4 Ye abai i ka wakai di tedre, ere mogl, nem Hamor di te, Ene abai i bogl i naratniwe dugwa.

5 Ana Jekop we, Sekem ye abuglo Daina mabuno kide ere togwa i yoba di teigo, prukwa. Prukwa ba ye wama mudu ede pi agl bugla ere kiglmara pi sugl meglkwa pre ye ede ikne unaiglmedi sugl moglsre, ka ta dikrukwa. 6 Jekop ye wama unaiglmedi sugl moglko, yagl Hamor i ye wam Sekem bogl u, Jekop ka di tenabugledi ubrika. 7 Ye ubriko, Jekop wama agl bugla meda sugl meglkwa i, ye yubun ta plau dugwa i digo, prisre, ede ikne wigwa. Sekem ye Jekop abuglo Daina mabuno kide ere togwa i, ye Israel yoba kagno ere kide ersre, erekrabara erukwa. Yegl pre Jekop wama kide kaima prisre, deno podo kubrikwa.

8 Jekop wama deno podo kubrikwa ba Hamor ere mogl, Jekop wama bogl yegl di togwa, Na wana Sekem ye abai Daina i wakai kaima kanugwa. Yegl pre ene ye tenaiglmedi prika. 9 Te, nono abro te ikne ikne edinamnedi prika. Ene abroma no noribi, no abroma ene tenamga. 10 Nono abroma yegl mere te ikne ikne edidre, nono akie moramga. Ene dumo wakai ta kanaiglmara kipai moglsre, makan topo si idre, no taraglno topo si idre, ene taraglno topo bogl nedre, yegl eraiglmiwe di, yegl dugwa.

11 Hamor yegl dugo, ye wam Sekem ama ere mogl, Jekop wama bogl yegl di togwa, Ene na wakai kadre, Abai inatne dibi, ene Yegl yegl inamne dinaiglmere mere tenaglka. 12 Ene abu topo siramna padraiglkwa ya te, taragl wakai siragl mere inamne dinaiglkwa i, na ene dinaiglmere mere tenaglka. Ene abai i nario! di, yegl dugwa.

13 Sekem yegl dugo, Jekop wama ye abaro mabuno kide ere togwa i prisre, ka kibi di ikne ede, 14 Hamor ya Sekem yegl di teigwa, No abaro ene tenamga i, waragine paugwa. Ene gagn puduo gagie boglkitnga pre no ye ene tomun, agai goramga. 15 Ana ene ye inatnga, konbo swara keme yogwa. Ene yobanma bogl yagl mudu gagno puduo gagie boraiglkwa. 16 Beglbi, no abroma ene tomun, ene abroma no noribi, nono akie mogl, yugobuno sware moramga. 17 Ba no Gagno puduo gagie boraiglme dumga i, ene kano i prikribi, no abaro idre, ede enamniwe di, yegl digwa.

18 Ana Jekop wama ka yegl digo, Hamor ya ye wam Sekem ka i pra, wakai pribrika. 19 Pribriko, Sekem ye Jekop abuglo i wakai kaima kanugwa pre ye tabre pi Jekop wama dimere erukwa. Ana Sekem, ye yoba bormai swara meglmara suna yagl kade moglko, yoba ye swara mogl mitna edumedi kanigwa. 20 Yegl pre Sekem ye nem Hamor bogl akie ede pi taun kobuglo togl winabo dumara dua wagle pidre, yagl taun swara kipaigwa i di te, yegl dibrika, 21 Yagl wagle i, nono kabagle mere yegl meglkwa. Nono makano podo yogwa. Yegl pre nono pra we dumun, ye nono makano wagle moglsre, nono taraglno topo si idre, ye taraglno topo bogl nedre, eraiglkwa. Nono ye abroma imun, ye nono abroma inaiglkwa. 22 Ba nono akie mogl, yugobuno swara mere moramga i, taragl swara ta orumun, ye pra we dinaiglkwa. Ta erekrumun, mane dinaiglkwa. Nono ye gagno puduo gagie beglmere yegl mere gagno puduo gagie bun, pra we dinaiglkwa. 23 Nono ye dimere orumun, ye pra we dibi, nono ye bogl akie mogl, ye aglno buglano ya bonaganano mudu nono inamniwe di, yegl dibrika. 24 Yegl dibriko, yagl mudu taun i kipaigwa i, Hamor ya Sekem kano prisre, ye gagno puduo gagie beglkwa.

25 Ana yagl mudu dumo Sekem kipaigwa i gagno puduo gagie boglsre, giugl prikwa. Ye ege suota mogl, giugl pre meglko, Jekop wam suo, Simeon ya Livai, Daina agigle miurka i ere mogl, bainetno idre, ede taun suna ubrika. Yoba taun i kipai meglkwa ye no sinabredi prikriko, yagl suo ikra udre, yagl mudu si giurka. 26 Ye yagl mudu si goglsre, Hamor ya ye wam Sekem suo akie si giurka. Si giurko, Daina ye Sekem kipamara yugugl kra moglko, ye agigle suo u, ye idre, ede ebrika. 27 Ede ebriko, Jekop wama mudu ere mogl, ye abaro agai podo goglkwa pre ede u yagl geglkwa i taraglno idre, taragl taun suna yogwa i pra mudu i ede eigwa. 28 Ye sipsip ya meme, kau ya donki idre, taragl mudu taun suna yogwa ya taun meda yogwa ama mudu idre, 29 taragl mige podo boglkwa ya taragl mudu yugugl yogwa idre, gak kebra ya abu si kane sidre, i ede eigwa.

30 Jekop wama yegl ere kodigo, Jekop ye wam suo Simeon ya Livai yegl di togwa, Ene yubun podo naribrika. Makan nem magigl meglkwa i, Kenan yoba ya Peres yoba deno kubro narsre, nono no sinaiglkwa. Nono mere moglkrumga pre ye u swara pidre, nono kuda bogl noribi, nono mudu goramniwe dugwa. 31 Yegl dugwa ba ye di ikne ede, yegl dibrika, Ye no abaro konbauna abu mere yegl kandre, mabuno kide ere togwa i, no kanige erabredi pitno? dibrika.