Gênesis 17

3 God yegl dugo, Abram yage kobragai padre, guma dra i pi makan mina paduglkwa. Yegl eruko, God ye ka di te, yegl dugwa, 4 Na we, na ka kaima ta ene di te padiliwa. Ene gawanma ede bage bage pi, yugobuno pere pere mere kide moraiglkwa. 5 Te, ene kagn we, yoba Abram we digwa ba kagn i kide kodidre, kagn Abraham*17.5 Ka Hibru mina, kagie Abram mabuno paugwa, yoba neno moglsre, yagl podo moglkwa. Te, kagie kor Abraham mabuno paugwa, yoba mere kide neno moglkwa. we dinaiglkwa. Na ene gawanma mere kide moglsre, yugobuno pere pere moraiglmedi ere edenaglka pre kagn kor Abraham we dinaiglkwa. 6 Na ene gawanma mere kide moraiglmedi ere edibo, ye yugobuno pere pere moraiglkwa. Meglbi, ene gawanma tau ama yoba kade king moraiglkwa. 7 Na ka kaima di te padiglka i, ene pre panan, ene gawanma okuo moraiglkwa pre ama aimadi panabuka. Na ene Godnen moglsre, ene gawanma okuo moraiglkwa ama Godno moraglka. 8 Na ene gawanma Godno moglbo, na ama dumo Kenan magigl i etne suna wan motnga i, ene ya ene gawanma mudu tenaglka. Erme makan i, yoba pere makano yogwa ba mudu ene gawanma bogl makanono aimadi yenabuka pre tenagle di, yegl dugwa.

God Nagno puduo gagie bolo! dugwa

9 Te, God ere mogl, ka ta ama Abraham di togwa, Na ka ta ama di te padiglbo, ene ka i duglo boratnga. Ene duglo bogln, ene gawanma okuo aimadi duglo boraiglkwa paugwa. 10 Na kana ene ya ene gawanma okuo moraiglkwa duglo boraiglkwa i, yegl diga, ene yagl mudu gagno puduo gagie boraiglkwa. Yagl gak kebra ya te, yagl kade ya te, yagl kidagl pra, mudu gagno puduo gagie boraiglkwa. 11 Ene gagno puduo gagie beglbi, ene praiglkwa, God ka kaima di noro paduglkwa ikra nono pre pamedi praiglkwa.