13 Ivo, Kilisito kaigola mmabumbila? Ivo, Paulo iyo yawambigwe kwa mbuli yenu? Hebu ivo mbatizigwa ili muwe wajalusona wa Paulo? 14 Nomwing’ha hewela Mulungu kua simbatize munhu yoyose mmwenu mbali niwabatiza Kilisipo na Gayo waiyeka. 15 Baho habule munhu yonda yalonge kabatizigwa ili yawe mjalusona wangu.

16 Enaa, nibatiza lukolo lwa Sitefana, mbali sivimanya kama nibatiza munhu imwenga kaidi. 17 Kilisito haning’ile sang’hano da kubatiza wanhu, ila kaning’ha sang’hano da kuligula Usenga Unogile, bila kutumanila ugalu wanhu viwalonga, nihasang’hana ivo ili udaho wa ifa ya Yesu mumsalaba seke ioneka yabule chinhu.