Gênesis 17

ରା଼ଜିମା଼ନାତି ସିନା ତ଼ଲୁ ଦା଼ନାୟି

1 ଅବ୍ରାମକି ସା଼ରି କ଼ଡ଼ି ଅଣେସି ବାର୍ସା ବେ଼ଲାତା ଏ଼ୱାଣାଇଁ ପ୍ରବୁ ତ଼ଞ୍ଜାଆ଼ହାଁ ଏଲେଇଚେସି, "ନା଼ନୁ ବାରେ ବା଼ଡ଼୍‌ୟୁଗାଟି ମାହାପୂରୁତେଏଁ; ନୀନୁ ଦାର୍ମୁକାମା କିହାଁ ତୀର୍‌ପୁ ଡ଼ୟାମୁ। 2 ନା଼ନୁ ନୀ ତଲେ ନା଼ ରା଼ଜିମା଼ନା ତୀରି କିଇଁ ଅ଼ଡ଼େ ନିଙ୍ଗେ ହା଼ରେକା ଏ଼ପା କିୟାଇଁ।" 3 ଏଚେଟିଏ ଅବ୍ରାମ ମୁନୁ କୁତାହାଁ ଜହରା କିତେସି, ଅ଼ଡ଼େ ମାହାପୂରୁ ଏ଼ୱାଣାଇଁ ଏଲେଇଚେସି, 4 "ସିନିକିମୁ, ନା଼ନୁ ନୀ ତଲେ ରା଼ଜିମା଼ନା ତୀରି କିହିମାଇଁ, ଅ଼ଡ଼େ ନୀନୁ ହା଼ରେକା କୂଲୁତି ଆକୁ ଆ଼ଦି। 5 ନୀ ଦ଼ରୁ ଅବ୍ରାମ*17:5 କାଜା ତାଞ୍ଜି ଅ଼ଡ଼େ ଡ଼ୟେଏ, ସାମା ନୀ ଦ଼ରୁ ଅବ୍ରାହାମ*17:5 ହା଼ରେକା କୂଲୁତି ତାଞ୍ଜି ଆ଼ନେ; ଇଚିହିଁ ନା଼ନୁ ନିଙ୍ଗେ ହା଼ରେକା କୂଲୁତି ଆକୁ କିୟାତେଏଁ। 6 ନା଼ନୁ ନିଙ୍ଗେ ହା଼ରେକା ଏ଼ପା କିୟାଇଁ, ନୀ ତା଼ଣାଟି ହା଼ରେକା କୂଲୁତି ଜାର୍ନି କିଇଁ ଅ଼ଡ଼େ ରାଜାୟାଁଣି ହ଼ପ୍‌ଇଁ।"

7 "ନା଼ନୁ ନୀ ତଲେ ଇଞ୍ଜାଁ ୱା଼ନି ଦିନାତି ନୀ କୂଲୁତି ପା଼ଣାପା଼ଟୁ ତଲେ ଏମିନି ମେ଼ରା ତୀରି କିତେଏଁ, ଏ଼ଦି କା଼ଲେଏ ଡ଼ୟିନେ। ଏଚେଟିଏ ନା଼ନୁ ନୀ ୱା଼ନି ଦିନାତି କୂଲୁତି ଲ଼କୁ ଅ଼ଡ଼େ ନୀ ମାହାପୂରୁତେଏଁ ଆ଼ଇଁ। 8 ମୀରୁ ଆମିନି କିଣାନ ଦେ଼ସାତା ବାସା କିହିମାଞ୍ଜେରି, ଏ଼ ବାରେତି ନା଼ନୁ ନିଙ୍ଗେ ଅ଼ଡ଼େ ୱା଼ନି ଦିନାତି ନୀ କୂଲୁତି ଲ଼କୁକି କିଣାନ ଦେ଼ସା କା଼ଲେଏତି ଅଦିକାରା ତାକି ହିୟାଇଁ, ଅ଼ଡ଼େ ନା଼ନୁ ଏ଼ୱାରି ମାହାପୂରୁତେଏଁ ଆ଼ଇଁ।"

9 ମାହାପୂରୁ ଅବ୍ରାହାମଇଁ ଅ଼ଡ଼େ ଏଲେଇଚେସି, "ନୀନୁ ନା଼ ରା଼ଜିମା଼ନା ମା଼ନୱି ଆ଼ଦି; ନୀନୁ ଅ଼ଡ଼େ ନୀ ୱା଼ହିମାନି କୂଡ଼ାତି ଲ଼କୁ, ଆକୁ ଆ଼ବାୟାଁ ଲେକା ତଲେ ମା଼ନି କିଦେରି। 10 ନୀନୁ ଅ଼ଡ଼େ ନୀ ୱା଼ହିମାନି କୂଡ଼ା ତଲେ କିହାମାନି ନା଼ ଏମିନି ରା଼ଜିମା଼ନା ମୀରୁ ମା଼ନୱି ଆ଼ଦେରି ଏ଼ଦି ଈଦି, ମୀ ବାରେ ଆ଼ବାୟାଁ ତ଼ଲୁ ଦା଼ପି ଆ଼ନେରି। 11 ମୀରୁ ବାରେ ଆ଼ବାୟାଁ ଜାହାରା ତ଼ଲୁ ଦା଼ନାୟି ମାନେ; ଏ଼ଦି ମୀ ତଲେ ନା଼ ରା଼ଜିମା଼ନାତି ସିନା ଆ଼ନେ। 12 ଆକୁ ଆ଼ବାୟାଁ ଲେକା ତଲେ ମୀ ବାରେ ମୀର୍‌କା ଆ଼ଟା ଦିନା ବେ଼ଲାତା ତ଼ଲୁ ଦା଼ପି ଆ଼ନେରି। ଇଞ୍ଜାଁ ଆମିନି ଗାଟାରି ମୀ କୂଡ଼ା ଆ଼ଏ, ଇଲେତି ଏମିନି ଏଟ୍‌କା ରା଼ଜିତି ଲ଼କୁ ମୀ ଇଜ ଜାର୍ନା ଆ଼ହାମାନାରି ଆ଼ଆତିଁ ଟାକାୟାଁ ତଲେ କଡ୍‌ୱି ଆ଼ନେରି ଏ଼ୱାଣି ତ଼ଲୁ ଦା଼ନାୟି ମାନେ। 13 ଅ଼ଡ଼େ, ମୀ ଇଲୁତା ଜାର୍ନା ଆ଼ତାରି କି ଟାକାୟାଁ ତଲେ କଡ୍‌ୱି ଆ଼ତି ଲ଼କୁତି ତ଼ଲୁ ଦା଼ପି ଆ଼ନାୟି ଲ଼ଡ଼ା ମାନେ; ଏଚେଟିଏ କା଼ଲେଏ ତାକି ମୀ ଆଙ୍ଗାତା ନା଼ ରା଼ଜିମା଼ନାତି ସିନା ଡ଼ୟିନେ। 14 ସାମା ଆମ୍ବାଆରି ତ଼ଲୁ ଦା଼ପି ଆ଼ଏ, ଇଲେତି ଆମିନି ତ଼ଲୁ ଦା଼ପିଆ଼ଆତି ଆ଼ବାଟି, ଏ଼ୱାସି ଜାହାରା ଲ଼କୁ ତା଼ଣାଟି ଏଟ୍‌କା ଆ଼ନେସି; ଇଚିହିଁ ଏ଼ୱାସି ମା଼ ରା଼ଜିମା଼ନା ଊରାମାନେସି।"

ଇସାହାକ ଜାର୍ନାତି ଆ଼ଞ୍ଜିନାୟି

15 ଏଚେଟିଏ ମାହାପୂରୁ ଅବ୍ରାହାମଇଁ ଏଲେଇଚେସି, "ନୀନୁ ନୀ ଡକ୍ରି ସାରିନି ଅ଼ଡ଼େ ସାରି*17:15 ହୀଣି ଗାଟାୟି ଇଞ୍ଜିହିଁ ହା଼ଟାଆନି; ତାନି ଦ଼ରୁ ସାରା*17:15 ହା଼ରେକା ଲ଼କୁତି ତାଲି ଆ଼ତେ। 16 ନା଼ନୁ ଏ଼ଦାନାକି ବ଼ର ହୀଇଁ, ଅ଼ଡ଼େ ଏ଼ଦାନି ତା଼ଣାଟି ନିଙ୍ଗେ ର଼ ମୀର୍‌ଏଣାଇଁ ହିୟାଇଁ, ନା଼ନୁ ଏ଼ଦାନି ବ଼ର ହୀଇଁ, ଇଞ୍ଜାଁ ଏ଼ଦି ହା଼ରେକା କୂଡ଼ାତି ତାଲି ଆ଼ନେ, ତାନି କୂଡ଼ାଟି ରାଜାୟାଁ ହ଼ନେରି।"

17 ଏଚିବେ଼ଲା ଅବ୍ରାହାମ ମୁନୁ କୁତାହାଁ କାକ୍‌ହେସି ଇଞ୍ଜାଁ ମ଼ନ ମ଼ନତା ଏଲେଇଚେସି, "ର଼ ଆ଼ବାତି ପା଼ସା କ଼ଡ଼ି ବାର୍ସା ବେ଼ଲାତାକି କକାସି ଜାର୍ନା ଆ଼ନେସି ? ସା଼ରି କ଼ଡ଼ି ଦସ ବାର୍ସାତି ସାରା ଜାର୍ନି କିନେ ?" 18 ଏଚେଟିଏ ଅବ୍ରାହାମ ମାହାପୂରୁଇଁ ଏଲେଇଚେସି, "ଇସ୍‌ମାୟେଲ ନୀ ନ଼କିତା ନୀଡା ମାନାପେସି ?"

19 ଏଚିବେ଼ଲା ମାହାପୂରୁ ଏଲେଇଚେସି, "ନୀ ଡକ୍ରି ସାରା ନିଙ୍ଗ ତାକି କକାଣାଇଁ ଜାର୍ନି କିନେ, ଇଞ୍ଜାଁ ନୀନୁ ଏ଼ୱାଣି ଦ଼ରୁ ଇସାହାକ ଇଞ୍ଜିଁ ଇଟିଦି, ଇଞ୍ଜାଁ ନା଼ନୁ ଏ଼ୱାଣି ତଲେ ରା଼ଜିମା଼ନା ତୀରି କିଇଁ; ଏ଼ଦି ଏ଼ୱାଣି ୱା଼ହିମାନି କୂଡ଼ା ତାକି କା଼ଲେଏତି ରା଼ଜିମା଼ନା ଆ଼ନେ। 20 ଇସ୍‌ମାୟେଲ ତାକି ନୀ ପ୍ରା଼ତାନା ୱେଚେଏଁ, ମେହ୍‌ମୁ ନା଼ନୁ ଏ଼ୱାଣାଇଁ ବ଼ର ହୀଇଁ ଅ଼ଡ଼େ ହା଼ରେକା କୂଲୁ ଏ଼ପି କିହାଁ, ଏ଼ୱାଣି କୂଲୁ ପାଡିକିଇଁ; ଏ଼ୱାଣି ତା଼ଣାଟି ବା଼ର ଜା଼ଣା ରାଜାୟାଁ ଜାର୍ନା ଆ଼ନେରି, ଅ଼ଡ଼େ ନା଼ନୁ ଏ଼ୱାଣି କୂଲୁତି ଲ଼କୁଣି ପାଡିକିଇଁ। 21 ସାମା ୱା଼ନି ବାର୍ସା ଈ କା଼ଲମିତା ସାରା ପୂରାମା଼ସା ଆ଼ହାଁ ଏମିନି ଇସାହାକଇଁ ଜାର୍ନା କିନେ, ଏ଼ୱାଣି ତଲେ ନା଼ନୁ ନା଼ ରା଼ଜିମା଼ନା ତୀରି କିଇଁ।" 22 ଇଲେକିହିଁ କାତା ଆ଼ତି ଡା଼ୟୁ ମାହାପୂରୁ ଅବ୍ରାହାମ ତା଼ଣାଟି ହାଚେସି।

23 ଏଚେଟିଏ ତାନି ମୀର୍‌ଏସି ଇସ୍‌ମାୟେଲଇଁ ଅ଼ଡ଼େ ଇଜ ଜାର୍ନା ଆ଼ତାରାଇଁ ଅ଼ଡ଼େ ଟାକାୟାଁ ତଲେ କଡାମାନି ବାରେତି ଇଚିହିଁ ଅବ୍ରାହାମ ଇଲୁତା ମାନି ବାରେ ଆ଼ବାୟାଁଣି ଅ଼ହାଁ ମାହାପୂରୁ ହୁକୁମି ତଲେ ଏ଼ ଦିନା ବାରେତି ତ଼ଲୁ ଦା଼ତେସି। 24 ଅବ୍ରାହାମକି ସା଼ରି କ଼ଡ଼ି ଅଣେସି ବାର୍ସା ବେ଼ଲାତା ତ଼ଲୁ ଦା଼ପି ଆ଼ତେସି। 25 ତାନି ମୀର୍‌ଏସି ଇସ୍‌ମାୟେଲ ତେ଼ର ବାର୍ସା ଆ଼ହାମାଚାଟି ତ଼ଲୁ ଦା଼ପି ଆ଼ତେ। 26 ଇଲେକିଁ ରଣ୍ତିଏ ଦିନା ଅବ୍ରାହାମ ଅ଼ଡ଼େ ତାନି ମୀର୍‌ଏସି ଇସ୍‌ମାୟେଲ ତ଼ଲୁ ଦା଼ପି ଆ଼ତେ। 27 ଇଞ୍ଜାଁ ତାନି ଇଜ ଜାର୍ନା ଆ଼ତି ଏଟ୍‌କା ଦେ଼ସାଟି ଟାକାୟାଁ ତଲେ କଡାମାନି ତାନି ଇଲୁତି ବାରେ ଆ଼ବାୟାଁ ତ଼ଲୁ ଦା଼ପି ଆ଼ତେରି।