ଅବ୍ରାହାମଇଁ ତାୟିପାରି କିନାୟି
1 ଏ଼ ବାରେ ଆ଼ତି ଡା଼ୟୁ ମାହାପୂରୁ ଅବ୍ରାହାମ ନାମୁତି ତାୟିପାରି କିହାଲି ହା଼ଟିତେସି, "ହେ଼ ଅବ୍ରାହାମ" ଏଚେଟିଏ ଅବ୍ରାହାମ ଏଲେଇଚେସି, "ମେହ୍ମୁ ନା଼ନୁ ଇମ୍ବାଆଁ ମାଇଁ।"
2 ଏଚିବେ଼ଲା ମାହାପୂରୁ ଏଲେଇଚେସି, "ନୀନୁ ନୀଏଁ ନୀ ମୀର୍ଏଣାଇଁ, ନୀ ରଣ୍ତିଏ ମୀର୍ଏଣାଇଁ, ଆମ୍ବାଆରାଇଁ ନୀନୁ ହା଼ରେକା ଜୀୱୁ ନ଼ହିମାଞ୍ଜି, ଏ଼ ଇସାହାକଇଁ ଅ଼ହିଁ ମରିୟା ଦେ଼ସାତା ହାଲାମୁ; ଇଞ୍ଜାଁ ନା଼ନୁ ଏ଼ ଦେ଼ସାତା ଏମିନି ହ଼ରୁ ତ଼ସ୍ତାଇଁ, ଏ଼ ହ଼ରୁ ଲାକ ଏ଼ୱାଣାଇଁ ହିଚୁତା ହୂଡିନି ପୂଜା ହେର୍ପାମୁ।"
3 ଏଚେଟିଏ ଅବ୍ରାହାମ ଲା଼ଇ ନିଙ୍ଗାହାଁ ଗା଼ଡ଼୍ଦେ ଲାକ ଆ଼ସ୍ତି ଏକ୍ହାଁ ରୀ ହ଼ଲିୟାଙ୍ଗା ଅ଼ଡ଼େ ତାନି ମୀର୍ଏସି ଇସାହାକଇଁ ଅ଼ହିଁ ହାଚେସି, ଅ଼ଡ଼େ ହିଚୁତା ହୂଡିନି ପୂଜା ତାକି ୱେସ୍କା ଟୂଣ୍ହାଁ ମାହାପୂରୁ ୱେସ୍ତି ଟା଼ୟୁତା ହାଚେରି। 4 ଏଚେଟିଏ ତୀନି ଦିନା ଡା଼ୟୁ ଅବ୍ରାହାମ ହେକଟି ଏ଼ ଟା଼ୟୁ ମେସ୍ତେସି। 5 ଏଚିବେ଼ଲା ଅବ୍ରାହାମ ହ଼ଲିୟାଙ୍ଗାଣି ଏଲେଇଚେସି, "ମୀରୁ ଇମ୍ବାଆଁ ଗା଼ଡ଼୍ଦେ ତଲେ ଡ଼ୟାଦୁ, ନା଼ନୁ ଅ଼ଡ଼େ ଇସାହାକ ରିଆତମି ହାଜାହାଁ ଜହରା ପ୍ରା଼ତାନା କିହାଁ ମୀ ତା଼ଣା ୱେଣ୍ତାୱାନମି।"
6 ଏଚେଟିଏ ଅବ୍ରାହାମ ପୂଜା ହିଚୁତା ହୂଡିନି ୱେସ୍କା ତାନି ମୀର୍ଏସି ଇସାହାକ ବମିତା ଡେ଼କି କିହାଁ ତାନି କେୟୁତା ହିଚୁ ଅ଼ଡ଼େ ସୂରି ଆସ୍ତେସି, ଅ଼ଡ଼େ, ରିଆରି ରହେଁଏ ହାଚେରି। 7 ଏଚେଟିଏ ଇସାହାକ ତାମି ଆ଼ବା ଅବ୍ରାହାମଇଁ ହା଼ଟାହାଁ ଏଲେଇଚେସି, "ହେ଼ ଆ଼ବା।" ଏଚେଟିଏ ଏ଼ୱାସି ଏଲେଇଚେସି, "ମୀର୍ଏଣା ମେହ୍ମୁ ନା଼ନୁ ଇମ୍ବାଆଁ ମାଇଁ।" ଇସାହାକ ୱେଚେସି, "ହିଚୁ ଅ଼ଡ଼େ ୱେସ୍କା ମାନୁ, ସାମା ହିଚୁତା ହୂଡିନି ପୂଜା ହେର୍ପାଲି ତାକି ମେ଼ଣ୍ତା ଡା଼ଲୁ ଆମ୍ବିୟା ?"
8 ଏଚେଟିଏ ଅବ୍ରାହାମ ଏଲେଇଚେସି, "ମୀର୍ଏଣା ମାହାପୂରୁ ତା଼ନୁଏ ହିଚୁତା ହୂଡିନି ପୂଜା ତାକି ମେ଼ଣ୍ତା ଡା଼ଲୁ ମେଡ଼ି କିୟାନେସି।" ଏଚେଟିଏ ରିଆରି ରହେଁଏ ହାଚେରି।
9 ମାହାପୂରୁତି ୱେସ୍ତି ଟା଼ୟୁତା ଏଜାଲିଏ, ଅବ୍ରାହାମ ର଼ ପୂଜାପିଣ୍ତା କେ଼ପିତେସି ଅ଼ଡ଼େ ତାନି ଲାକ ୱେସ୍କା ନେହିକିଁ ଇଟାହାଁ ତାନି ମୀର୍ଏସି ଇସାହାକଇଁ ଦସାହାଁ ୱେସ୍କା ଲାକ ତ୍ରିପ୍ହେସି। 10 ଏଚେଟିଏ ଅବ୍ରାହାମ କେୟୁ ପେର୍ହାଁ ମୀର୍ଏଣାଇଁ ପା଼ୟାଲି ସୂରି ଆସ୍ତେସି। 11 ଏଚିବେ଼ଲାତା ହା଼ଗୁଲାକଟି ମାହାପୂରୁତି ଦୂତୁ ହା଼ଟାହାଁ ଏଲେଇଚେ, "ଅବ୍ରାହାମ, ଅବ୍ରାହାମ!" ଏଚେଟିଏ ଏ଼ୱାସି ଏଲେଇଚେସି, "ମେହ୍ମୁ ନା଼ନୁ ଇମ୍ବାଆଁ ମାଇଁ।"
12 ଦୂତୁ ଏଲେଇଚେ, "ଏ଼ କକାଣି ଲାକ ନୀ କେୟୁ ପେର୍ଆନି, ଅ଼ଡ଼େ ଏ଼ୱାଣାଇଁ ଏ଼ନାଆଁ କିଆନି; ଇଚିହିଁ ମାହାପୂରୁତି ଆଜି ନୀ ତା଼ଣା ମାନେ, ଈଦାଆଁ ନୀଏଁ ନା଼ନୁ ତେଲ୍ହିତେଏଁ; ଇଚିହିଁ ନୀନୁ ନୀ ରଣ୍ତିଏ ମୀର୍ଏଣାଇଁ ନାଙ୍ଗେ ହୀହାଲି କୂଉଁ ଇନାଆତି।"
13 ଏଚିବେ଼ଲା ଅବ୍ରାହାମ ଡା଼ୟୁୱାକି ସିନିକିହାଲିଏ ବକ୍ଡ଼ା ମେ଼ଣ୍ତା ଦୁପାତା କମ୍କା ଆଲ୍ୱି ଆ଼ହାମାଚେ। ଏଚେଟିଏ ଅବ୍ରାହାମ ହାଜାହାଁ ଏ଼ଦାନି ତାଚାହାଁ ତାନି ମୀର୍ଏଣି ବାଦୁଲି ହିଚୁତା ହୂଡିନି ପୂଜା ହେର୍ପିତେସି। 14 ଇଞ୍ଜାଁ ଅବ୍ରାହାମ ଏ଼ ଟା଼ୟୁତି ଦ଼ରୁ "ଜିହବା ଜିରି22:14 ପ୍ରବୁ ହୀନାସି" ଇଟିତେସି। ଏ଼ଦାଆଁତାକି ଲ଼କୁ ନୀଏଁ ଜିକେଏ ଏଲେଇନେରି, ହ଼ରୁତା ପ୍ରବୁ ଲ଼ଡ଼ାମାନାଣି ହୀନେସି।
15 ଅ଼ଡ଼େ ପ୍ରବୁତି ଦୂତୁ ହା଼ଗୁଲାକଟି ଅ଼ଡ଼େ ୱେଣ୍ତେ ଅବ୍ରାହାମଇଁ ହା଼ଟାହାଁ ଏଲେଇଚେସି, 16 "ପ୍ରବୁ ଏଲେଇଞ୍ଜି ମାନେସି, ନୀନୁ ନୀ ରଣ୍ତିଏ ମୀର୍ଏଣାଇଁ ନାଙ୍ଗେ ହୀହାଲି କୂଉଁ ଇନାଆତି; 17 ନୀ ଈ କାମାତାକି ନା଼ନୁ ନା଼ ଦ଼ରୁ ତଲେ ପାର୍ମାଣା କିହାଁ ୱେସିମାଞ୍ଜାଇଁ, ନା଼ନୁ ନିଙ୍ଗେ ସାତେଏ ବ଼ର ହୀହାଁ ହା଼ଗୁତି ହୁକାୟାଁ ଅ଼ଡ଼େ ସାମ୍ଦୁରିତି ବାଃଲି ଲେହେଁ ନୀ କୂଡ଼ାତି ହା଼ରେକା ଏ଼ପି କିଇଁ। ନୀ କୂଡ଼ା ସାତ୍ରୁତି ଗା଼ଡ଼ାତି ଅଦିକାରା କିନେରି। 18 ଇଞ୍ଜାଁ ଦାର୍ତିତି ବାରେ ଜା଼ତି ନୀ କୂଡ଼ାଟି ବ଼ର ବେଟାଆ଼ନେରି; ଇଚିହିଁ ନୀନୁ ନା଼ ବାରେ କାତା ମା଼ନୱି ଆ଼ହାମାଞ୍ଜି।" 19 ଏଚେଟିଏ ଅବ୍ରାହାମ ତାନି ହ଼ଲିୟାଙ୍ଗା ତା଼ଣା ୱେଣ୍ତା ହାଚେସି, ଅ଼ଡ଼େ ଏ଼ୱାରି ବାରେ ବେର୍ସେବାତା ହାଚେରି, ଅ଼ଡ଼େ ଅବ୍ରାହାମ ବେର୍ସେବାତା ଡ଼ୟିତେସି।
ନାହ଼ରତି କୂଡ଼ା
20 ଏଚର ଦିନା ଆ଼ତି ଡା଼ୟୁ ଅବ୍ରାହାମକି କାବ୍ରୁ ୱା଼ତେ, "ୱେନାମୁ, ମିଲ୍କା ଜିକେଏ ନାହ଼ରକି ମୀର୍କା ମା଼ସ୍କାଣି ଜାର୍ନି କିହାମାନେ। 21 ତାନି ପା଼ଣ୍ୱା ମୀର୍ଏସି ଊସ୍ ଅ଼ଡ଼େ ତାନି ତାୟି ବୂସ୍, ଅରାମ୍ତି ତାଞ୍ଜି କମୁୟେଲ, 22 ଇଞ୍ଜାଁ କେସଦ୍, ହସ, ପିଲଦସ୍, ଜିଦ୍ଲପ୍ ଅ଼ଡ଼େ ବତୁୟେଲ।" 23 ଏ଼ ବତୁୟେଲ ମା଼ଙ୍ଗା ରିବିକା। ଅବ୍ରାହାମତି ତାୟି, ନାହ଼ରକି ମିଲ୍କା ଈ ଆ଼ଟା ଜା଼ଣାଇଁ ଜାର୍ନା କିତେ। 24 ଅ଼ଡ଼େ ନାହ଼ରତି ରୁମା ଇନି ଅ଼ର ଡକ୍ରି ତା଼ଣାଟି ଟେବହ, ଗହମ୍, ତହସ୍ ଅ଼ଡ଼େ ମାକା, ଈୱାରି ଜାର୍ନା ଆ଼ତେରି।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)