18 Ini ya nya-imoꞌ dun ni pagka͡utaw ni Jisu-Kristu: Ya ina nan si Maria na tawas ni José. Manang sa walaꞌ pa silan pag-ipid, kya-ede-an da ni Maria na nyabdes sakanan magi sa Ispiritu Santo. 19 Na, si José gayed sakanan dyumalug sa Uldin na manga Judiyu.*1:19 Ya Uldin, yan ya manga suguꞌ na Tyumanem sa manga utaw na Isra-él. Aw awun uman suguꞌ dun kun unu ya imo-un adti ka͡ubayan na bagu nyangugnan na migkasala-enen adti eped na eseg. Mabasa adti Déutéronomiyo 22:23-24. Aw diliꞌ sakanan malim na mulamula͡en ya tawas nan adti asdangan na manga utaw. Yanagaw migpalpa sakanan na atagan nan na papilis sa pag-ayaw na walaꞌ ya utaw na maka-edeꞌ. 20 Manang sa gayed pa nan yeiy pig-anenganeng, awun anghil na Tyumanem na migpakitaꞌ kanan magi sa tagaynep aw law nan, "We… José na buwadbuwad ni Dabid. Diliꞌ kaw magduwaduwa magpanga͡ubayan kan Maria. Kay ya pagkabdes nan, magi saba sa Ispiritu Santo. 21 Aw ka͡utawan sakanan sa iseꞌ na eseg. Aw ngalanan mu ya iseꞌ na ‘Jisus’ kay un nan paluwa-en ya kanan manga utaw lekat adti manga salaꞌ nilan."