Luka 2

Jesu unopilwa muTempeli

22 Unshaji wakaswika wokushampulujwa kwaJosefa naMariya, kutobelejwa mulawo waMozesi. Bakombuza kuJelusalema kuti epilwe kunaShe, 23 sezwilokwalwa mumulawo waShe kuti, "Mwananhulumyana wose wotanga ulokwelela kuwhi unchena kunaTezi." 24 Nokupila umpilo kutobelejwa zwilolebwa mumulawo waShe, injiba imbili kana inyunyana jenkwilimba imbili.

25 Kwakaba kuli nonhulume muJelusalema waluwhi ndiSimiyoni. Unhulume yoyu wakaba ekalulama etya Mwali, ekamilila kunyalajwa kweIzilayeli, noMpepo uNchena wakaba uli mwaali. 26 Wakaba atondejwa noMpepo uNchena kuti aatoofa asanu abona She Kristo. 27 Wakatungamililwa noMpepo engwina mutempeli, bazwali pabakabuza mwana Jesu, kuti etiwe sezwinotiwa mumulawo, 28 wakontola mumaboko awe, akakuja Mwali eti:

29 "She feno mungata kuti undanda

wenu ende mulunyalalo sokubimbisa kwenu,

30 nokuti mesho angu abona luchijo lwenu,

31 lumwakabamba mumesho abanhu bose,

32 ndiwo mwenje wokumunikila bokuzhe,

nolukujo lwabanhu benu baIzilayeli."

33 Tate naamai babe bechakashamiswa nezwo zwakabelebwa nezwizwe, 34 Simiyoni wakabakombolela akati kuna amai babe Mariya, "Ilingani yoyu mwana ulomilila kuwila pasi nokumuka kwabanji muIzilayeli, akale ndiye chitondejelo chichalebelekwa bubi nezwacho 35 akale igwalabaza linoobhaya umpepo wenu, kutila zwimuyeywa mumyoyo yabanji zwitondejelwe pachena."

36 Kwakaba kuli naAna umpolofeti wechinhukaji, mwananhukajana waFanuwelu, woluji lwaAsha, wakaba akwegula, wakabagala nondume uwe kwamakole mashanu ana mabili kuva kubumhandala bubwe, 37 akaba inchilikaji inamakole makumi mashanu ana makumi matatu namakole mana. Aajakabebhuda muTempeli, ekuja nokuzwiminya kulya, akale enamata busiku namasikati. 38 Eswika panoyo unshaji, wakaboka Mwali, akale wakalebeleka nezwizwe kuna ibo bose bakabemilila kuchijwa kweJelusalema.