Mako 5

Jesu unochilisa unhulume unampepo umbi

1 Bakavubukila museli lyegungwa, munyika yamaGenesaleti. 2 Ebhuluka chete mubwato, pakalepo wakashangana nonhulume wakabebhuda kumakumbu eli nompepo umbi, 3 yoyu unhulume wakabegala kumakumbu, apana unhu wakabetubula kunsunga, kana namaketani; 4 nokuti wakabesungwa kanjinji neminchili namaketani, asi wakabesupula maketani, minchili edubula zwibhimpi zwibhimpi; apana kana umwempela unhu waluntubula. 5 Busiku namasikati walusowanika kumakumbu nomumatunhu ekwiila elikumuzwicheka namabwe.

6 Paakabona Jesu echikule, wakalabukila kwaali akonkuja; 7 wakashomeja newhi lipo pezhulu akati, "Jesu mwana waMwali uPezhuluzhulu uneni nami? Ndakubweta muzina lyaMwali kuti usindishetese" 8 Nokuti iye wakati kwaali, "Iwi mpepo umbi bhuda munhu yoyu."

9 Jesu wakombhuza kuti, "Izina lilyo ndiwi ani?" Wakashandula eti "Izina lyangu ndimi Legiyoni, nokuti tibanji" 10 Wakombweta ekumbila kuti esiyibhise muneyo inyika. 11 Kwakabeli nedanga lyengulube jakabechela mudako lyedunhu, 12 mipepo mibi yakonkumbila iteteja, iti, "Tisengeni mungulube, tingwine munaijo." 13 Nokudalo wakaivumila. Mipepo mibi yakabhuda ikanongwina mungulube; idanga lyose, jakabeswika kuzwiulu zwibili, lyakalabuka namasimba likashotoka pebhilipili lingwina mugungwa jikanwila ndondwe mugungwa.

14 Balyisi bakatizha, bakabuja banhu muguta, nomumisha. Luvute lwabanhu lwakenda kunobona zwakatikana. 15 Bakezha kunaJesu, bakabona unhu wakabeli nemipepo mibi minji, eligele zwanana akale akambala, indangalilo jije jili pamwempela; ibo bakatya. 16 Ibo bakabona zwitikana bakababuja muzwakatikanila kunoyo wakabeli nemipepo mibi, nezwakatikana kungulube.

17 Bakonteteja Jesu kuti ebhude mubugalo bwabo.

18 Paakabengwina mubwato, yoyo wakabeli nemipepo mibi wakakumbilisisa kuna iye kuti ebe naye.

19 Koga aajakomvumila, akati kwaali, "Inda kusha kuko kubakwaina babo unobabuja zwawatilwa naShe, nokuti wakuwhila ishe chini."

20 Wakenda akatanga kubuja banhu muDikapolisi, zwakatilwa naJesu, bose bakachenama.