Marcos 5

Mwananhukajana waJailosi nonhukaji wakaguma ishashiko yaJesu

21 Jesu paakataluka igungwa ebwilila museli eli mubwato, kwakezha kwaali ibunga lyabanhu; iye wakabeli kumbali kwegugwa. 22 Umwe wabatungamili besinagogi, izina lilye ndiJayilosi, paakabona Jesu wakawila kumakumbo awe, 23 Wakombweta eteteja eti, "Mwananhukajana wangu umulwalila kufa. Izhani mumbige maboko enu pezhulu pape, kutila kuti echile ebe nobupenyu."

24 Wakenda naye, ibunga lyabanhu lyakontobela liunsundikija.

25 Kwakabeli nonhukaji wakabeli nobulwaji bwokubhuda ilopa kwamakole igumi linamabili, 26 wakabahetela nokulapwa nabalapi banji, ashingisa yose ifuma yiye koga azwijakombancha chinhu, asi bulwaji bwakakubuka. 27 Wakati awha nozwaJesu, akezha nokushule kukwe mubuta lyabanhu akabhata zwimbalo zwizwe. 28 Wakati, "Ndingobhata chete zwimbalo zwizwe, ndochila."

29 Pakalepo ilopa lyakama; iye akawha mumbili uwe kuti wachijwa. 30 Pakalepo Jesu wakaziba kuti isimba lyabhuda mwaali, wakachingunuka kubuta lyabanhu, akati, "Ndiyani wabhata zwimbalo zwangu? "

31 Balayijwa babe bakati kwaali, "Mubweni luvute lwabanhu lulimusundikijana pamuli, kova mubhuza kuti ndiyani wandiguma? "

32 Wakalingalinga kuti ebone kuti ndiyani wombata. 33 Wechinhukaji, noluzibo kuti ini zwatikana kwaali, wakezha eli nolutyo eluluma akawila mbeli kwaJesu akombuja ichokomende lyose. 34 Wakati kunaiye, "Mwananhukajana, kudimbwa kuko kwakuchija; inda mulunyalalo wachila mubulwaji bubo."

35 Echinolebeleka, kwakaswika bakava kungumba yonkulwana wesinagogi, bakati "Mwananhukajana wenu washayika. Muchinonyajilani undayiji?"

36 Jesu paakawha zwakalebwa wakati kunkulwana wesinagogi, "Usitye koga dimbwa chete." 37 Aajakavumila bamwe kuzhe kwaPita, Jemusi naJoni wanozwalwa naye kuti bontobele. 38 Paakaswika pengumba yonkululwana wesinagogi wakabona idupwa lyabanhu lita izhoba, nokukwiila kasa. 39 Paakangwina mukati wakati kwabali, "Igwilakwila ngilyeni? Mwananhukajana yoyu ulele aajafa."

40 Bakonseka. Wakababhisila pazhe, akatola tate naamai bomwana naabo bakabekwenda naye bakangwina mumba mwakabelilele mwana. 41 Wakabhata luboko lwomwananhukajana akati kwaali, "Talita Kumi" Zwingoshandulwa zwinoleba kuti " Nsichana ndinoti kwauli imuka."

42 Pakalepo mwanansichana wakamuka akakwenda, (wakabeli namakole igumi namabili) bakashama zwikulugulu. 43 Wakabalayila nesimba kuti zwisizibikane zwatikana akababuja kuti bompe zwokulya.