1 Aɓalǝ anonggio mǝno ka, Hezekiya nongkwánó mǝnana ue bǝti ɓǝ́ wuna ka. Ishaya mǝɓangnǝa muna-ɓwabura mala Amoz yiu abaní, banggi wi ama, <<Yahweh kǝ na ama, <Tsǝk agir a kǝkarì a ɓala mò, acemǝnana a ndo awu nǝ wǔ, a pà nǝ au ɗàng.> >> 2 Pǝlǝa Hezekiya pǝlǝ ɓamǝsǝi arǝ bumkurǝm sǝ pakhiwi aban Yahweh ama, 3 <<Yahweh, mǝ ndaban zǝmbo, ɗenyinǝ gya mem mǝnana ǝn gya aɓadǝmbo aɓa mǝsǝcau andǝ ɓabumam kat ka, sǝ wu ɗenyi ama ǝn pangŋǝ̀nà gìr mǝnana mǝɓoarne na a mǝsǝo ka.>> Sǝ Hezekiya ɓua, ɓua mǝkwanbani.

4 Ishaya na piu a tsùrú mala patal mala ɓala-murǝm sǝ cau mala Yahweh yiu abaní ama, 5 <<Nyare kya banggi Hezekiya, múrû amur aɓwana mem ama, <Mǝnia ka nda cau mǝnana Yahweh Ɓakuli mala keò Dauda kǝ na ka: Ən ongŋǝna zǝmba mô, sǝ ǝn sǝnǝna mǝrǝm mô mǝnana a sukki ka. Mǝ nǝ twalôban rǝkwana mò. Anzǝm nongŋo ɓari tite yalung ngga, awu nǝ loapi kala, awu nǝ ká peri a ɓala mala Yahweh. 6 Mǝ nǝ tsǝkô aɓea apǝlǝa lum-bwamdǝ-tongno (15) amur anonggio mala do-yilǝmu mô. Sǝ mǝ nǝ amsǝo wunǝ nggea-là mǝnia ka a ɓabu murǝm mala Assuriya. Mǝ nǝ zǝ̀kì nggea-là mǝnia ka ace gulo mem, sǝ atàcau mala guro mem Dauda.> >>

7 Pǝlǝa Ishaya banggi amǝtúró-ɓadǝm murǝm ama, <<Wu betǝki ɓǝla vwari, sǝ wu lanzǝi wi amur ceakúmsǝǎm, ace mǝnana ɓǝ̀ sonzǝ ka.>>

8 Pǝlǝa Hezekiya ɗì Ishaya ama, <<Ya gìr’lǝmdǝa na mǝnana nǝ̀ lǝmdǝ ama Yahweh nǝ̀ twàlâm-ban rǝkwana man, mǝ nǝ loapi kala anzǝm nongŋo ɓari, tite yalung, sǝ mǝ nǝ ká peri a ɓala mala Yahweh ka?>> 9 Ishaya eari wi ama, <<Mǝnia ka nda gìr’lǝmdǝa mǝnana Yahweh kǝ po ace lǝmdǝò ama, Yahweh nǝ̀ pàk gìr mǝnana pàcau ace ka. A kǝ earce ama yilǝm ɓǝ̀ sung a dǝmba twalkusǝu lum le, ko ɓǝ̀ nyar nǝte twalkusǝu lum?>> 10 Hezekiya ear ama, <<Nda halku ɓǝ̀ yilǝm sung a dǝmba twalkusǝu lum; a kún mani ka, ɓǝ̀ nyar nǝte twalkusǝu lum.>> 11 Nda Ishaya mǝɓangnǝa pakhiwi aban Yahweh, sǝ Yahweh tsǝa yilǝm nyar nǝte twalkusǝu lum, amur ban-eauwe mala Ahaz ka.

12 A bàkú mǝno ka, Merodak-Baladan muna-ɓwabura mala Baladan, murǝm mala Babila, túrban nǝ acautera andǝ ɓoro aban Hezekiya nǝ bu amǝ’na-túrbân, acemǝnana ok ama Hezekiya nongkwánó ka. 13 Hezekiya gingsǝia. Pǝlǝa lǝmdǝia wia agir mǝnana kat à nda aɓalǝ andà-tsǝk agir-ɓoarna male ka; bolo-azǝrfa, andǝ bolo-njengǝlan, andǝ agir-mǝ’kuskushi, andǝ mùrú olif mǝrǝmɓoarne. Ɗǝm ngga warinǝia à kya sǝn agir-munǝo male, andǝ koya gìrɓoarna mǝnana kat a ɓala-murǝm ngga. Kǝgir pà kàm a ɓala male, ko aɓa nzali-murǝm male mǝnana Hezekiya lǝmdǝia wia raka ɗàng.

14 Pǝlǝa Ishaya mǝɓangnǝa yiu aban Murǝm Hezekiya, sǝ ɗì ama, <<Aburana mǝnia ka à pur aya ban sǝ à yiu? Mana aburane banggo?>> Hezekiya eari wi ama, <<À pur a ɓè nzali kuko, a Babila.>>

15 Ishaya ɗì ɗǝm ama, <<Mana à sǝni a palta mô?>> Hezekiya eari wi ama, <<À sǝna koman kat a palta mem. Koman mǝnana kat nda aɓalǝ andà-tsǝk agir-ɓoarna mem ngga, ǝn lǝmdǝia wia.>>

16 Pǝlǝa Ishaya banggi wi ama, <<Kwakikiro, ok cau mala Yahweh, 17 <Mbak-kàngkàng, pwari na kǝ yiu ka, mǝnana koman kat mana nda aɓa palta mô, andǝ agir mǝnana kat akeô rambia, twal a pwarian yi pur ado ka, à nǝ̀ pwania à nǝ̀ umnǝia a Babila. Kǝgir pà kàm à nǝ̀ nyi ɗàng. Mim Yahweh, mǝ nǝ̀ na. 18 Aɓea amuna-burana mô mǝnana à nǝ̀ ɓǝlô wia ka, à nǝ̀ pwania à nǝ̀ umnǝia arǝò, à nǝ̀ nggá pǝlǝ abedǝran andǝ amǝtúró-ɓadǝm murǝm mala Babila a palta male.> >>

19 Pǝlǝa Hezekiya banggi Ishaya ama, <<Cau mala Yahweh mǝnana a bangŋi ka, mǝɓoarne na.>> Hezekiya bang mǝno acemǝnana aɓa ɗenyicau male ka, nda rǝ na ama, <<Ko ɓǝ̀ mǝno kumban ngga, do-rǝpwala andǝ gbàshá nǝ̀ pà a do-yilǝmu mem!>>

20 Acili agir mǝnana à kumban a do-bunomurǝm mala Hezekiya andǝ atúró mǝnana kat pàkkia aɓa rǝcandǝa male, andǝ ɓah mǝnana ɓàk gǝndǝli-mùr andǝ myalmur’tǝtanzali mǝnana tǝmi ace yinǝ mùr aɓa nggea-là ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda. 21 Hezekiya yi wú atà akê, sǝ muna-ɓwabura male Manasa ak bancame male kǝla murǝm.