1 Tigsas mohohole van hiy ige lililwo Tisrael a lavap tēngeg. Kē wo, "Net vitwag mak nētqē ne gayga vitwag ōl so krēp (a kēy akak nawaen aē en). Tō kēy megeay walēg goy, ba migil naqyan̄ vitwag so niqōs managnag nēwe krēp aē, tō nēglēn nivan me nawaen ēgēn. Ba net nan mētēy kal se nēm̄ vitwag veg ige betetgoy tēqē so tog aē. Tō me atgiy, kē mōm̄ōk yatkel et lētqē nen so kēy mugumgu aē. Mahē nēkrēp so nimta en̄, kēy lepyak nonon tekelgi wa nonoy tekelgi. Tō me atgiy en, net nan nivan ba tatal lepnō tegha ēgēn. 2 Mahē a nēwe krēp memta en, net benon tēqē nivētleg me net bemgumgu mamah nonon vitwag hiy ige etetgoy tēqē en, so kēy lep tekel krēp me hiy kē. 3 Ba kēy hatig hag nen, tō tēy kē, lem̄eh kē, tō vētleg lok kē. Ba kēy et lep te hap te van hiy kē. 4 Tō welan nivētleg lokse me net nonon vitwag se, ba kēy malam̄ metewot nēqtēn, ba mak hiy kē a nehet. 5 Tō net benon tēqē mēvētleg lokse net vitwag nonon se, tō kēy wuh mat kē. Yatkel et nonon se a nam̄adeg, ba kēy mak hiy kēy a nehet. Yatkelgi kēy melm̄elm̄eh kēy ba yatkelgi kēy muwuh matmat kēy. 6 Ba net nonon togoy vitwag woy a so kē nivētleg kē babah negi. Net gōh en, ikē tiy ēntēn a kē natam yeh kē. Tō kē nivētleg kē hiy kēy. Lēdēmdēm nonon en so, ‘Ige gōh tēdēmap intik.’

7 "Ba kēy vap so, ‘Igōhkē ēntēn net a nētqē nonon agōh. Ikē gōh tilwo goy nētqē agōh. Gēn van wuh mat kē, tō nētqē nan nongēn ge.’ 8 Bahnentō kēy van tō tēy maymay kē, wuh mat kē, tō kēy suwyeg lō nataqn̄ēn den nētqē ēgēn."

9 Tō Tigsas mavap van hiy ige lililwo Tisrael so, "?Ba net gōh tak nahap van hiy ige etgoy tēqē en? Net nan qoyo wuh matmat qēt kēy, tō kē nilep van nētqē gōh lemnen ige tegha. 10 Kimi wun et vatah qete Nabaebol. Navavap non Ḡod mavap so, ‘Nahan̄ a ige bētēytēy ēm̄ musuwyeg tō en, kē mavan me nahan̄ mey a nitiy wē yeh. 11 Ḡod mak nahan̄ gōh mavan me nam̄e han̄, tō gēn met nitiy wē yeh.’ "

12 Tō ige lililwo goy ige Tisrael nemyōs so tēy Tigsas, veg kēy moyon̄teg vēglal so Tigsas hole tō en veg kēy. Ba kēy mētēgteg ige et. Tō kēy vayak den kē ēgēn.

13 Me atgiy ige lililwo nonoy mēvētleg yatkel Farisi tiwag mi yatkel et a kēy nemyin̄ ige non Mayanag Herod, so kēy van me so vēhge nēvēvēhiy van hiy Tigsas so ak sisgoy kē. 14 Tō kēy van me met Tigsas, tō mavap van hiy kē so, "Vatgo. Kemem nēglal so inēk net tenenen vitwag. Nēk et mētēgteg te ige et, veg nēk et dēmdēm te aē so net liwo si net su. Nohohole nōnōm nēhēyhēywē vēlēs, wa nēk vatvatne ige sil lemtehal a Ḡod nemyōs. Tō kemem nemyōs so ēglal. ?Wō itōk Lele nongēn so gēn wēl natakis van hiy Sisa si tateh?" (Veg Sisa nage Torom ba kē namyanag goy vel vōnō.)

15 Ba Tigsas mal ēglal so kēy galgal ēwē kē. Tō Tigsas mavap so, "?Bahap tō kimi akak etgal so ak sisgoy no qelegōh? Atmi lep tow me nēsēm vitwag, nok et tow." 16 Tō kēy lep van nēsēm hiy kē, tō Tigsas mēvēhge van hiy kēy so, "?Ba nangon hē aē kē? ?Wa nahah gōh en nahan hē?"

Tō kēy vap so, "Nangon Sisa anen, bastō nahan se."

17 Tigsas mavap van hiy kēy so, "Namlan Sisa, atmi lep lok van hiy Sisa. Namlan Ḡod, atmi lep lok van hiy Ḡod." Tō kēy mamamakē aē bohohole nonon agōh.

18 Yatkel Sadusi mavan me hiy Tigsas. Ige Sadusi et dēmtig te so Ḡod tak ēh lok ige mey a mal mat vatag. Ige Sadusi gōh mēvēhge nēvēvēhiy vitwag van hiy Tigsas so, 19 "Vatgo. Mosis mayap hōw Lele nongēn so natm̄an vitwag wo mamat veteg ēgnōn, ba ēntēyō wo tateh, tō ēthēn nileg lok mi nanay en. Tō nalqōvēn wo melep ēntēn en, tō kē nivan me qeleso ēntēn natm̄an mey a mal mat en. 20 Ba mahē nen ige mata yathēy buliviyō. Nowotwotm̄ag me leg, tō kē mamat veteg ēgnōn, ba ēntēyō tateh. 21 Tō wotwot mehiy meleg mi nanay nan, tō kē mamat se a ēntēn tateh, tō vētēl negi se qelenen. 22 Gaydēn̄ a ige buliviyō nen meleg mi nalqōvēn vitwag anen, ba kēy mamat qēt a ēntēy tateh. Tō me atgiy en, nalqōvēn nan nimat. 23 Tō veg ige mata yathēy buliviyō gōh meleg tō mi nalqōvēn en, ?Ba, babah ne qōn̄ a ige sil hatig lokse den namatmat en, tō ihē den kēy telep nalqōvēn en?"

24 Tigsas mavap van hiy kēy so, "Nohohole nonmi et tenenen te. ?Kimi nēglal so bahap? Nohohole nonmi et tenenen te, veg kimi et ēglal te Nayapyap Yon̄ non Ḡod, wa kimi et ēglal te naman non Ḡod. 25 Mahē ige et mat hatig lokse den namatmat en, kēy tit legleg lok vēhte, nelegleg tabah. Kēy tavan me qele ige in̄sel hag alge en. 26 Namtehal ne ēhēh lokse den namatmat, van lōbōk non Mosis, a kē mayap tō aē veg nēqētēnge su a nep nilawlaw aē. Lēvēt mahē nen, Ḡod mavap van hiy Mosis so, ‘Ino Ḡod non Abraham, wa ino Ḡod non Isak, wa ino Ḡod non Jakop.’ ?Kimi wun meptah sas ba et ēglal qete nohohole agōh? 27 Ba Ḡod gōh, ikē Ḡod non ige a kēy nēh, ikē et Ḡod non ige et mat te. Nēdēmdēm nonmi a yeh tewiwi."

28 Navatgo Bele vitwag mahaldin̄qoy vel hohole del gōh. Wa kē moyon̄teg napluplu non Tigsas a nitiy wē yeh. Tō kē mavan me hiy Tigsas, ba mēvēhge nēvēvēhiy vitwag van hiy kē wo, "?Nahan Le non Ḡod a nitiy wē yeh den vel Le del?"

29 Tō Tigsas mavap van hiy kē so, "Nele mey a nitiy wē yeh qelegēn, ‘!Ige yatqōtqōn Israel, atmi yon̄teg galsi! Welan, ikē Ḡod nongēn, wa ikē mahgen a Newelan en. 30 Atmi tam Welan Ḡod nonmi mi natqami del, mi natalami del, mi nēdēmdēm del nonmi, wa mi namaymay nonmi del.’ 31 Ba nele vōyō negi den vel Le, mavap so, ‘Kimi tam galsi vel et a tog walēg tō kimi en, atmi ak nahaphap mey nēwē hiy kēy, qele kimi ak nahaphap mey nēwē lokse hiy kimi.’ Tateh le tegha se a nēwē veteg nele vōyō agōh."

32 Tō navatgo Bele nan meplu so, "Vatgo, nohohole nōnōm netnenen. Nahap a nēk mavap en, ikē hēywē. Ḡod gōh, ikē vitwag woy, tateh Ḡod tegha se. 33 Itōk so gēn tam galsi Ḡod lelo taqangēn mi nēdēmdēm del nongēn wa mi namaymay del nongēn. Wa itōk so gēn tam galsi se ige a kēy notog walēg gēn, tō ak nahaphap mey nēwē hiy kēy, qele igēn vivitwag ak nahap mey nēwē hiy gēn lokse. Mahē gēn tatag goy galsi nele vōyō gōh en, tō gēn ak nahap mey a nitiy wē yeh. Meygōh itōk veteg nolol del a gēn leplep van hiy Ḡod."

34 Tigsas moyon̄teg van a nohohole non net gōh netnenen en, tō Tigsas mavap van hiy kē so, "Nēk mal van sisqet me lemyeyen non Ḡod, a so kē nimyanag goy nēk."

Me atgiy en, nataqn̄ēy ige lililwo Tujuw mamamayge. Tō kēy et vēhge site nēvēvēhiy den Tigsas.

35 Mahē Tigsas mavatvatne ige sil hay Litiy Ēm̄ Bolol hiy Ḡod en, tō kē mēvēhge nēvēvēhiy vitwag van hiy kēy so, "?Bahap tō ige vatvatgo Bele vap so Kraēs, ikē ēntēn Devēt? 36 Nuvu Yon̄ mohole heylō Devēt, tō Devēt mavap so,

‘Ḡod mavap van hiy Welan mino so,

"Nēk hag me lemtō mino a laqaqayek

gaydēn̄ a nok m̄ōk tēqēl ige tavale nōnōm tōm̄ōk kēy laln̄e yēn̄ēk." ’

37 "Mayanag Devēt mōl Kraēs so Welan. ?Tō qeleave tō Kraēs gōh, ikē ēntēn Devēt?"

Tō nisil nam̄adeg a nam̄adeg, kēy memlaklak boyon̄yon̄teg nohohole non Tigsas.

38 Mahē Tigsas mavatvatne ige gōh en, tō kē mavap so, "Kimi etgoy galgalsi kimi den ige vatvatgo Bele. Kēy sēsē kēy so hey namalmal hoyohyo a mēwēwē bah. Wa letno n̄eyen̄yeg haphap en, kēy nemyōs so ige et hog kal namney hiy kēy, so dēmap kēy. 39 Wa hay lēm̄ tatay en, kēy nemyōs so haghiy lamahē mey nēwē, wa legengen liwo se qelenen. Kēy nemyōs so haghiy letno haghag non ige lililwo. 40 Ba kēy akak magaysēn ige nay, veg kēy tan̄tan̄hephep lēm̄ nonoy. Me atgiy en, kēy tatay a nehyo telm̄ētm̄ēt, ak so ige sil dēmap kēy. Ba kēy telep nēvēvēg liwo aē n̄ēh."

41 Tō Tigsas mahag namun sisqet natno suwsuwyeg sey alen̄a. Ba kē nietet ige a kēy suwsuwyeg nalen̄a namuy. Ba woqse m̄eye sēm, kēy suwsuwyeg nēsēm namuy a nēkēkēn. 42 Ba nalqōvēn nay vitwag, kē nem̄say, kē mahayveg me ba musuwyeg namun nēsēm susu vōyō woy.

43 Tō Tigsas mōlōl ige nonon mavan me hiy kē, tō kē mavap van hiy kēy so, "Hēywē, nok vap van hiy kimi, nalen̄a namun nalqōvēn nay gōh nitiy liwo veteg namun ige del. 44 Veg ige m̄eye sēm gōh en, kēy suwyeg van nēsēm liwo ba kēy metey goy tekel sēm nonoy. Ba nalqōvēn m̄asay gōh, kē musuwyeg qēt nēsēm nonon, a kē so niwēl negengen nagan aē."