Marcos 14

Ige lililwo non ige Tisrael nemyōs so wuh mat Tigsas

1 Nōqōn̄ togoy vōyō se en, tō Negengen Yowlege niqtēg, tiwag mi Nōqōn̄ Liwo Begengen Nēbrēyt a Nis Tateh Alon En. Tō ige m̄agoy ige pris, tiwag mi ige vatvatgo Bele, kēy soksok namtehal so vētleg net so van tēy me Tigsas tō kēy wuh mat kē. Ba kēy nemyōs so ak lōn̄veg ēwē namtehal nan, 2 veg kēy vap so, "Gēn tit ak vēhte legengen liwo, veg ige sil tiple vēhyuw mi gēn aē."

Nalqōvēn vitwag mōlōwyeg nēbēqōnqōn lēqtēn Tigsas n̄a Betani

3 Ba Tigsas hagtō n̄a Betani, a lēm̄ non net vitwag Simon, a nēwēyēs maqal tō kē am̄ag. Ba mahē Tigsas nigengen nen wah, nalqōvēn vitwag nivan me, kē nētēy nōwōbē a kēy magaleg mi nevet, nahan alabasta. Ba nēbēqōnqōn gōh, kēy mak mi nad, a nōqōnqōn lēs. Ba nēsēm nan a nilwo telen̄len̄. Mahē Tigsas gengen lapgetō wah, nalqōvēn nan mihig m̄ōlō namte wōbē nan tō nilōwyeg nēbēqōnqōn nan n̄a lēqtēn Tigsas, veg nalqōvēn nan nēdēmap Tigsas.

4 Ba woqse et den kēy moboel nalqōvēn nan en, tō kēy hohole mahgey so, "?Bahap tō kē mak bon̄bon̄ nēbēqōnqōn gōh? 5 !So kē ten̄yeg tō nēbēqōnqōn nen en, togtō kē tētēy nēsēm nan a nilwo telen̄len̄. Tō kē temyin̄ vēh ige m̄asay aē. Veg nēbēqōnqōn nen, haytēyēh so net nimgumgu veg bēte vitwag wonwon!" Tō kēy hole boel kē aē.

6 Tō Tigsas mavap van hiy kēy so, "Atmi nitog hohole hiy nalqōvēn en, kē mak nahap mey nēwē yeh hiy no. 7 Ige m̄asay notogtog vaga mi kimi. So kimi wo nemyōs en, yatkel mahē ēwē kimi temyin̄ vēh kēy. Ba veg no en, no tit tog misin vēhte mi kimi. 8 Nalqōvēn gōh mak nage ēwē hiy no a kē tagaleg vēh. Kē mōlōwyeg nēbēqōnqōn gōh me lataqn̄ik so ak tēytēymat betvitvig no. 9 Nok vap van hiy kimi nēhēyhēywē, vel vōnō del lemyam, kēy toyon̄teg noyoy ēwē veg no, tō kēy toyon̄teg se nakaka veg nalqōvēn gōh bege a kē mak tō hiy no en, tō kēy tēdēm lok kē aē vaga."

Judas men̄yeg Tigsas

10 Tō Judas Iskariot, vitwag den ige tin̄qoy son̄wul nanm̄e vōyō; kē mavan me hiy ige m̄agoy ige pris so niak tēytēymat namtehal so niukēg Tigsas van lemney. 11 Kēy moyon̄teg nohohole non Judas en, tō kēy memlaklak aē a nēkēkēn. Tō kēy mavatvat van hiy kē so wēl kē aē. Tō Judas nimyōs goy tō nisok namtehal ēgēn, so niukēg Tigsas van lemney.

Tigsas megengen tiwag mi ige nonon a Lōqōn̄ Yowlege

12 Nōqōn̄ a kēy meqtēg Nōqōn̄ Liwo Begengen Nēbrēyt a Nis Tateh Alon En,*14:12 Nōqōn̄ liwo a ige Juw ōl so Nōqōn̄ Liwo Begengen Nēbrēyt a Nis Tateh Alon En, kēy tatagoy nōqōn̄ liviyō. Tō nōqōn̄ totogyeg nan, kēy ōl so Negengen Yowlege. lōqōn̄ nen ige sil wuh nisipsip susu Begengen Yowlege. Tō ige non Tigsas mēvēhge van hiy kē so, "?Nēk nemyōs so kemem van so tēytēymat natno Gengen Yowlege ave?"

13 Tigsas mavap van hiy yoge yowyowveg nonon so, "Atmōyō van n̄a lepnō liwo, ba natm̄an vitwag tetsas qiyig kōmyō. Kē neywu natno haha bē liwo. Atmōyō dam kē. 14 Kē so nihayveg hay lēm̄ vitwag en, tō kōmyō hole tiwag mi net benon ēm̄ nan. Tō vēhge tow kē so, ‘?Vatgo mēvētleg kamyō me so vēhge nēk so, ave mahē a nēk mal tēymat vatag hiy kē so kē nigengen Yowlege tiwag mi ige nonon aē ōk?’ 15 Tō net nan telep kōmyō van lidin liwo n̄a alge, vētmahē nan mal tēymat nowmat. Ba atmōyō ak tēytēymat negengen nagangēn begengen liwo mahē anen."

16 Tō Tigsas nivētleg kōyō ēgēn. Kōyō hatig tō van lepnō liwo en, ba kōyō met vel haphap a qele Tigsas mavap tō van hiy kōyō en. Tō kōyō ak tēytēymat nahaphap del Begengen Yowlege ēgēn.

Tigsas mavasemlō so Judas qoyo ukēg kē van hiy ige tavale nonon

17 Nalo niyoy en, tō Tigsas tiwag mi ige nonon son̄wul nanm̄e vōyō, kēy van me lēm̄ nan ēgēn. 18 Tō kēy mahag walēg natno gengen nen tō kēy gengen. Ba Tigsas mavap so, "Nok vap hēyhēywē van hiy kimi. Vitwag den kimi tukēg no van lemnen ige tavale mino. Vitwag den kimi a gēn gengen tiwag tō agōh."

19 Tō ige tin̄qoy mololwon hiy kē aē, ba kēy vēvēhge vivitwag Tigsas so, "?Wō ihē? ?Ino?"

20 Tō Tigsas mavap so, "Ikē vitwag den kimi son̄wul nanm̄e vōyō. Ikē mey a mēqēl nēbrēyt livinlah tiwag mi no. 21 Ēntēn Net tamat qele Nayapyap Yon̄ mavap tō aē. Ba nivipdeg liwo taqal net a kē mukēg Ēntēn Net van lemnen ige tavale nonon en. Nitiy wē yeh so net nen tit wot te me lemyam agōh."

Tigsas megengen babah negi tiwag mi ige nonon

22 Mahē a Tigsas tiwag mi ige tin̄qoy nonon gengen nen wah, Tigsas nilep nēbrēyt. Tō kē mēvēwē bah Ḡod aē en, tō nitōq woy. Tō melep van hiy ige nonon, ba nivap so, "Atmi lep. Igōhkē nataqn̄ik."

23 Tō Tigsas melep nivinlah waen vitwag, tō mēvēwē bah Ḡod aē en, tō nihog van hiy kēy, tō kēy del in. 24 Tō Tigsas mavap so, "Igōhkē naday mino, so niak nakavanan non Ḡod tiwag mi ige et nonon nitig maymay. Naday mino nilon̄ so nivaēh woqse et. 25 Hēywē a hēywē, no vap van hiy kimi so no tit in lok vēhte nawaen gaydēn̄ lōqōn̄ mey a nok in nawaen gayaq lemyeyen talge non Ḡod."

26 Tō kēy me se bah neh en, tō kēy kalō, tō van n̄a Wutwut Ne Olif.

Tigsas mavasemlō am̄ag so Pita tavap so kē et ēglal te Tigsas

27 Tigsas mavap van hiy kēy so, "Kimi del tisisgoy, veg Nayapyap Yon̄ mavap so, ‘No tuwuh net betetgoy sipsip, tō ige sipsip teslen̄ vivitwag.’ 28 Ba mahē a nok ēh lok den namatmat en, tō nok van ba dēyē kimi n̄a Kalili."

29 Tō Pita mavap van hiy Tigsas so, "Wun kēy del tisisgoy, ba nok tit sisgoy vēhte."

30 Tō Tigsas mavap van hiy Pita so, "Hēywē a hēywē, no vap van hiy nēk so qiyig anqōn̄ gōh, a nututu et kokyet vagyō qete en, nēk titiayak no vagtēl so nēk et ēglal te no."

31 Ba Pita mavap maymay den am̄ag van hiy Tigsas so, "So no wo mamat tiwag mi nēk en, ba no tit tiayak vēhte nēk." Tō kēy del mavap qēt qeleanen.

Tigsas matatay n̄a Kētsēmēnē

32 Tigsas tiwag mi ige nonon mavan me mahē vitwag nahan Kētsēmēnē. Tō Tigsas mavap van hiy kēy so, "Atmi hag qōtō me agōh, ba nok van tatay." 33 Tō Tigsas melep Pita, Jemes ba e Jon, kēy mavan. Ba nēdēmdēm nonon mowontig kē veg kē nololwon meh. 34 Tō Tigsas mavap van hiy itēlge so, "Nēdēmdēm wa nololwon mino et haytēyēh te, yipteg so nok mat aē."

35 Tigsas mohole bah en, tō kē nivan den kēytēl, ba et yeh tē, tō kē niyowtaq hōw lēvētan tō nitatay. Kē mēvēhge van hiy Ḡod sowo tak vēh, ukēg nememeh gōh tit qal te kē. 36 Tigsas mavap so, "Imam, nēk tak vēh vel haphap del. Ba nēk lepyak nivinlah bememeh gōh den no. Ba no qoyo ak nahap te a nēk nemyōs so nok ak. Ba et lemyōs mino te, ba lemyōs nōnōm vēlēs."

37 Tigsas mavan lok me hiy kēytēl en, ba kēytēl mal mitimtiy. Tō Tigsas mavap van hiy Pita wo, "?Pita, nēk nemtiy? ?Nēk tit matyak vēhte natkelgi? 38 Kēmtēl nitog mitimtiy ba etgoy galgalsi, wa tatay, veg kēmtēl tiple sisgoy lem̄eygal. Hēywē, nēdēmdēm non mētēl namaymay ba nataqn̄i mētēl nem̄geygey." 39 Tō Tigsas mavan lok, ba kē matatay lokse qele a kē matatay tō en. 40 Mahē Tigsas mavan lok me hiy kēytēl en, kēytēl mal mitiy lokse veg nataqn̄ēytēl mal dēw bamatmayge. Tō kēytēl et ēglal te so vulu goy Tigsas qeleave.

41 Tō Tigsas mavan lokse, tō me atgiy, kē nivan lokse me vagtēl negi. Tō kē nivap van hiy kēytēl so, "?Eh, kēmtēl mitiy m̄ōkheg laptō? Ba mabah ēgēn, veg nalo nan mal van me. Ige gengenyeg so lep Ninti Et, veg net vitwag so niukēg no lemnen ige tavale mino. 42 Sowle, hatig tō gēn van, veg net nan van vatag me anen."

Ige tavale mētēy maymay Tigsas

43 Tigsas hohole laptō en, tō Judas nidēn̄ me. Judas gōh, ikē vitwag den ige son̄wul nanm̄e vōyō non Tigsas. Woqse sil madam me Judas, a kēy nētēy geh nagasel bepgal wa naqyēn̄ nonoy. Ige a mēvētleg me ige vagapgal en, ikēy ige pris lililwo, tiwag mi ige vatvatgo Bele, wa ige tamatmayge a kēy tigtig helem̄ag ige Tisrael. 44 (Vētmahē a kēy vanvan me so tēy Tigsas en, Judas mal vap nowmat van hiy nisil so, "Nok so mōpōpōn net vitwag en, Tigsas anen. Atmi tēy maymay kē ba lep yak kē.") 45 Judas mēdēn̄ me mahē nen en, tō kē nivan togolgol van hiy Tigsas, tō mavap van hiy kē so, "Vatgo." Tō kē nipōpōn kē. 46 Tō kēy van me tō tēy maymay Tigsas.

47 Ba net vitwag a tig sisqet tō Tigsas en, kē melep nagasel bepgal nonon, wa nitot yak tekel dēln̄an neslev vitwag non Nipris Liwo.

48 Tō Tigsas mavap van hiy kēy so, "Kimi mavan me gōh nētēy qēt nagasel bepgal wa naqyēn̄, so tēy no. Ba ino et net buwuwuh mat et te. 49 Ino navanvan tiwag mi kimi velqōn̄ Lēm̄ Bolol non Ḡod, nok vatvatne kimi, ba kimi et tēy te no. Ba nahaphap a kimi ak gehtō nen en, kē niak tig nohohole Layapyap Yon̄."

50 Tō ige nonon mukēg Tigsas, tō kēy siksikyak qeleqlen̄ den kē. 51 Ba nōlōmgep vitwag matatag lap Tigsas, net gōh kē namalmal ēwē. Ba ige vagapgal mētēy kē, 52 ba kē mukēg namalmal nonon, tō niplag a tateh malmal mi kē.

Ige lililwo non ige Tisrael mitil Tigsas

53 Ige vagapgal melep Tigsas van hiy Nipris Liwo. Tō ige lililwo goy ige pris tiwag mi ige tamatmayge a kēy tigtig helem̄ag ige Tisrael, wa ige vatvatgo Bele en, kēy mal hag tiwag nowmat. 54 Ba Pita matatag me Tigsas, ba kē et van sisqet te kē van. Pita matatag Tigsas tō mēdēn̄ me lidindin a lēm̄ liwo nonon Nipris Liwo. Ige betetgoy mahē nen, kēy mahag walēg nep. Tō Pita nihag tiwag mi kēy so nim̄hil temun kē.

55 Ige pris lililwo tiwag mi nēvēwti mayanag a kēy ōl so Sanhedrin en, kēy soksok net vōyō so tin̄ yak te hohole veg Tigsas, veg kēy nemyōs so wuh mat kē. Ba kēy et etsas te. 56 Woqse et magalyak hag, ba nohohole nonoy netegtegha geh. 57 Ba yatkelgi den kēy mitig ketket, ba magal yak nohohole veg Tigsas qelegēn so, 58 "Kemem moyon̄teg Tigsas mavap so, ‘Nēm̄ Bolol non Ḡod gōh a ige et mētēy tō en, no tak hethet. Ba no tētēy kal mey negyaq, bōqōn̄ vētēl ēwē a net et ak te tō.’ " 59 Kēy mohole qelenen, ba nohohole nonoy et haytēyēh geh te, netegtegha vēlēs.

60 Ba Nipris Liwo mitig ketket van lēvētnay, tō kē mavap van hiy Tigsas wo, "?Bahap tō nēk et vulu goy te kēy? ?Ba qeleave bevel hohole a kēy vēvēg tō nēk aē en?" 61 Ba Tigsas mitig yoyon̄, kē et vulu goy te kē. Tō Nipris Liwo gōh mēvēhge lokse van Tigsas wo, "?Qeleave, wō inēk Kraēs? ?Inēk Ēntēn Ḡod a gēn mogmogo goy tō kē gōh?"

62 Tigsas meplu goy kē van wo, "O-oh, ino Kraēs. Kimi qoyo et Ninti Et, a nahag lemtō non Ḡod a kē naman.✝14:62 Psalm 110:1 Ba kē qoyo kalō me den namlēg hag lōtōk en.✝14:62 Daniel 7:13"

63 Tō Nipris Liwo nen mololgagay a nēkēkēn, tō nihay namalmal nonon, tō mavap so, "?Bahap tō gēn soksok se nohohole non ige tegha? 64 Kimi mal yon̄teg qēt. Kē mohohole hethet hiy Ḡod anen. Atmi dēmdēm tow aē. ?Tō gēn tak qeleave hiy net gōh?"

Tō kēy vēvēg Tigsas, ba mavap so, "Wuh mat kē."

65 Tō yatkelgi den kēy hatig hag tō nihgeg kē. Yatkelgi mom̄ongoy namtan, tō lem̄eh kē, tō kēy vap so, "Inēk net lēgēlgēg non Ḡod, nēk vasem tow. ?Hē lem̄eh tō nēk en?" Tō ige vagapgal lem̄eh kē ēgēn.

Pita vap so kē et ēglal te Tigsas

66 Pita mahag a lidindin ne ēm̄, tō nam̄alm̄al qan̄qan̄yis nonon Nipris Liwo en nivan me. 67 Nam̄alm̄al nan met van Pita m̄ihilhil tō a sili ep. Tō kē met galsi van hiy Pita tō mavap so, "Ēy, inēk se tiwag mi nage Tanasaret a Tigsas."

68 Ba Pita mavaleh kē, ba mavap so, "Nok et ēglal hōn te nahap a nēk hole tō aē anen." Tō Pita nivan yow lemtegeay ēgēn. Tō nututu nikokyet.

69 Nam̄alm̄al nan met lokse Pita en, tō kē mavap van hiy ige a tig sisqet tō kē en so, "Net nen, ikē vitwag den kēy."

70 Ba Pita mavap lokse so kē et ēglal te Tigsas. Me atgiy yatkel et tig sisqet tō Pita en, kēy vap van hiy kē so, "O-oh, inēk tiwag mi Tigsas, veg nēk hohole qele ige Takalili."

71 Ba Pita mohole mi namaymay so, "!Ḡod tivipdeg no aē sowo nok galgal! !Nok et ēglal hōn te net a nēk hole gatay kē en!"

72 Togolgol mahē nen en, nututu nikokyet lokse vagyō negi. Tō Pita nidēmlok nohohole non Tigsas a kē mavap tō a so, "Mahē a nututu et kokyet vagyō qete en, nēk tavap vagtēl so nēk et ēglal te no." Tō Pita mololwon aē a nēkēkēn, tō kē niten̄.