Atos 3

Obvuul b’ekal ke Nzɔ a Nziã

1 Tsoo ngelemɔ̃, Piɛɛl ye Dzaã áyɛn Nzɔ a Nziã me ndɔɔ ãbuɛɛn mã lio li ãtyel ŋ’emeekɔɔl tal. 2 Ŋ’esa oŋɔ̃, éli ye mbuul ngɔmɔ̃ wu ekal ki emburu-ngoo wu áli oŋɔ̃. Tsoo bwɛn a tsoo baal ákebiri ndɛ bvool ákesuul ndɛ k’ɔ̃nywã wu ekɔɔ e Nzɔ a Nziã wu ata m'«Ɔ̃nywã wu ompal», kwɛn ndɛ alaa nzi ola b’ákesam onse Nzɔ a Nziã. 3 Ŋ’emwɛn mbuul ondɛ Piɛɛl ye Dzaã ayesam onse Nzɔ a Nziã, ndɛ olaa nzi ola bɔ.

4 Piɛɛl ye Dzaã alɔ ndɛ etɔ, Piɛɛl bu alieel ndɛ ndiri: «Tal bee!» 5 Mbuul ondɛ otal bɔ y’onkyab bueel, ke ngwel wɛ ndɛ áketa kaã li abɔɔ ki otwal ola bɔ. 6 Kɛn a Piɛɛl olieel ndɛ bubu: «Mɛ̃ ke ndi ye nzi wɛ, mɛ̃ hɛ̃ ke ndi ye ɔɔl wɛ, kɛn a ki ndi a mɛ̃, mɛ̃ ŋ’èwa yɛ kyɛ: Me nkuũ a Yeso Mãsia wa Nadzalet, tɛɛn bvool dzuu!»

7 Piɛɛl osiin ndɛ me kuɔɔl ki elam, bu atɛɛl ndɛ. Kɛn a me lio alili, ntaã y’ãbwel ã mviil ã mbuul ondɛ ãwam, 8 ndɛ ayebiri kab, otɛɛn, obvi odzuu. Ndɛ osam onse Nzɔ a Nziã ye bɔ, adzuu, abiri ãkab m’esɛ, bvool alweel Nziã.

9 Baal bam bueel amwɛn k’edzuu ndɛ ye k’elweel ndɛ Nziã. 10 Bɔ ayɛɛ ndiri ondɛ mbuul wu ákelaa nzi me nsɛn k’ɔ̃nywã a Nzɔ a Nziã wu ompal. Obobɔ, bɔ ongɛɛ obɔɔ, ɛ̃kam hɛ̃ ɛ̃si bɔ, me ndɔɔ ãndɔɔ m’ãbwel me mbuul ondɛ.