1 Theophilus, Ih laisiukwak keraibe* gage, Jisu pe ta tei cuhdi kecu nah ledeu kegaidung de peciakne Ih raugai dida, 2 pecu ngngwa nghangdi kecu tingba kecang, pa Kemci Rabe gade pa ne kedetkelu langkegaimedung dage ajadung peu kedicai. 3 Pe tsitcai, pa ring kebam, nlumlu kebui batadung kekiee ge gade penui dage pecu liagai. Zie riakdai ge penuide peu pecu ngaugai, nah pa Tinggwang hegwangram ha ranglia gai. 4 Piage penui ngngwa matyei kebam dau, pa penuide aja kaigai, "Jerusalem pütdi so, Ih nnuide pedwa rang kebeu nzwa, peibe sampet kebeu mapeu de langgai beu kemaktane kwa bamlu.* 5 John dui le mide duipum tei, dede zie kiee kemakcai nnuide Kemci Rabe gade duipum tei dizie."*

6 Langkegaimedung ngkwa ncüt keludau, penui Jisu de keteugai, "Rampaubo, nang Israel de hegwangram peu dai kera aipau ting de deni?" 7 Dede Pa penui dage rangdi, "Peibe pe kengkieng gade peting mede pehidung riempwa kebamde nnui ci kerane ma. 8 Dede Kemci Rabe nnui da gwang lude, nnui kengkieng ngau luzie nah nnui Jerusalem, Judea nah Samaria pelane ga nah kideu penli ga kecang a zierang teizie." 9 Pa aidungde rang kedicai, penui ngangcuh pie kebamdau, pecu ngngwa cuhdi, nah hemwa gene penui miakngau gade pecu sung teudi.* 10 Pa nghang kecu penui tinggimle pie lingci eh kebamdau, zette, mi hangna penai nia keha teulwe penui taiga sapdi. 11 Penai rangdi, "Galileeme peidung, daitei nnui tinggim pie eh sap bamno? Nnui dade tinggim ga ngngwa nghang kedi Jisu aipaude, pa tinggim nghang kedi nnui kengau kesiakge cailigwang daizie."

12 Pecai penui Olive lie qu kela lamlwa gade Jerusalem namdi ga cailigwanglu, cide Jerusalem namdi taiga, Sabbath naige beuh dei ge.* 13 Penui namdi ga gwang luge, penui kebam kibung nreube de ga nghanglu, Peter penai John, nah James penai Andrew, Philip penai Thomas, Bartholomew penai Matthew, Alphaeus napei James penai Zealot lie kela Simon, nah James napei Judas. 14 Penui pelane ngngwa ket tei eh kekie tei bamla, mipuime nah Jisu pui Mary, nah Jisu sinamedung de si eh.

15 Cipau tingdau* Peter sinamedung kakga saplu, (mina ngkwa kebam pelane ge 120 kenzwage) delwe Peter rangdi, 16 "Mipeimedung, sinamedung, Kemci Rabe ne David mui gade Judas, Jisu de ketuime de saulia kebeube ha rangkenzeu de kesanglaisiu ga teicang maisiadi.* 17 Kedanemene Judas anui kakga peupei hangge nah aipau zierangta dega pade pe qwabam." 18 (Aipau peide pe ta kesia gade rangkang ngau kelude teu luh ge luilu, nah cikade pa tsaidi. Pe peu taksu hia rai nah pe za pangpop gai eh pe lungnetdung mpet ciaudi. 19 Aide Jerusalem ga kelunghme pelane de ci gwangdi, cine penui cipau luh de "Akeldama," de penui let gade qudi, cide pekie "Hejai Luh.") 20 "Kedanemene cide Leidung Laisiukwak ga raupwala,

‘Peu aipau luh de mta dilu,

Nah migede depeu cika lungh so,’* nah

‘Peu mi kedage depeu pe muiteubam ga bam dilu.’*

21 Cine anui Rampaube Jisu de ngngwa kegwang kemie leune ga anuide nzang kelame hangge maisia, 22 John duipum ketei gade gwang anui dade pecu ngngwa nghang kedi benai kecang—aidungde gade mige anuide ngngwa pa ringcuh kedi zierang tei maisia." 23 Cine penui mi hangna de kedetlu, Barsabbas lie qukela Joseph, pecu Justus liede qula nah Matthias. 24 Cine kekie teilu eh, penui rangdi, "Rampaubo, nang mileune mlung ci, cine aipau kena kakgade nang caube de kedetlubi kecu lialo 25 aipau zierangta ga nah langkegaita ga Judas, pe saja bam gage tetgai kedibe bam leulu kerane." 26 Penai ziemne penui dacak tei, nah dacak Matthias reuga gwangdi, cine pecu langkegaime kereieket baude silu.