1 Ma aidungde tei kedicai Paul Athens pütdi eh Corinth namdi ga gwangdi. 2 Pa cikade Jewme pei ge pezi Aquila, Pontus ga deuketme ge, pe nau Priscilla de ngngwa Italy deudi gade gwang bam eh pecu redaulu, kedanemene Claudius Jewme pelane de Rome gade tet dilo aja kai kegaine. Paul penaida gwang, 3 pa de peta penai ta nzwa kecune, pa penaide ngngwa bam eh mata tei, penai paiki keteime. 4 Cine Paul Sabbath ramsangne synagogue gade mide mpau eh Jewme nah Greekme lung tei nreulu kera teila. 5 Dede Silas penai Timothy Macedonia gade nghung luge, Paul keledeu gage peting pelane kai eh Jewme dage Jisu au Khrista delie kecu zierang teigai. 6 Dede Jewmedung pecu renia nah kesiu kedidau, Paul pe nia kecung gai eh penui dage rangdi, "Nnui jai peu nnui katei nnui reuga gwang lulo; Ih a zie ma. Cu gade Ih Gentileme da gwang dizie da." 7 Nah pa cikade tet pwa Tinggwang de reca kelame peige pe zi Titus Justus ki ga gwangdi. Pe ki synagogue taiga bam. 8 Synagogue muiteube Crispus, pe kilungme pelane de ngngwa Rampaube de nlumlu; nah Corinthiame kekiee ge Paul sam siu kelume nlumlu nah duipum teilu. 9 Cidau Rampaube zeuziu ge marengei ge gade Paul dage ranggai, "Ngngi diso, dede rang jüja bamlu nah mlei mene bam diso. 10 Kedanemene Ih ncu ngngwala, nah migede ncu ketang eh tei rejam lak, kedanemene namdi aika a mina kekiee ge bamlu." 11 Cine Paul cika mmi ge eh kei herok ge penui kakga Tinggwang sam ledeu eh bamdi.

12 Dede Gallio Achaia deuceu ga deuceudibe tei luge, Jewmedung ngngwa ket tei eh Paul de renia eh pecu tutiak bam dwaga ngngwa gwanglu; 13 penui rangdi, "Aipau peide hezaibe gikah eh minadungde Tinggwang de reca lulo kecung la dida." 14 Dede cidau Paul marang zielie cu ge, Gallio Jewmedung dage rangdi, "Nnui Jewmedung, magade cide matei mau kedige mede heta kesiage teidi kecuge liecai, nnuide ngngwa tutiak kera petau lubui. 15 Dede makie aidungde au samdung nah hezidung nah nnui katei nnui zaibe halu, nnui katei tiak lulo. Ih ma aidungde reu tutiakbe au teineu melie." 16 Cine Gallio tutiak bam gade penuide langgidi. 17 Cine penui pelane synagogue reu kedibe Sosthenes de tuilwe tutiak bam dwaga de pecu dap. Dede makie aidungde ga Gallio pelung kai ma.

18 Paul tingbazie kekiee ge cika bamsi kelucai, kenlummedung de pütdi eh liem gade Syria deuceu gage tet gaidi, nah cika Priscilla penai Aquila de pecu nzangla. Pa pe sampet teipwa kelade ziemne Cenchrea namdi gade pe peu taidi.✝ 19 Penui Ephesus namdi* ga gwang keludau, Paul Priscilla penai Aquila de cikade pütdi, dede pabe synagogue ga gwang delwe Jewmedung de ngngwa kempau bamdi. 20 Penui Paul de bamsi gailo kie kegaidau, pa lak liedi. 21 Dede pa penui dade tetcuh eh ranggai, "Tinggwang lungning liecai, Ih nnuida gwang daizie." Iciu eh pa liemtau pwa Ephesus gade tetdi.

22 Paul Caesarea ga gwang luge, pa hang Jerusalem ngqwame de kelumgai eh Antioch ga nghungdi. 23 Tingkakge cika bam kelucai, Paul tetpwa Galatia nah Phrygia cuikui gadung mie delwe kenlummedung pelane de tei ngkieng gai.

24 Cidau Jewme ge pe zi Apollos, Alexandriame* ge Ephesus ga gwang. Mina aipaude marang cisüt nah kesanglaisiu de ci hemisüt kecume ge. 25 Apollos de Rampaube lampui lege ledeu gai kelume ge. Pa pelung kaisüt delwe Jisu ha ledeu beu dede pa duipum keteibe John ha de gwale cima. 26 Apollos kuusüt eh Synagogue gade marang mdeulu. Dede Priscilla penai Aquila pa ma kerang siu luge, pecu qu ntsamlwe pe dage Tinggwang lampui ha rang siakte liagai. 27 Pa Achaia ga kahpet neu kedidau, kenlummedung pecu kecung gai delwe Achaia ga kenlummedung dage pecu ngngwa lulo laisiu raugai. Pa gwang luge, ngaugia gade nlum kelumedung de pa nghasüt gai. 28 Kedanemene Apollos pe sam ngkiengsüt eh mtei rang kerenia gade kesanglaisiu teu Jisu au Khrista delie kecu keulia eh Jewme de rang nggah kedine.