1 Ge Judea deuceu gade mina kangge Antioch namdi ga nghung nah kenlummedung de ledeu eh ranggai, "Moses zai gade nzwa nnui hegeurumlu mecai, nnui kelikelu ngau gailak."✝ 2 Makie aide ziemne Paul penai Barnabas penuide ngngwa marang renia nah kesamlim sütdi. Cine penui Paul penai Barnabas nah kedame kangge de ngngwa penui kakgade Jerusalem ga mie langkegaimedung nah hangkiamedung de redau eh aipau hade mpau kerane kedetlu. 3 Ciziemne penui, ngqwabe ne langkegai nzwa Phoenicia nah Samaria cuikui tetkah kegwangdau Gentileme dainzwa Tinggwang da nreugwang lu dibi kecu ha ranglia. Aipau hade kenlumme pelane de suiyi disüt kecu teugwang beu. 4 Penui Jerusalem ga gwang luge, ngqwabe nah langkegaime nah hangkiamedung penuide ngaulu. Penui Tinggwang ngha gade penui ta teikelu leune paubeu. 5 Dede kenlumme kangge, Phariseeme maa ga kelame cuh saplwe rangdi, "Penuide hegeurum maisia nah Moses zai mzai kera penuide aja kaibeu maisia." 6 Cine langkegaime nah hangkiamedung makie aide mpau kerane gwang ngkwalu. 7 Kesamlim süt kedicai, Peter cuhlwe penui dage rangdi, "Sinamedung, peting tie kemakge cai Tinggwang nnui kakgade acu peu Gentileme dage samliakeyi zierang tei kera kedetkelu nnui cibam, iciu eh peu penuide siu, nah nlumlu kerane. 8 Tinggwang, mina lung ci kelabe, penuide Kemci Rabe peu kegai gade penuide ngngwa kelu zierang teigai, pa anui dage tei kegaide nzwa; 9 nah pa anui nah penui kakga kentsam gede teigai ma, dede kenlum gade penui lung teimci beu. 10 Cu ciziemne, daitei eh nnui anui paume nah anuide pungpai gai kelak ngwanggai pwa caisuime ngwang reu gage kai eh Tinggwang de kedak lano? 11 Dede anui Rampaube Jisu ngaugia gade penuide nzwa anuide kelilu kera nlum bamlie."

12 Pecai hemaabe Barnabas penai Paul Tinggwang penaide teu miswakegah nah mimakecangh batadung Gentileme kakga tei kegai ha pau kegai kingnei eh zing de bamdi. 13 Penui marang cangdi ge, James sam keli eh ranggai, "Sinamedung, a kwa kingnei gailo. 14 Tinggwang dainzwa keraibe Gentileme de ngaungia eh penui kakgade minadung gede pe zi ziemne ngngwalu dibi kecu Simon rang mci liagai da. 15 Caihakecime samdung de aide ga kesuizwalu, ainzwa eh Kesanglaisiu ga rauteula,

16 ‘Ma aidungde cai Ih cailigwang zie,

nah Ih David paiki kau kedide teidai luzie;

nah cide siakedidung Ih retak daizie nah pwa cuhdai luzie.✝

17 Ciu eh zang kela minadung de peu Rampaube de peeilu kerane,

Gentilemedung a zi qu kelume pelane de si eh.’

ainzwa eh Rampaube, ma aidungde tei kelube 18 ndaa gede aidungde peu ci kegaibe rangla.*

19 James rangsi eh, ciziemne, a kecet au, Tinggwang da nreu gwangkelu Gentileme de anui teikeherei kerabe ma. 20 Dede anui penui dage mamie kereca kehera* gade, nah kemmha ta gade, nah kak ketset makaunedung teih gade, nah hejai ketyei gade penuide ketiplu maisia lie raugai maisia. 21 Kedanemene ndaa gwangkedi ceheu gade Moses zaide namdi leune ga ledeu la dida nah Sabbath ramsang synagoguedung gade pe samdung peila."

22 Pecai langkegaime nah hangkiamedung, ngqwa pelane de ngngwa penui kakgade midung gede kedetlwe Paul penai Barnabas de ngngwa Antioch gage langgai kera kesuiswalu. Cine penui kenlumme kakgade muiteume Barsabbas lie qukela Judas penai Silas de langgai. 23 Penui penai dage laisiu aiznawa raulwe langgai: "Langkegaime nah hangkiame, nnui sinamedung Antioch, Syria nah Cilicia ga kebam Gentileme sinamedung de kelum gaila! 24 Mina kangge anui dade magede keteu mene mie penui samrang le nnuide kebwak eh nnui lung teikeherei lie kecu anui siuda. 25 Cine anui gwang ngkwalwe mina kangge de kedetlwe nnui dage anui hungkelabe Barnabas penai Paul de ngngwa langgai kera kesuizwalu, 26 anui Rampaube Jisu Khrista zi ziemne penai teilung kerehim gage kai kebeube kena. 27 Ciziemne anui Judas penai Silas de langgai la, penai anui raukegai kesiak ge nnuide penai sam gade ranglia zie. 28 Kedanemene kemci Rabe nah anui de nnui reu ga hepüt kerüt kai mene maisiabe aidungde kaide yitu kera cetlu: 29 mamiedung de ratak teibeu kedi ketyeipok tyei so, nah hejai tyei so, nah kak ketset kaunedung tyei so, nah kemmha ta ketei gade nnuide kezeulu. Nnui aidungde mbai lucai, nnui yi luzie. Yi eh bamlu."

30 Cine penui hang mdaibau, penuide lang kegai dau penui Antioch ga nghunglu; nah penui maadibe de qu hekwa luge, penui laisiu de peubeudi. 31 Penui laisiude pei kegaidau, kecung kegai samde ziemne penui suiyi sütlu. 32 Judas penai Silas, penaide caihakecime ge kecunzwa, kenlumme dage sam kekiee ge teu kecunggai nah penui kenlum teingkienglu. 33 Penai cika tingkakge bam kelucai, kenlummedung penaide lungciep teu langcaili pwa penaide langkegaimedung dage langgai. 34 *[Dede Silas cika bam kera pe suikidi.] 35 Dede Paul penai Barnabas Antioch ga bamdi, mi kedame kekiee de ngngwalwe Rampaube sam ledeu nah zierang teibam di.

36 Dede peting tie kemakge cai, Paul Barnabas dage rangdi, "Cu anai cailigwang delwe anai Tinggwang sam teu zierang teikegai namdi leuna ga kenlumme de redau go, nah penui dainzwa bamla bi mie piego." 37 Barnabas Mark lie qu kelabe John de penaide ngngwa gwang neudi. 38 Dede Paul Mark de ngngwa mede yi lie cetdi, kedanemene Mark penaide Pamphylia gade gidi eh penaide ngngwa heta tei sita kedine. 39 Ge cika kesamlim süt cuhdi eh penui hangge ge dade kelamtsamdi, nah Barnabas Mark de ngngwalwe liem gade Cyprus duigwadeu gage tet gaidi. 40 Dede Paul Silas de kedetlwe tetdi, kenlumme ne pecu Rampaube ngaugia gage kai pwapeu kedicai. 41 Pecai pa Syria nah Cilicia* cuikui ga tetkah gwang ngqwadung de teingkieng gai.