1 Pecai Paul baudi peupeime de pielingci gai eh rangdi, "Sinamedung, Ih henai kecang Tinggwang dwagade a lungcet petau eh lungh gwang lie." 2 Ge cingkupei kedibe Ananias pe taiga kesapmedung de pe mui gage kepeu lo aja kaigai. 3 Ge Paul pe dage rangdi, "Tinggwang ncu kepeu lai zeuda, nang tangdeu pwet ha pwa kebambo.* Nang hezaibe gade a tutiak zielie bamni, dede nang hezaibe gikah eh acu kepeu lo zeuni?" 4 Dede cika kesapmedung rangdi, "Nang Tinggwang cingkupei kedibe de kii zeuni?" 5 Cine Paul rangdi, a sinamedung, "Ih pa cingkupei kedibe lie kecu cima, kedanemene Kesanglaisiu ga ainzwa rau pwala,

Nang n minadung reu hegwang gede de rangmsia so."✝

6 Paul baudi maage Sadduceeme nah keda maage Phariseeme kecu ngau luge, pa baudibe dage sahbak eh maranggai, "Sinamedung Ih au Phariseeme ge, Phariseeme napei ge. Ketsaime ge ringcuhdai kera keregui hade ziemne a tutiak bam." 7 Pa aide rang kegaidau, Phariseeme nah Sadduceeme kakga kesamlim cuhdi eh hemaabe mzi tsamdi. 8 Kedanemene sadduceeme ketsaime ringcuhdai kecu, mede tinggimgwamedung, mede rabedung gah lie rangla, dede Phariseeme au cidung pelane bamlie la. 9 Cine kebwak mdisüt cuhdi, nah Phariseeme maa ga hezai keledeume kangge cuhlwe rang reniadi, "Anui mina aipaude da kemau gede ngau luma. Dede rabe ge mede tinggimgwabe ge pecu mpau mi?" 10 Cika kesamlimsüt kedidau, reugwa muibe mine Paul de teurak kecaidi kera hingdi, cine pa reugwamedung de nghung delwe baudi peupeime kakgade pecu teu mpetlwe pecu kengkieng reketbam bam ga ngngwa gwang lulo aja kaigai.

11 Dede cipau ziu Rampaube pe taiga saplwe rangdi, "Kuulu Paul, kedanemene nang Jerusalem ga a zierang tei kegai nzwa, Rome namdi gade de nang a zierang tei maisia lu."

12 Pecai benai, Jewme kangge heciem ge riemlu, penui Paul de teitsetdi kemakta matyei masak laklie sampetlu. 13 Heciem cide riem kecume mina riakdai swade kiee bam. 14 Penui cingkupei kedimedung nah hangkiamedung da mie delwe rangdi, "Anui Paul de teitsetdi kemaktane matyei laklie reset gele anuide kang dida." 15 Cu, ciziemne, nang baudibe de nzanglwe reugwa muibe dade Paul ha ci mcineu kecu ciem teilu, iciude pa pecu nnuida ngngwa nghungbeu zie. Pa aika gwangcang kemakdwa anui pecu teitsetdi kera mtei luda. 16 Dede Paul tipui napei mi pecu swa pwabam lie kecu siulu, cine pa kengkieng reketbam ga gwanglwe lüt Paul dage ranglia beu. 17 Cine Paul haireu kedime hangge de qulwe rangdi, "Rehang aipaude reugwa muibe da ngngwa gwang beulo, pa pe dage madungge ranglia kera bamlie." 18 Cine haireu kedibe rehangbe de reugwa muibe da ngngwa gwanglwe ranggai, "Paul hebaangtei kebambe acu qulwe acu rehangpei aipaude de n da ngngwa gwang beulo zeulie. Pa n dage madungge rangkera bamlie." 19 Cine reugwa muibe pe ba teulwe pecu teu ntsamlwe keteugai, "Nang acu ranglia kera kelade daipai no?" 20 Ge rehangpei rangdi, "Jewmedung kesamteilwe ncünne peu ncu Paul de baudibe da ngngwa nghung kera kie zielie bam dida, penui pe ha madungge ci mci keneu ciem teilwe. 21 Ciziemne nang penui sam kingneidi kerabe ma, kedanemene mina riakdai swade kiee eh pecu swa pwabam. Penui pecu teitsetdi kemaktane matyei masak laklie penuide reset gele kang pwabam dida. Cu penui nang sam kaibeu kera kwabam." 22 Cine reugwa muibe rehangbe de, "Nang a dage ma aidungde kerangde midage de rang helo," degai eh peu pecu tetdi.

23 Pecai haireu kedibe hangna de qulwe ranggai, "Caesarea namdi ga kecang mie kera reugwame haina, hekwen keteume riakhena, hengei kepwame haina mtei lulo. Penui tingmui bam hekui dau tet zie. 24 Pa Paul de punglu kera makaunedung de mteigai beulu delwe pecu deuceudibe Felix* da ngngwa gwang teune beulo eh penuide aja kaigai. 25 Pecai pa laisiu ainzwa raugai. 26 Claudius Lysias ne yikemtingbe deuceudi Felix dagekekai: kelum gaila. 27 Mina aipaude de Jewme ne tuilu nah penui ne pecu teitset dizie lie bam. Ih pa Rome deuketme lie kecu ci luge Ih a reugwame de ngngwa penui dade pecu kelilu. 28 Pecai penui daiziemne pecu mmau bambi kecu Ih cineudi, cine Ih pecu penui baudi da ngngwa hung. 29 Ih penui katei penui zai hale pecu mmau kebam cilu, dede pa tsailu kebui mede hebaang tei kera kemau gede teima. 30 Pecai pe dage teigai kera heciem riem kebam acu ranglia, cine Ih zette pecu langpwa n dage kaila, nah pecu mmau kebamme dede gwang n dwade pecu kemmau sam rang lulo beu dida."

31 Cine reugwame penuide aja kai kebeu nzwa Paul de ngngwalwe pecu tingmui gage Antipatris nam ga ngngwa gwangdi. 32 Pecai benai, reugwame kekiee ge kengkieng reketbam ga caili gwangdi, dede penui hekwen keteume de Paul de ngngwa gwang lulo beudi. 33 Hekwen keteume Caesarea ga lüt luge, penui laisiu de pwa deceudibe de peudi delwe penui Paul dede pecu ngngwa gwanggai beudi. 34 Ge deuceudibe laisiu de peigai delwe Paul de dai deuceu gade gwang lano keteu. Pa Ciliciame lie kecu ci luge, 35 pa rangdi, "Ih n ngauraume de aika gwang lude n sam kingnei siakte zie." Pecai pa pecu Herod hegwangki gage kainzeu lulo aja kai beudi.