1 Cidau cingku kedibe keteudi, "Aidungde kesang deni?" 2 Ge Stephen keligai,

"Mipeimedung, sinamedung, nah a peimedung, a sam kingneilo: Anui pei Abraham, Haran ga pa kelungh dwa, Mesopotamia ga kebamdau Tinggwang kendu pecu liagai; 3 nah pa pe dage ranggai, ‘N kibaume nah n deu pütdi delwe Ih ncu keulia kera deu dega mie lulo.’* 4 Cidau Abraham Chaldeanme deu gade mpetlu delwe Haran ga lunghdi; cikade, pe pei tsai dige, Tinggwang pecu ngngwa gwang cu nnui lungh kebam deude gage kaibeu.* 5 Dede cika pa pecu mabam gede peuma, mi pideu tie nage de. Dede pa pe na gah liede, pecu nah pecai pe leuhme de hangdeu gum kera peu zielie sampet beu. 6 Dede Tinggwang pe dage ainzwa ranggai, n leuhme au cikemakme deuga sangme ge zie, nah cika kebamme penuide peu hebaangme ge teizie nah penuide mmi hai mdai ge peu reisüt zie. 7 Tinggwang rangdi, ‘Dede Ih penui kila teikela leuh de mmau zie, nah cipaucai n leuhme tetmpetlwe heni aide gade acu reca zie.’ 8 Ge Tinggwang Abraham dage hegeukerum samkak* zai de kaibeu, nah Abraham pe na Isaac lunghlu eh pecu lang hesetne benai pe geu rumlu; nah Isaac pe na Jacob lunghlu, nah Jacob dade anui paume kereiekena bau lunghlu. 9 Jacob namedung penui sinabe Joseph de penui riak eh pecu Egypt gage zwa gaidi. Dede Tinggwang pecu ngngwa la 10 nah pa keherei leune gade pecu kelibeu. Pa pecu Egypt gwangpei Pharaoh dwade maci peu nah peu pecu ngau pe suilu, nah peu pecu Egyptme reu nah pe kilungme pelane reu kedi teilu. 11 Cu Egypt nah Canaan pelane ga herakum kum gwang, nah cide ne keherei sütdi, nah anui paume ketyeipok ngaugai lakdi. 12 Dede Jacob Egypt ga taktyeipok bamlie kecu siu luge, pa anui paume de cika kemie raitube tei eh langgai. 13 Nah pe kenabe kemie ga, Joseph pe sinamedung depeu pecu cigai, nah Joseph kilungme de Pharaoh cilu. 14 Pecai pe sinamedung de langcaili gai eh Joseph pe pei Jacob de nah pe kibaume pelane de qugai, pelane ge riakhena-mengei. 15 Cine Jacob Egypt ga miedi, nah cikade pa nah anui paumedung tsaidi. 16 Penuide Shechem gage punggwanglu delwe Abraham ne Shechem ga Hamor name dade rangkang le luikelu herau gage kaizeu dida. 17 Tinggwang Abraham dage sampet kebeude tei kera ting nna gwang ge, minadung Egypt ga lungh kiee süt petlu, 18 Egypt deu reuga hegwang kedage Joseph de ci kemak ge cuh kemaktane.✝ 19 Hegwang aide anui leuhme de cwa nah anui paumedung dade pe zaisia, penui kemei tei eh penui na ngienadung depeu lungmpet gai, iciu eh peu penuide tsaidi kerane. 20 Cipau tingdau Moses de mnalu; nah pa Tinggwang dwade hezu yisüt. Nah pecu pe pei ki gade keicum ge ngkwet cuhlu.✝ 21 Nah pecu hegwale ge lungmpet kegaidau, Pharaoh napui pecu pe na teilu eh pekatei pe na nzwa pecu ngkwet cuhlu. 22 Moses de Egyptme maci pelane pwa ledeu beu, nah pa pe samrang nah pe bata ga ngkiengsüt. 23 Dede pa mmi riakdai kedidau, pa pe sinamedung, Israelmedung de redau kera pe lungningdi.✝ 24 Nah Israelme gede teukehei teikebam ngau luge, Moses pe lam sap nah pe kum pei eh Egyptme peide teitsetdi. 25 Kedanemene pa pe sinamedung Tinggwang pecu teu penuide teumpet beu zielie kecu cilu zieha de cet, dede penui aide ci luma. 26 Pecai benai pa Israelme kangge nggi kebam ga gwang, nah pa penaide nggnwa kezuyi lulo eh ranggai, ‘Nnui au caihereiswacing, daitei eh nnui hangge ge de tei rejam bamno?’ 27 Dede pe kidabe dage kemau tei kegaibe Moses de cwakgidi eh rangdi, ‘Caune ncu nai reu kedibe nah tutiakbe tei beuno? 28 Nang nziene Egyptme peide teitset kedinzwa, nang acu de teitsetdi neu lani?’✝ 29 Sam aide rang kegaidau Moses pakdi, nah pa Midianme deuga sangme ge teila di, nah cikade pa pe na hangna lunghlu. 30 Mmi riakdai ge gwang kedicai, tinggimgwame ge hetaideu ga Sinai Deutu tsinghum gega miheu gade peu pecu ngaugai.✝ 31 Moses mi cide ngau luge, pe swagahdi; nah pa cide pie zielie petge, pa Rampaube kwa siu:✝ 32 ‘Ih n paume Tinggwang, Abraham, Isaac, nah Jacob Tinggwang.’ Cidau Moses mbeudi nah piegai kera ngngidi. 33 Ge Rampaube pe dage rangdi, ‘N pi gade n picum lwakdi, kedanemene nang sap kebam nide au kemci nilu.✝ 34 Ih Egypt ga kebam a minadung keherei kebam ngau kesangda, nah Ih penui mra kegai kwade siu eh Ih penuide kelilu kerane hung bam; cine gwanglu, Ih ncu Egypt gage langgai zie.’ 35 Moses aide de nda penui mlai kedibe da, ‘Caune ncu anai reu kedibe nah tutiakbe tei beuno?’ de rang eh. Pa au Tinggwang ne tinggimgwabe tsinghum gade Moses de peu ngau kegaibe de ngha teu mina reu kedibe nah kelikelube tei zielie langkegaibe da. 36 Moses aide Egypt gade nah jaaidi kegie gade nah mmi riakdai ge hetaideu gade miswakegah nah mimakecang batadung tei eh penuide Egypt gade ngngwa mpetbeu. 37 Moses aipaude Israelme dage ranggai, ‘Tinggwang acu teucuh kebeu kenzwa nnui sinamedung kakgade caihakecibe gede teucuh beuzie.’✝ 38 Pa au hetaideu ga hemaabe de ngngwa kelabe deda, nah Sinai Deutu gade tinggimgwabe pecu mpau kecube deda nah anui paume de ngngwa kelabe deda; pa kering sam anuide pwapeu kera ngau kelube deda. 39 Dede pa au anui paumedung pe sam pungrau kedibe deda, penui pecu mlaidi eh penui lung Egypt le ge nreucaili gaidai di. 40 Penui Aaron dage ranggai, ‘Anui lampui sauliabeu kera rabedung tei beulo. Kedanemene Moses, anuide Egypt gade ngngwa kempetbe de au daitei dibi anui ci meda.’ 41 Cine penui cidau ketumna ge teilu delwe mamie cide de ratak tei pwapeu, nah penui bata de ziemne penui suiyilu.✝ 42 Dede Tinggwang penui dade nreu delwe penuide pütdi, caihakecime laisiukwak gage rauteu kelanzwa, penuide peu tinggim ga hegidung de reca ladi kerane.

‘Israelmedung, nnui mmi riakdai ge hetaideu ga keladau,

makaunedung daptsetlwe acu reca nah ratak teibeu ni?

43 Nnui rabe Molech* reca paiki de pwa luda,

nah nnui rabe Rephan hegi de,

nah nnui reca kera tei kelu miedung de;

cine Ih nnuide Babylon gwale ge langgi dizie.’✝

44 "Anui paumedung hetaideu ga keladau zierang paiki de penui dala. Cide Tinggwang Moses de rang kebeu nzwa, pa kengau rehi de nzwa teilu. 45 Reca paiki de ngau keludau, anui paume Joshua kangga de, Tinggwang ne gwa mpetkedi heleuhdung deu penui gumkelu ga cide punggwanglu. Cide David tingdau kecang cika bamdi. 46 Pa Tinggwang miakngau gade petaube teilu, nah pa Jacob Tinggwang ziemne bam kera heni ge tei kera kie. 47 Dede Solomon ne Tinggwang ziemne ki de teilu. 48 Dede Hutube heba le ketei ki ga lungh lama, caihakecibe kerang nzwa,

49 ‘Tinggim au a hegwangbam, nah kideu au a pidau.

Nang a ziemne ki daikenzwa ge teilu buino? de eh Rampaube rangla,

mede Ih mtak kera ni daipai no?*

50 Aidungde pelane a ba ne teigai de meni?’✝

51 Nnui lung ketakmedung, nah nnui lung nah nnui kwen hegeurum kemakmedung, nnui Kemci Rabe de renia mui lala. Nnui paume reniakela nzwa nnuide reniala. 52 Nnui paumedung caihakecime caube de tei keherei meno? Penui Kesamsangbe gwangkera mrairang kegaimedung de teitset dida, cu nnui au cipaude de kecwabe nah teitset kedimedung dida,✝ 53 nnui Moses zaidung tinggimgwame dade ngaulu dede cide mzai kemakmedung."

54 Ma aidungde siu keludau, baudi peupeime penui rata sütdi, nah penui Stephen de penui rata eh geigimdi. 55 Dede pa, Kemci Rabe puipung eh tinggim ngangcu piegai nah Tinggwang kendu de ngau; nah pa Jisu Tinggwang ba zetle sapbam eh ngau. 56 Stephen rangdi, "Ainie, Ih tinggimdung ngkei kegai, nah Mina Nabe Tinggwang ba zetle sap kebam ngau." 57 Cidau baudi peupeime penui kwen ngketlwe sahbak eh mrung eh pelane de peda pak gwang. 58 Pecai pecu namdi gwale teukerei mpetlwe penui pecu tangtsu le sam. Zierangmedung penui pai gaulwe rehangme ge Saul lie kecu pi gage kaidi. 59 Penui Stephen de tangtsu le sam kebamdau, pa kiegai, "Rampaube Jisu, a rabe de ngngwa lulo."✝ 60 Nah pa kwaktung mie sahbak gai, "Rampaubo, aipau maude peu penui reuga gwangdi helo." Pa aide ranggai eh tsaidi.