1 "Sinamedung, nah a peimedung, cu Ih nnui dage a nzeu kerang kingnei gailo."

2 Hemaabe Paul penui dage Hebrewme let gade sam kerangde siu luge, penui zingde kidi. Pecai pa rangdi,

3 "Ih au Jewme pei ge, Cilicia ga Tarsus namdi gade acu mnalu, dede aipau namdi Jerusalem gade Gamaliel kangga de maci peeilu. Acu anui paumedung zai rehi gade mtingsüt eh ledeu beu. Henai nnui pelane nzwa eh Ih de Tinggwang ziemne a lung neisüt lie. 4 Ih aipau Khrista Lampui de caisuikelame de mipei de nah mipui de kanglwe penuide hebaangki gage kai eh ketsai kecang teikeherei, 5 cingkupei kedibe de nah hangkiamedung a a zierang aide tei lubui. Ih penui dade Damascus ga kebam siname ziemne laisiu ngaulu, nah cika kebammedung de tuiteu Jerusalem ga ngngwa cailigwang penuide saja peu kerane Ih cika mie kesang da. 6 Ih Damascus ga mbeuh nna gwang ge, tingna hige zette Tinggim gade baaha kecuge acu gi mbaa twagwadi. 7 Ge Ih hangdeu ga kaumie nah makwa ge a da rang eh siu, ‘Saul, Saul, nang daitei acu teikeherei lano?’ 8 Cine Ih keligai, ‘Nang cauno, Rampaubo?’ Ge pa a dage rangdi, ‘Ih au Nazarethme Jisu, nang teikeherei kelabe.’ 9 Acu ngngwa kelame kebaa cide ngau kesangda, dede a dage makerang kwade penui ci luma. 10 Pecai Ih ranggai, ‘Ih dai teilai, Rampaubo?’ Rampaube a da ranggai, ‘Cuhlu delwe Damascus ga miecu, nah ncu peu tei zielie nlumpwa kebam leune cikade ncu ranglia zie.’ 11 Kebaa de ziemne Ih mangau ta kedine, acu ngngwa kelamedung ba teulwe Ih Damascus namdi ga gwanglu. 12 Cika Ih Ananias lie kecu pei gede daulu, hezai ga ntipsüt kelame ge nah Jewme cika lungh kebam pelane pe ha rang hemisüt bamla. 13 Pa a da gwang a taiga saplwe a dage ranggai, ‘Sinabo Saul mangau lulo.’ Cipau ting siakdau Ih pecu ngaulu. 14 Pecai pa rangdi, ‘Anui paume Tinggwang peu pe lungning cilu kerane, nah Kesangbe de ngau eh peu pe mui gade kepet kwade kingneilu kerane ncu kedetlu. 15 Ciu eh nang ngau nah siu keludung de mina pelane da nang pe zierang teilu kerane. 16 Cu nang daitei kwa bamno? Cuhlu delwe duipum teilu, nah pe zi qu eh n maudung hui dilu.’✝ 17 Ih Jerusalem ga caili gwang dailwe kerecaki ga kekie tei bamge, Ih marengei ge ngau. 18 Ih pecu ngau, pa a dage rang eh, ‘Kelwalu, Jerusalem gade zette tet dilu, kedanemene penui nang a ha zierang ketei luu laklu.’ 19 Ih ranggai, ‘Rampaubo, penui penuikatei de Ih synagogue pelane ga ncu kenlumme de dap delwe hebaangki gage kai kela cibam. 20 N zierang keteibe Stephen de teiketset dau, Ih de cika sap eh kesuizwa bam, nah pecu teitset kedime painidung Ih kwabam.’ 21 Dede pa a dage rangdi, ‘Miecu, kedanemene Ih ncu kemdei Gentilemedung dage langgai zielu.’"

22 Pa aide rang kecu kecang penui pe sam kingnei bam. Pecai penui sahbak eh ranggai, "Cikenzwame depeu kideu gade tet dilu, kedanemene pa ringbam kera petau melu." 23 Penui mrung nah penui niadung keliengi nah tambüt tingkai gage keliengai kebamdau, 24 reugwa muibe Paul de kengkieng reketbam ga ngngwalüt dilo aja kaigai. Penui daiziemne Paul de ngaurau eh sah bambi kecu cilu kerane pecu dap eh keteu lo sam kaibeu. 25 Dede penui pecu dap kerane kang luge, Paul haireu kedibe pe taiga sap kebambe dage rangdi, "Nnui Romme gede pe tutiak mene dap kera cide nnui hezai deni?" 26 Haireu kedibe aide siu luge, pa reugwa muibe da mie delwe peda ranggai, "Nang daipai tei laino? Aipau pei de au Romme deuketna lu." 27 Cine reugwa muibe peda gwang eh keteu, "Acu ranglia lo, nang Romme deuketna ni?" Paul keligai, "Yeo, Ih Romme deuketna lie." 28 Pecai reugwa muibe keligai, "Ih deuketna tei kera rangkang kekieege le luilu." Dede Paul rangdi, "Dede Ih au, mnakelu gade Romme deuketna gelie." 29 Pecai pecu ma keteu zielie kelame zette pecu gidi. Reugwa muibe de Paul Romme deuketna lie ci luge pa ngngidi, kedanemene pa pecu kang kedine.

30 Pecai benai, reugwa muibe Jewmedung daitei Paul de mmau bi kecu kesangbe ci neudi. Cine pa pecu hiakdi delwe cingku kedimedung nah baudi pelane de gwang hekwa lulo aja kaigai. Pecai pa Paul de ngngwa nghunglwe pecu penui dwaga peu saplu.