1 Makehebwak de cang dige, Paul kenlumedung de qugai eh pa penuide kecunggai, pecai pa kelamna sam ranggai eh Macedonia ga mie kera tetdi. 2 Pa cipau cuikuidung ga kahgwang eh sam kekiee ge rangpwa penuide teingkuu kegai cai, pa Greece deudi ga gwangdi. 3 Pa keicum ge cika bam kelucai, pa liem gade Syria deudi ga mie lai eh kebam dau Jewme pecu mmau kera ciem riemlu, cine pa Macedonia lamde cailigwang kera cetlu. 4 Pecu nzang kelamedung cai Bereame Pyrrhus napei Sopater, nah Thessaloniame Aristarchus penai Secundus, nah Derbeme Gaius, nah Timothy, nah Asia cuikui gade Tychicus penai Trophimus. 5 Dede mina aidungde anui dwa gwanglwe Troas ga anuide kwabam. 6 Tsehikaikemak tangku keru Ngyi cang kedicai anui Philippi namdi gade liemtau gai, nah lang mengei ne kakgage anui Troas namdi ga penuida gwanglu. Cika anui lang hena ne bamdi.

7 Pecai mtakkak zie raitu benai, anui tangku pang tyei kera gwang ngkwa luge, Paul kenlummedung dage marang. Pa pecai benai tetdi kera riem bam, cine pa tingmuisum kecang marang jüja bamdi. 8 Anui ngngwa kangbau kebam kibung nreube ga mibung kekiee ge mtau bam. 9 Hebaki taiga rehangme ge pe zi Eutychus ntumbam, nah pa ziep zing miedi. Paul marangtie kedi dau aipau rehangpei de ziepmang eh kiset pekecumbe gade cakmie tsaidi. 10 Dede paul nghunglwe pe reu ga keumie pecu tuipwalu. Pecai pa rangdi, "Nnui lung keherei sita dilu, kedanemene pa ring bamlu."✝ 11 Pecai pa nreule nghang dailu delwe tangku panglwe tyeilu. Pa penuide ngngwa peting ketie ge baareirang kecu kecang mpau bam eh tetdi. 12 Cine penui rehangna de ring eh ngngwa gwanglu nah penui lung nciep nieplu.

13 Dede anui Paul dwa rai eh liem ga mie delwe Assos namdi gage liem taugai, cikade anui Paul depeu liem ga nlütlu kera cet eh. Pa aide tei kera pekatei mteilu, kedanemene pa pe pile tetgwang kera riem kelune. 14 Pa anuide Assos gade dau luge, anui pecu liem gage ngngwa gailu delwe Mitylene namdi ga gwangdi. 15 Pecai anui cikade liem taugai eh pecai benai duigwadeu Chios de mcwa kebam ga gwanglu. Pecia benai duigwadeu Samos ga gwanglu, nah pecai benai anui Miletus namdi ga gwanglu. 16 Paul Asia gage peting nggwangdi melu kerane Ephesus liemtau kahdi kera cetlu; kedanemene pa teilubui cai, Pentecost benai Jerusalem ga gwanglu kerane kelwa kelane.

17 Cine Miletus gade pa Ephesus gage mide langgai eh ngqwa ga hangkiamedung de qu nggwanglu. 18 Penui pe da gwang luge, pa penui dage rangdi,

"Ih Asia ga gwangkelu raitu benai gade dainzwa eh Ih peting pelane nnuide ngngwa bambi nnuikatei cibam. 19 Jewme ciemdung ziemne a da kehereisüt kecu kegwang daude, Ih henah cangsiak eh a miakdui lwa eh Rampaube gwatei gwang. 20 Nnuide nghalu kebui sam Ih magede ranglia mene nnui dade kainzeudi kemak, nah Ih dainzwa mteibe dwagade nah kige gade kige ga lüt eh Ih nnuide ledeubi kecu nnui cibam, 21 Jewme nah Greekme de Tinggwang dage helungnreu lulo nah anui Rampaube Jisu de nlum lulo zierang tei kecu. 22 Cu pielo, Kemci Rabe samzai tei eh Ih Jerusalem ga gwang laizeu, cikade a dage daipai tei ziebi ci mene, 23 Kemci Rabe ne a dage hebaang ketei nah keherei kecu rünne namdi leune ga acu kwabam lie kerang de gwale. 24 Dede Ih a ta nah Rampaube Jisu acu teilo kebeu zierangta, cide Tinggwang ngaugia samliakeyi zierang sünne eh ranglo kebeude tei canglu kera gwale, Ih akatei de a teilung au magede melie cetla. 25 Cu ainie, Ih Tinggwang hegwangram ha zierang tei eh nnui pelane kakga gwang da nah nnui a zu ngaudai kelak Ih cibam. 26 Ciziemne Ih henai nnui dage rangla, nnui keheibe kapdi liede, a zie melie. 27 Kedanemene Ih Tinggwang lungning pelane nnui dage ranglia mene kaizeu pwa bamdi melu. 28 Nnuide nah Kemci Rabe nnuide pie kerengeibe tei kebeu meurünhau pelane de pie teune lulo. Tinggwang pa pekatei pe jai le pwa luikelu ngqwa de kwa kera sünne lulo.✝ 29 Ih tet kedicai mina heneu pe zaikesiabe nzwa nnui kakga gwangzie nah meurünhau de mbaibeu kelak Ih cibam. 30 Nnui kakgade de mina kangge kenretdung rang gwang zie nah kenlumme de penui lambie teu gaidi zie. 31 Cine mriak bam lulo. Ih mmi kecum ge mtak mene a miakdui lwa eh tingmui tingba nnui pelane de ledeugwang kecu nsung lulo. 32 Cu Ih Tinggwang nah pe ngaugia sam, cide nnuide tei hemi beulu kebui nah nnuide kemcime pelane kakga nnui qwa peulu kebuibe dage nnuide nlumgai beula. 33 Ih mige gu rangkanggeu mede kecak mede paini de hengin ma.✝ 34 Ih aipau ba kena de keu a ziemne nah acu ngngwa kelamedung teumaikesiabe teigwang kecu nnuide cibam. 35 Aidung pelane gade Ih nnuide Rampaube Jisu samdung, "Ngau kelube swa au mide kepeube samlam pungki lie," de kerang de nsunglwe anui matatei nri eh mnei kelamedungde ngha maikesia keulia gaida.

36 Paul aidungde rangcang kedicai, pa keumie koktung delwe penui pelane de ngngwa kekie tei. 37 Ge cika penui pelane hapsüt eh Paul de tuipwalwe pecu kemamgai. 38 Penui suisia kidi, kedanemene penui madaude pe zu ngau dailak delie de pa rang kegai ziemne. Pecai penui pecu liem ga ngngwa miedi.