1 Peter penai John minadung dage marang kebamdau, cingkumedung nah kerecaki kekwame reu kedibe nah Sadduceemedung penai da gwang. 2 Penuide kebwak sütdi kedanemene Peter penai John Jisu ketsai gade ringcuh daikelu ha mina de ledeu nah ranglia kebamne. 3 Ciziemne penui penaide tuilu delwe hebaangki gage pecai benai tingcang kemaktane kaizeudi, cipau hidau tinghegi di kecune. 4 Dede mina kekiee ge samlia siu kelume Jisu de nlumlu; nah nlumkelume mina cang mengei kenzwa ge.

5 Pecai benai penui reu kedimedung nah hangkiamedung nah laisiukecime Jerusalem ga gwang ngkwalu. 6 Cingkupei kedibe Annas, nah Caiaphas, nah John, nah Alexander, nah cingku kedibe kelak pelane si eh bam. 7 Peter penai John de penui kakga ngngwagwang kelucai, penui penaide keteudi, "Daipai kengkieng gade, mede cau zi gade nnai aide teilu no?" 8 Cidau Peter Kemci Rabe le puipung eh penui sam keligai, "Nnui mina reu kedimedung nah hangkiamedung,* 9 anai dade henai kemnoime dage bata keyi tei kegai nah pecu dainzwa tei ngkeilu dibi keteucai, 10 aide peu nnui pelane nah Israelme pelane de ci lulo, cide Nazarethme Jisu Khrista, pecu nnuine gwaktsetdi, dede Tinggwang ketsai gade teucuh kebeube zi gade lie, pe ziemne mina aipaude yimcang eh nnui dwaga sapbam delie. 11 Jisu Khrista au nnui ki keteime mlai kedi tangtsu deda, dede cide keu kimiaktsu tei dida.* 12 Kelikelu au mige dade gah, kedanemene Tinggwang tinggim kangga minadung kakga hezi keda gede anuide kelilu kera peu melu."

13 Penui Peter penai John kuusüt kecu ngau luge, nah penai laisiu cikemak, nah maidakme gelie kecu ci luge penui swagahdi, nah penui penai Jisu de ngngwala kecu cilu. 14 Dede yikelube pei penaide ngngwa sap kebam ngau luge, penui penaide magede rangmsia kera gahdi. 15 Dede penui langkegaibe kena de kempau kangbau gade mpet dilo aja kai kedicai, penui katei penui kakga kempaudi. 16 Penui rangdi, "Anui aipau pei kena de teu dai teilai? Kedanemene penai miswakegah bata tei kegaide Jerusalem ga kelunghme leune ci pet dida, nah anui cide malie dau lakta. 17 Dede minadung kakga rangmdi si melu kerane, anui penaide hezi aide teu mida gede marang sita lulo kaambi di golie." 18 Cine Peter penai John de kilung ga qu nlütlwe, penaide Jisu zi teu marang mede ledeu tadi lulo aja kaigai. 19 Dede Peter penai John penui sam keligai, "Tinggwang dwade Tinggwang samzai tei kera swade nnui sam mzai kerabe petau mi, nnui cet lulo. 20 Kedanemene anui ngau nah siu kelube rangme gai laklu." 21 Penui Peter penai John de keheu gai eh penaide peu tetdi. Minadung ziemne penui penaide teikeherei dau lakdi, kedanemene penai tei kegai ziemne mileune Tinggwang de twabam kedine. 22 Kedanemene teingkei kelu miswakegah bata aide mmi riakdai swade cing kedi peige dage tei kegaine.

23 Dede penaide lungmpet kebeu cai, Peter penai John penai zangme da gwang eh cingku kedime nah hangkiamedung penai dage kerang samdung pelane paubeu. 24 Penui cide siu luge, penui kwa ge tei eh Tinggwang dade kie, "Oh Kengkieng Rampaubo, tinggim, kideu, jaaidi, nah cika kela leune tei kegaibo. 25 Nang Kemci Rabe gade anui pau n kilabe David mui gade marang gai,

‘Daipai kie ziemne Gentileme penui rata lano,

nah minadung heciem kesiadung cetmning lano?’

26 ‘Kideu hegwangmedung penui sap ga saplu,

nah kedimedung gwang ngkwalu

Rampaube, nah pe Messiah de renia kerane.’✝

27 Kesang, Herod nah Pontius Pilate, Gentilemedung nah Israelmedung ngngwalwe n kemci kilabe Jisu, nang keniak kelube de renia eh namdi Jerusalem ga gwang ngkwalu.✝ 28 N kengkieng nah n lungning gade tei zielie mrairiem teukela pelane tei kera penui gwang ngkwalu da. 29 Cu, Rampaubo, penui mide keheu kecudungde pielo, nah n kilame de peu kuusüt eh n sam ranglo. 30 Ciziemne mide tei ngkeilu kera n ba hwagailo, nah peu mimakecangh nah miswakegah batadung n kilabe kemci Jisu zi gade teilo." 31 Penui kekie teicang dige, penui ngngwa ngkwa kebam ni de nlaidi,* nah penui pelane Kemci Rabe le kepui teilwe penui kuusüt eh Tinggwang sam rangdi.

32 Nlum kelumedung maadibe ngngwa lung ge nah sui ge teidi. Migede pe mabam pwa pekatei pegu lie tadi, dede penui ma pelane ngngwa kemacütdi. 33 Langkegaimedung ngkiengsüt eh, Rampaube Jisu ringcuhdai kedi ha pwa zierang teigai, nah Tinggwang ngaugia kedi penui pelane reuga bam ciaudi. 34 Penui kakga migede magah kecu bam dima, kedanemene pe tingdeu mede pe kidung kebamme cidungde zwadi delwe zwakelu gade ngaukelu rangkang teu gwanglu, 35 delwe langkegaime ba gage kaibeu, nah cide hang gege kecu dage pa teu maikesia kieege mzi kebeune.

36 Cinzwa eh Joseph, Cyprus gade mnakelu Levime ge, langkegaimedung pecu Barnabas lie qukelabe (cide pekie Helungtaukemla nabe), 37 pe luhpak ge bam kelade zwalwe rangkang teugwang langkegaime ba gage kaibeu.