1 Cine Agrippa Paul dage rangdi, "Nang n nzeu ranglu buida." Ge Paul pe ba hwagai delwe pe nzeu rangdi.

2 "Hegwangpei Agrippa, Jewmedung acu mmaukela pelane ziemne, Ih henai n dwade a nzeu rang lai eh kebam ziemne Ih akatei acu nggim lie cet bamlie; 3 keraide nang Jewme zaidung nah kesamlim keladung pelane cikap kecune. Cine a sam kingnei sünne gailo Ih n dage kiela. 4 Ih a henane gade, raitu gade a leuhme kakga nah Jerusalem ga dainzwa lunghcuh bi kecu Jewme pelane cibam. 5 Penui raitu gade acu cibam, penui zierang tei neu cai, Ih anui renet maa ga ncoktube, Phariseeme ge tei eh lungh gwanglie kecu zierang tei lubui. 6 Anui paume dage Tinggwang sampet kebeude ga a keregui kebam ziemne Ih cu a tu tiak eh aika sapbam. 7 Kedanemene aipau sampet de ngaulu kerane anui leuhme kereikenadung de penui lungsang tei eh Tinggwang de tingmui tingba recala. Hegwangpei Agrippa, aipau keregui de ziemne Jewmedung acu mmau bam delie. 8 Daitei Tinggwang ketsaime de kwak cuhlu kelude nnui nlumgai lak dino? 9 Ih akatei de Nazarethme Jisu zi de mmau eh Ih ma kekiee ge tei maikesia cetla. 10 Ih ma aidungde Jerusalem gade teida. Ih cingkupei kedime dade samde ngaulu eh kenlummedung kekieege de hebaangki gage kaidi, penuide teiketset dau Ih de penuide mmau kecu ga a ba hwa gaida. 11 Pia kekiee ge Synagoguedung pelane gade de penuide teikeherei nah Ih penuide peu penui kenlum rangmsia kera tei. Ih penuide ngaurausüt eh sangme nam ga kecangde gwang Ih penuide teikeherei. 12 Ih aide tei kebamdau, Ih cingku kedime dade kengkieng nah aja keulwe Damascus namdi ga mie; 13 nah tingna tingding dau lampui gade, Hegwangpei, Ih kebaa ge tingnaimiak swade baaki kecu tinggim gade kehung ngau, nah cide acu nah acu ngngwa mbeuh kelamedungde taumbaa twagwa lu. 14 Anui pelane hangdeu ga kauzeu dige, Ih makwa ge Hebrewme let gade a dage rang eh siu, ‘Saul, Saul, daitei nang acu teikeherei lano? A lungning de gikah delwe acu renia kela au n ziemne kemta lie.’ 15 Ge Ih rangdi, ‘Rampaubo, nang cauno?’ Ge Rampaube keligai, ‘Ih Jisu nang teikeherei kelabe. 16 Cu cuhlu delwe saplu; kedanemene heta aide teikerane Ih n dage acu liagai delu, ncu kedetpwa a kila teikerane nah nang acu kengaude nah Ih ncu keulia keradung teu eh a zierang teikerane;✝ 17 nah Ih ncu n minadung dade nah Gentilemedung dade kelibeu zie, nah Ih ncu penui dage langgai zie,✝ 18 iciu eh penui miak tei mrakgai delwe penuide peu kemui gade kebaa gage nreugai lu kerane, nah Satan kengkieng gade Tinggwang da nreugwanglu kerane, iciu eh penui maudung gikelu ngaulu nah acu kenlum gade teimci kelumedung kakga penui bam ngaulu kera ziemne.’ 19 Ciziemne, Hegwangpei Agrippa, Ih tinggim gade kegwang marengei kengaude mzaita dima; 20 dede, keraibe Damascus ga kebamme dage, nah pecai Jerusalem ga, nah Judea cuikui pelane ga, nah Gentileme dede, penui mau petlwe Tinggwang da nreugwang lulo nah heta keyi tei eh helungkenreu de luulu kebui teilu lo Ih ndulia dida. 21 Aide ziemne Jewme aidungde kerecaki gade acu tuilwe acu teitsetdi kera tei. 22 Ciziemne henai kecang Tinggwang ne ngha kebeune, Ih aika sap eh keceu kedi pelane dage zierang tei, makeda gede rang ma, dede caihakecime nah Moses penai kerang de tei gwang zielie— 23 cide Khrista keherei gai eh ketsai gade cuh raitube tei eh pa kebaabe pwa anui leuhme nah Gentilemedung dage ndulia kecu deda."

24 Paul ma aidungde rang eh pe nzeu rang kedicai, Festus sahbak eh ranggai, "Paul, nang mie dida; nang maci zu kedine ncu teimie dida." 25 Dede Paul keligai, "Ih au mie ma, yikemtingbe Festus, dede Ih au kesangbe nah kemcing samdung rangbam. 26 Hegwangpei aipau hadungde ci kebam, cine Ih de kuusüt eh pe dage marang gai, kedanemene aidungde kette pe dade mbaigai kelak Ih cibam; kedanemene aide kimiak ge gade tei melu. 27 Hegwangpei Agrippa, nang caihakecime de nlum ni? Nang nlum kecu Ih ci." 28 Ge Agrippa Paul dage ranggai, "Peting kedui aide gade nang acu peu Khristianme teilu kera a lung tei zeu ni?" 29 Dede Paul keligai, "Peting keduina ge mede peting ketie ge liede, Ih Tinggwang dade a kekie au, nang rünne ma, dede henai a sam siukelu pelane Ih nzwalu kerade delie, dede aipau hebaangki geuriadung si mene."

30 Ge hegwangpei, nah deuceudibe, nah Bernice, nah penuide ngngwa kebamme cuhlu; 31 Penui tetmpet kelucai, penui hangge gede resiu eh, "Mina aipaude tsailu kebui mede hebaang teilu kebui ta magede tei pwabam ma," dedi. 32 Cine Agrippa Festus dage rangdi, "Mina aipaude Caesar dage kiegai melie cai pecu lungmpet peudi lubui dege."