1 Cipau tingdau hegwangpei Herod* ngqwa ga peupei mi kangge de teikeherei cuhdi. 2 Pa, John caihereibe, James de kiengtie le bitsetdi. 3 Jewmedung aide penui suikedi pa ngau luge, pa Peter de de tuikera tei. Cu cide Tsehikaikemak Tangku Ngyi tingdau. 4 Pecu tuikelucai, pa pecu hebaangki gage kaidi, delwe reugwame hang mdai kecu maa mdai depeu pecu kwa kera kaibeudi; pa Kahkegwang Ngyi de cang kedicai pecu minadung dwa ngngwa gwang pe tutiak kera cet bamdi. 5 Cine, Peter de hebaangki gage kaidi, dede ngqwame pe ziemne Tinggwang dade kie sünne gai. 6 Herod pe tutiak kera teumpet keradwa beziu, Peter de geukap kena le kanglwe reugwame hangna kakga zipbam, nah kekwame kimuiki dwaga hebaangki kwabam. 7 Ainie, Rampaube samgwame ge zette eh peda gwang, nah hebaangki bung ga kebaage baa hadi. Pa Peter mbie gage deugai nah pecu ngkialwe rangdi, "Cuh zettelu," ge pe ba kena geukap cak mieddi. 8 Pecai tinggimgwabe pe dage rangdi, "N paini kailu nah n picum punglu." Cine Peter cinzwalu. Tinggimgwabe pe dage rangdi, "N pai bahlwe a caisuilu." 9 Cine Peter tinggimgwabe caisuilwe mpetlu. Dede pa tinggimgwabe tei kegaide kesanglie kecu cima. Kedanemene pa marengei ge ngau aulie cet kedine. 10 Pecai penai reketme keraibe nah kenabe de kahmpet namdi ga kenlüt hegeu rieki ga gwanglu; ge penai ziemne cide pekatei ngkeidi, pecai penai hegwale mpetlwe puidiki ge ga nghung, ge zette tinggimgwabe pecu pütdi. 11 Peter pe dage daipai tei gaibi kecu ci luge, pa pekatei pecu rangdi, "Ih cu Rampaube pe tinggimgwabe de langgai eh acu Herod ba gade nah Jewme hengin kebam pelane gade kelikebeu ci luda." 12 Pa aide ci luge, John, Mark liede de qukelabe pui Mary ki ga miedi, cika mina kekiee ge ngkwa nah kekie teibam. 13 Pa kirie kikam ketunggai kecudau, kilapui ge pe zi Rhoda* lie kecu gene pet ngkei beu. 14 Pa Peter kwa kecu ciluge, pe suiyi gade kikam ngkei mene kibung ga paknlüt Peter kikam ga sap bamlie eh paubeu. 15 Cine penui pe dage rangdi, "Nang mie auda." Dede pa cide kesanglie di. Ge penui rangdi, "Cide au pe tinggimgwabe." 16 Dede Peter ketung bamdi nah penui kikam ngkei gaige, penui pecu ngaulwe penui macangdi. 17 Ge Peter pe ba le penuide maciem teigai eh matu helo gai, nah Rampaube dainzwa hebaangki gade pecu lungmpet beubi kecu ranglia. Pa rangdi, "Aide James nah sinamedung dage ranglia lo." Cipaucai pa tetdi nah heni keda ga miedi. 18 Ting baapet ge, reugwamedung kakga Peter de daipai teidi bi kecu kehebwak ge bamdi. 19 Herod pecu peei eh pecu ngauluta dige, pa hebaangki kekwamedung de keteu delwe penuide teitsetdi kera aja kai beudi. Pecai pa Judea gade Caesarea namdi ga nghung bamdi.

20 Cu Herod Tyreme nah Sidonme de pe rata sütdi. Cine penui maa ge tei eh pecu redaukera mie. Penui hegwangpei de ngha kebambe Blastus de penuide nghalo kiegai. Pecai penui kezuyi bamlu kera kiegai, kedanemene penui deudi hegwangpei deudi gade ketyeipok ngau bam kelane. 21 Cine peting rietpwa kenzeu benai, Herod pe hegwang paini kailu, pe hegwangbam ga bamlu delwe penui dage marang gai. 22 Dede minadung sah gai, "Aide rabe sam, mina sam ma!" 23 Zette Rampaube samgwame ge pecu kedeu gai, kedanemene pa Tinggwang de hetwa peu kemakne; nah pecu tangseudung ne tyei tsetdi.✝

24 Dede Tinggwang sam kieesi nah mmi reureu lu.

25 Barnabas penai Saul penai bata teicang luge, penai John, Mark liede de qukelabe de ngngwalwe Jerusalem* ga cailigwangdi.