1 Judea ga kebam langkegaime nah kenlumme kedamedung Gentileme de Tinggwang sam luulu delie kecu siulu. 2 Peter Jerusalem ga caili nghang luge, hegeurumla kela maabe pecu ngngwa kesamlimdi; 3 penui rangdi, "Nang hegeurum la kemakme de nzang nah penuide ngngwa matyei!" 4 Dede Peter macidungde pelane penui dage ranglia siakte cu eh pa ranggai, 5 "Ih Joppa namdi gade kekie teibam ge, Ih marengei gade maniage, mapai disüt kecu kenzwa ge petu mdai ne keulwe tinggim gade hezu hung kela ngau. Nah cide ada nghung . 6 Ih cide pie siakte gai nah ncetgai. Ih kideu ga pideu-mdai kaune nah renaam kaune nah bwa kela kaaunedung nah tingkam ga ruinedung de ngau. 7 Pecai Ih makwa ge a dage rang eh siu, ‘Cuhlu, Peter teitsetlwe tyeilu.’ 8 Dede Ih rangdi, ‘Lak, Rampaubo, kedanemene keherabe mede mcikemakbe magede a mui gage kaila melu.’" 9 Dede makwa de tinggim gade pia pe kenabe keligai, "Tinggwang teimci kedibe hera lie diso." 10 Cu aide piacum teidi, nah pecai ma pelane tinggim gage teu nghang daidi. 11 Ainie, cipau ting siakdau mina hangcum anui kebam ki dwaga gwanglu, penuide Caesarea gade a dage langgai. 12 Kemci Rabe acu lunghau mene penuide ngngwa mielo rangbeu. Siname hangherok aidungde acu nzang mie, anui minabe ki gage lütlu. 13 Pecai pa dainzwa tinggimgwabe pe kiga sap eh ngaubi anui dage ranglia, ainzwa rang eh, "Joppa ga mina de langgai eh Simon, Peter lie qu kelabe de ngngwa gwang lulo. 14 Pa n cu nah n kilungme de kelilu kera sam nnui dage rang liazie." 15 Dede Ih penui dage ma ranglia cuge, Kemci Rabe nda anuida kegwang nzwa penuida gwanglu. 16 Ge Ih Rampaube kerang samde nsunglu, pa ranggai, "John dui teu duipum tei, dede nnuide Kemci Rabe gade duipum teilu zie." 17 "Anui Rampaube Jisu Khrista de nlum keludau Tinggwang anuide mtamapeu kepeude penuide peu liecai, Tinggwang de ngngwa renia kera cau no?" 18 Penui aidungde siu luge penui mage de rang keli tadi, dede penui Tinggwang de twa eh ranggai, "Iciu cai Tinggwang Gentilemede de ringlu kera helungkenreu peuda."

19 Stephen de teikeherei kecu de ziemne tet zangra kedimedung kemdei Phoenicia deuceu, Cyprus duigwadeu nah Antioch namdi ga kecang gwang eh sambe pwa Jewme rünne dage ranglia. 20 Dede penui midungge Cyprus nah Cyrene* gade kegwangme Antioch ga gwang delwe Greekmede de Rampaube Jisu ha samliakeyi de pau liagai. 21 Rampaube kengkieng de penuide nzang la, nah mina kekiee ge nlumlu eh Rampaube da nreu gwanglu. 22 Jerusalem ga ngqwabe da cipau hade gwang cangluge, penui Barnabas* de Antioch namdi gage langgaidi. 23 Pa gwang Tinggwang ngaugiabe ngau keludau, pa pesui yidi, nah pa penui pelane de penui mlung pelane teu Rampaube dade masang eh bam lulo penuide kecung gai. 24 Kedanemene pa au mina keyi nah Kemci Rabe nah kenlumle kepui kauge kecune, nah mina kekiee gede Rampaube da ngngwa gwang silu. 25 Ipaucai Barnabas Saul de peei zielie Tarsus ga miedi. 26 Pa pecu ngau luge pecu ngngwa Antioch ga gwangdi. Iciu eh penai mmi ge ngqwame de ngngwa ngkwa, nah mina kekiee gede ledeu. Cidau Antioch gade kenlumme de pwa Khristianme lie qu raitu lu.

27 Aipau tingdau caihakecimedung ge Jerusalem gade Antioch ga nghunglu. 28 Penui kakgade hangge pe zi Agabus, saplu delwe Rabe gade herakum kedi ge kideu reu pelane ga gwang zielie ranggai. Aide Claudius tingdau gwang. 29 Cine, ledeukelumedung keheibede penui teilu kebui kieege gade Judea ga kelunghme dage kengha langgai zielie riemlu. 30 Cine penui cinzwa eh rangkang hekwalu delwe Barnabas penai Saul ba gage langpwa Jerusalem namdi ngqwa ga hangkiame dage kaibeu.