1 Apollos Corinth ga kebamdau, Paul deudi nreule de kahgwang eh Ephesus namdi ga gwanglu, nah cika ledeukelumedung gede ngaulu. 2 Paul penui dage rangdi, "Nnui nlum keludau kemci Rabe ngau luni?" Dede penui pe sam keligai, "Ma, anui Kemci Rabe bam lie kecu hade siu ma." 3 Cine Paul rangdi, "Iciucai nnui dai gage duipum tei luno?" Penui keligai, "John duipum de gage." 4 Cine Paul keligai, "John helungkenreu duipum teu eh duipum tei. Pa minadung de pecai gwang kelabe cide Jisu de nlumlu maisia lie ranglia gai." 5 Minadung cide siu luge, penui Rampaube Jisu zi gade duipum teilu. 6 Nah Paul pe ba hwapwa penui reu gage kaigai ge, Kemci Rabe penuida gwanglu nah penui helet ketsamtsam gade marang nah caihakecisam de rangdi. 7 Penui pelane ge mipei kereikena kenzwa ge.

8 Pecai Paul synagogue ga gwang kuusüt eh kei cum ge marang gwang, Tinggwang hegwangram ha mpau nah penui lung kecungsüt eh. 9 Dede Jewmedung kangge penui lung tak eh nlum tadi nah penui hemaabe dwa gade Rampaube lampui de rangmsia cuhdi. Cine Paul penuide pütdi eh kenlummedung de ngngwa delwe tingnai ramsangne Tyrannus kibung kedi gade ngngwa mpau bamdi. 10 Aide mmi kena ge teigwang, iciu eh Asia ga kelunghme leune, Jewme de, nah Greekme de, Rampaube sam siulu. 11 Tinggwang peu Paul ba gade miswakegah bata kedi teigai, 12 iciu eh baneu paidung nah hegwapaidung pecu tung kedibe pwa keteeime de peu kegaidau penui dade mateei gahdi nah herakesiabe penui dade mpetdi. 13 Jewme kangge herakesiabe de gwa kelame cipau cuikui ga mbeuh gwangla. Penui Rampaube Jisu zi teu herakesia ngngwa kelame de gwa kera tei eh rangdi, "Paul pe ha rang kela Jisu zi gade, Ih nnuide mpet dilo aja kaila." 14 Cika mikangge Jewme cingkupei kedibe Sceva* kibaume, pe name hang henabau aide teibam. 15 Dede herakesiabe penui sam keliai, "Ih Jisu de ci nah Ih Paul de ci; dede nnui cauno?" 16 Ge herakesia peda kelabe de penui reu gage nsaugai eh penuide ngamlu nah penuide rejam sütdi. Pecai penui paini teu mene nah rejamdi delwe penui cipau ki gade pakdi. 17 Nah aide Ephesus ga kelunghme pelane Jewme de nah Greekme de ci gwangdi. Ge penui pelane ngngi di nah Rampaube Jisu zi de herüt peulu. 18 Nah kenlumme kekiee ge gwang eh penui mau pet nah penui makesiabe tei kedidung ranggai. 19 Kereka ta tei kelame kekiee ge penui laisiukwakdung pwagwang hekwalwe mina pelane miakngau gade rudi. Pecai penui cidungde mi peigai, ge cide rangkanggeu cangriakngei* migedi. 20 Cine Rampaube sam rangpet si nah ngkieng reureu lu.

21 Cu Paul Ephesus ga peta teicang kelucai, pa Jerusalem ga kemiedau Macedonia nah Achaia cuikui kahgwang kera cetlu. Pa rangdi, "Ih cika gwang lude, Ih Rome namdi de gwang maisia reu." 22 Pecai Paul pecu ngha kebam hangna Timothy penai Erastus de Macedonia gage langgai. Dede pa Asia deuceu ga tingkak ge bamdi.

23 Cipau tingdau Ephesus ga kesangbe Lampui hade ziemne kehebwak kedige bamdi. 24 Kedanemene rangkanggeu kerekime ge pe zi Demetrius rangkanggeu lepwa Artemis recakidung tei eh heta keteimedung depeu mmisüt lula. 25 Cine pa heta cide tei kelame de qu hekwalu rangdi, "Mipeimedung, anui heli aide gade rangkang kekiee ge ngaulu kela nnui cibam. 26 Nnui ngau nah siubam, Paul aipaude Ephesus ga rünne ma, dede Asia pelane ga mina de kecung mina kekiee ge lung teinreu dida. Pa mina bale teikelube au rabe melie rangla. 27 Cine anui heli aide de rangmsiadi kera kerehim rünne ma, dede herabe pui kedi Artemis recaki de de kemta liedi lubui. Ciciu eh Asia pelane ga nah kideu ga reca kela rabe pui kendu gah dilai zeuda." 28 Penui aide siu luge, penui rata le kepui tei eh sahbak gai, "Ephesame Artemis au dizu lie." 29 Ge namdi pelane ga kehebwak le puidi, nah minadung renia eh kenggwaki ga gwanglu. Penui Paul de ngngwa mbeuh kela Macedoniame Gaius penai Aristarchus de tuilu. 30 Paul mina kakga lütneu di, dede kenlummedung pecu kaamdi. 31 Asia deuceu ga kedimedung pe zangme kangge de pecu kenggwaki ga lüt helo sam langgai. 32 Ge midungge sam ge sah, nah mikedame kedage sah bamdi, kedanemene hemaabe ga kehebwak bam kedine. Penui kekiee ge dai ziemne penui gwang ngkwa bambi kecu cima. 33 Cidau hemaabe kakgade Jewmedung ne Alexander de keraile ge cwak mpet gai. Alexander hemaabe dage pe nzeu rang neu eh pe ba hwagai. 34 Dede penui pa Jewme gelie kecu ci luge, penui pelane kwa ge teidi. Penui bamdakkak kena kenzwa ge ma sah jüja bamdi, "Ephesame Artemis au dizu lie." 35 Namceu ga keraube maadibe de kesiuzingdi eh pa ranggai, "Nnui Ephesamedung, Ephesus namdi ne kedi Artemis kerecaki nah mamie tinggim gade cak kemie kekwabe lie kecu cauge ci kemak bamno? 36 Ma aidungde mlai gai kelak ngau eh nnui sünne bamlu maisia nah magede kelwa eh tei kerabe ma. 37 Kedanemene nnui ngngwa tutiak bamga kegwang mina ai kenade kerecaki gade marega mede anui rabepui de rang msia ma. 38 Ciziemne, Demetrius nah heta keteime pecu nzang kelamedung keheibede de kemmau bamcai, tutiak kidung ngkie pwabam nah deuceudime bam. Penui depeu ketket de mmau lulo. 39 Dede nnui makie kedabe peei lacai, cide hetutiak kela tingdaune tiak zie. 40 Kedanemene henai kehebwak teikedi de ziemne anuide mmaulu kera kengngi bam dida. Anui aipau kehebwak de ziemne Romme kedime dage magede ranglu kera pekie gah."* 41 Pa aide rang kelucai, pa hemaabe depeu lamna di.