1 Cu Festus deuceu ga gwang luge, lang cumne cai, pa Caesarea gade Jerusalem ga nghang. 2 Cingku kedimedung nah Jewme kemlangme Paul de kemmau samdung Festus da teugwang, nah penui pecu kecung eh 3 Paul de mmau kera kengha kiedi—Festus depeu Paul de Jerusalem gage qu gailu kerane—kedanemene penui lampuiki gade pecu teitsetdi kera mtei kebamne. 4 Cine Festus Paul de Caesarea gage kainzeu lie, nah pa cika matie mene mielai zeulie sam keligai. 5 Pa rangdi, "Cine nnui kakga muiteumedung de peu anuide ngngwa cika mielu. Paul madungge teimau pwa bamcai, penui depeu pecu mmaulu."

6 Festus penuide ngngwa langhesetne mede ziangrei ge swa Jerusalem namdi ga bamsi ma, nah pecai pa Caesarea ga nghungdi. Pecia benai pa tutiakbam ga bamlu eh Paul de peda ngngwa gwanglo aja kaigai. 7 Paul gwang luge, Jewme Jerusalem gade kehungmedung pecu sap twagwalu eh penui rangmci liagai kelak pecu kemmau sam kekiee teugwang. 8 Paul pe nzeu rangdi, "Ih Jewme zaide mmau eh, mede kerecaki zai mmau eh, mede Caesar de mmau eh magede teimau ma." 9 Dede Festus, Jewme suiyi teineu eh Paul sam keligai, "Nang Jerusalem ga hang eh cikade acu peu n ha aidungde tiakneu lani?" 10 Dede Paul rangdi, "Ih Caesar tutiakbam dwaga sap bam, cikade a acu tiak kerabe. Nang cisiakte kebam nzwa Ih Jewme dage magede teimau ma. 11 Dede Ih kemau tei kesang pwa bamcai nah tsailu kebui kemau ta kehei gede teinzeu liecai, Ih tsai laklie dilak. Dede penui acu mmau kera magede gahcai, migede acu penui ba gage kai gailak. Ih Caesar dade a nzeu rang zie." 12 Pecai, Festus baudibe de ngngwa mpau kelucai, pa keligai, "Nang Caesar da n nzeu rang zielie zeu; nang Caesar da mie zie!"

13 Cu tingba ziedungge cai, Hegwangpei Agrippa* penai Bernice Festus de kerüt peugai kera Caesarea ga gwanglu. 14 Penai cika tingbazie kekiee ge bam kedicai, Festus Paul ha pwa hegwangpei dage liagai. Pa rangdi, "Aika Felix ne mipeige de hebaangme ge tei eh kainzeu pwa bamlie. 15 Ih Jerusalem ga kebamdau, cingku kedime nah Jewme hangkiamedung mina aipaude de kemmaudung teu gwang pecu mmaudi lo kiedi. 16 Ih penui dage kemmaube de ziuyi keyi peu eh pecu mmau kelamedung de peu kezungau eh pecu kemmau samdung de ziemne pe nzeu rang kemakdwa migede de mmau kecu Romme zai melie keli beudi. 17 Cine penui aika ngngwa gwang luge, Ih kwadi ma, dede pecai benai Ih tutiakbam ga bamlwe Ih Paul de ngngwa lütlo aja kaigai. 18 Pecu mmau kelamedung sap luge, Ih cet kelanzwa penui pecu kemmau kesia kette teugwang ma. 19 Meliene, penui katei penui renet ha gade nah mige pe zi Jisu, tsai kedibe de Paul pa au ring lalie kelade ziemne penui ngngwa kesamlim. 20 Cine Ih aipau hadungde dainzwa tiak gwangzie bi cet cilu tadi. Ih pa Jerusalem ga gwang delwe cikade cidungde ha tiak neumi mebi keteu. 21 Dede Paul hegwangpei depeu tiak kera kwa kebamdau peu pecu hebaangki ga bamlo kie dige, Ih pecu langpwa Caesar dage kailu kemakne pecu hebaangki gage kainzeu lulo aja kaibeudi." 22 Ge Agrippa Festus dage sam keligai, "Ih, akatei de, mina aipaude sam kingnei gaineu bamlie." "Ncünne," Festus rangdi, "nang pe sam kingnei luzie."

23 Cine pecai benai, Agrippa penai Bernice mtei hemisütlwe reugwame kedimedung nah namdi ga mina kemlangmedung de nzanglwe baudi kibung ga lütlu. Festus aja kai kegaidau, Paul de ngngwa lütlu. 24 Ge Festus rangdi, "Hegwangpei Agrippa, nah aika anuide ngngwa kebammedung, nnui mina aipaude de ngaubam, Jewme maadibe pelane Jerusalem gade nah aikade de a dage pecu ncam bam, pecu peu lungh bam kerabe melie sah eh. 25 Dede Ih pa tsailu kebui mau gede tei nzeu kemak cilu; kedanemene pa pekatei hegwangpei dade pe nzeu rang zielie kedine, Ih pecu langdi kera cetlu. 26 Dede Ih pe ha hegwangpei dage mcigi kecuge raugai kerage de bam ma. Aipau kiede ziemne Ih pecu nnui dwaga ngngwa gwang luda, nah keraide n dwaga, hegwangpei Agrippa, iciu eh aikade pe ha pie kelucai, Ih madungge raukera bamlu kerane. 27 Kedanemene a kecet au hebaangme gede pecu mmau kecubedung rau mcigai mene langkegai au pekie gahlu."