1 Anui kwak eh mpet luge, duigwadeu cide de Malta* lie la kecu anui cilu. 2 Cika kelunghme anuide ngau kenggia kecu rünne ma, dede cika tingrui jüja kebamne nah ngkungsüt kecune penui mi teilwe anui pelane de cika ge qu gailu. 3 Paul tsingtiedung peei hekwalwe mi gage pwa gaige, mi lum kecu ziemne henei* ge pakmpet pe ba ga ngoipwa bamdi. 4 Cika kelunghme henei pe ba ga nzu kebam ngau luge, penui hangge ge dage rangdi, "Mina aipaude mide teiketsetme jaaidi gade pak kelume ge au zieda, dede kesamsangbe peu pecu ringkera peu meda." 5 Dede pa henei de kezit pwa mi gage kaidi, nah pecu magede tei dima. 6 Dede penui pa mma cuh eh mede zette kaumie tsai dizie ha de kwabam. Dede penui peting ketieege kwa bamde ma ketsam gede peda gwang kecu ngau mege, penui penui lung kedilwe pa au herabe ge liedi.

7 Cu heni cika kenna ga mige pe zi Publius lie kecu duigwadeu kedibe gu hangdeudung ge bam. Pa anuide ngngwalwe anuide nggia eh langcumne hegia beu. 8 Cidau Publius pei mra eh mateei nah pepok sia eh zeubam. Paul pe da gwang nah kekie teigai, nah pe reu gage pe ba hwagai eh pecu teingkei beu. 9 Ma aide tei kedicai, duigwadeu ga keteeime kedame leune de gwang nah teingkeilu. 10 Minadung anuide mta ma kekiee pwapeu, nah anui tet kera mtei kebam dau, penui anui teumai kesiabe pwapeu.

11 Iciu eh keicum gecai, liem Alexandria gade kegwang, Nedui Rabe le pe peumie teipwa kebam liem, tingtiak ting duigwadeu ga kebam ge gade anui tetgai. 12 Anui Syracuse* namdi ga gwang cang kelucai, anui cika lang cumne bamdi. 13 Cikade anui liemtau daipwa Rhegium namdi ga gwanglu. Langnai ge cai tingpile de tingkai gui cuhdi, nah langnane gage anui Puteoli namdi ga gwanglu. 14 Anui cika sinamedung gede ngaulu, ge anuide lang hena ne penuide ngngwa bam lulo di. Iciu eh anui Rome namdi ga gwanglu. 15 Cikade kenlummedung, anui hadung siu luge, Appius Litakni nah Hebeuh ki Kecum dei ge gade gwang anuide daulu. Paul sinamedung de ngau keludau, pa Tinggwang de twa nah pecu teingkuu sütlu.

16 Anui Rome ga gwang luge, Paul de peu reugwame gede kwa eh pekatei lungh kera tei beudi.

17 Lang cumne cai Paul Jewme kak gade muiteu tei kebam minadung de qu hekwalu. Penui gwang ngkwa luge, pa penui dage rangdi, "Sinamedung, Ih minadung mede paupai zaidung de mmau eh magede teima, dede Jerusalem gade peu acu hebaangme ge tei eh Romme ba gage kai dida. 18 Penui acu keteu kelucai, penui acu lungmpet beu neudi, kedanemene a da tsailu kebui kie magede kegahne. 19 Dede Jewme mlai kedidau, acu peu Caesar dage a nzeu rangkera ketangdi, Ih a leuhme de magede mmau gai kera gah liede. 20 Cine aipau kiede ziemne, Ih nnuide qugai, nnuide kerengau eh ngngwa mpau kerane. Kedanemene Israelme keregui de ziemne acu hegeuria aide le kangpwa bam dida." 21 Ge penui pe dage rangdi, "Anui Judea gade n ha laisiu gede ngaulu ma, mede anui sinamedung gwang maha gede paulia mede n ha kesia gede rang ma. 22 Dede nang aipau hemaade de daipai lie cet labi anui n dade siu gaineu bamlie, kedanemene kehei gade mina aipau maade de rang mmau kela anui cibam di delu."

23 Cine penui pe ziemne tingba riet luge, mina kekiee Paul kebam ni ga gwanglu. Pa penui dage pekie pwalia gai nah Tinggwang hegwangram ha zierang teigai. Pa tingcang gade tinghegi kecang Moses zai gade nah caihakecime laisiudung gade Jisu ha rangpwa penuide lia eh kecunggai. 24 Pa rang kegai samdung de kangge nlumlu dede kedame nlum luma. 25 Cidau penui hangge gede suizwalu mene kebam dau Paul ma aidungde rang kedi cai penui tetdi, "Kemci Rabe ne caihakecibe Isaiah dade nnui paumedung dage kerang de kesang da. 26 Pa rangdi, ‘Mie mina aidungde dage ranglo,

"Nnui kingnei au kingnei zie, dede nnui ci gailak,

nah nnui pie au pie zie, dede nnui cet gailak.*

27 Kedanemene mina aipau maadung de mlung mang bam dida,

nah penui kwen ma siusia dida,

nah penui miak ziangmui dida.

Iciu mecai penui miak le ma ngaulu,

nah penui kwen le siulu,

nah penui mlung le macilu eh nreugwang dailu kerabe,

nah Ih penuide teingkei beuzie."’✝

28 Ciziemne, Tinggwang kelikelu samlia aide Gentileme dage langgai dide lie kecu nnui ci lulo, nah penui kingnei luzie." 29 *[Pa ma aidungde rang dige, Jewme tetdi. Penuikatei penui kakgade kesamlimsüt eh bamdi].

30 Paul mmi kena ge mi ki ngngetlwe bamdi, nah pe da kegwang mileune de pa ngngwa redau. 31 Pa kuusüt eh Tinggwang hegwangram ha zierang tei nah Rampaube Jisu Khrista ha ledeu. Migede pecu kaam dima.