1 Caesarea namdi ga mige pezi Cornelius,* Italyme Reugwamaa lie qukela haireu kedibe ge bamla. 2 Pa au renet kemcokme ge nah pe kilungme pelane de ngngwa Tinggwang de recala; pa kegahme de rangkang kekiee peu bamla nah pa Tinggwang dade kiebam muila. 3 Tingnaige tingna bamcum dau, pa merengei kengau gade mcigi eh Tinggwang gwame ge peda gwang eh, "Cornelius!" debeu. 4 Dede Cornelius ngngidi eh tinggimgwabe de pieling gai eh ranggai, "Daipai no, Kedibo?" Ge tinggimgwabe pe dage rangdi, "N kekie nah kegahme de kepeu n mapeudung reca Tinggwang dwaga hang cangbam dida. 5 Cine minadung gede Joppa gage langgai eh Simon pecu le Peter lie qu kelabe de ngngwa gwang lulo. 6 Pa au Simon, teigeuta tei kelabe, peki zaidi kung ga kebambe de ngngwabam." 7 Tinggimgwabe pe dage makerangbe de tet dige, Cornelius pe ki ga kebam kilame hangna nah pe gwa keteime kakgade reugwa kenlumme gede qulu. 8 Pa penui dage daipai teidi bi kecu pelane ranglia nah Cornelius penuide Joppa gage lang gaidi.

9 Pecai benai penui mbeuh eh namdibe ga nna gwang keladau, Peter tingna dauge kiniem reuga kekie tei kera hangdi. 10 Ge pa mzeudi nah mage tyeigai neudi, dede minadung ketyeipok mtei kebamdau, pa marengei ge ngau, 11 nah pa tingkam ngkei kegai nah maniage hepai disüt kecu kenzwage, petu mdaide ne kideu gage teu nghung kela ngau. 12 Cika makaune pideu-mdai leune nah kideu reu ga bwa kela kaudung, nah tingkam ruinedung leune la. 13 Cidau makwa ge peda ranggai: "Cuhlu, Peter, teitset lwe tyeilu." 14 Dede Peter rangdi, "Lak, Rampaubo; Ih madaude keherabe nah mci kemakbe tyeila melu."* 15 Dede pe kenabe makwa de peda gwangdai: "Tinggwang ne teimci kedibe hera lie diso." 16 Cu aide piacum iciudi, pecai mania de tingkam ga zette teunghang daidi.

17 Cu Peter marengei pa kengaude pekie daibi kecu cetdau gailak eh kebamdau, ainie, mina Cornelius ne langkegaimedung penui Simon ki dailam bi kecu keteulwe penui kirie dwaga sapbam. 18 Pecai penui qulwe Simon, Peter lie kelabe de cika bam mi mebi kecu keteu. 19 Peter marengei de daibi kecu cet bamreu kecudau, Kemci Rabe pe dade rangdi, "Ainie, minadung ncu peeila lie.* 20 Cine cuhlu delwe nghung lwe penuide nzang gwanglu. Lunghau diso, kedanemene Ih ne penuide langgai dilu." 21 Cine Peter minadung da nghunglwe rangdi, "Ainie, nnui peei kelabe de Ih da. Daiziemne nnui gwang lano?" 22 Penui keligai, "Cornelius, haireu kedibe, masang nah Tinggwang mie hing kelame ge, Jewme pelane pecu rüt kela kauge, kemci tinggimgwame ge aipau kiga gwang ncu qulo rang beulie, iciu eh pa n dade samlia siulu kerane." 23 Cine Peter penuide peda bam lulo qulu nlütlu.

Delwe pecai benai pa cuhlu delwe penuide ngngwa miedi, nah Joppa gade kenlummedung gede pecu nzang miedi. 24 Pecai benai penui Caesarea ga gwanglu. Cornelius pe kibaume nah pe zangme de qu hekwalwe penuide kwabam. 25 Peter lütge, Cornelius pecu daulwe pe pi ga keumie pecu reca. 26 Dede Peter pecu teu cuhlu eh, ranggai, "Sap lulo, Ih de mina lie." 27 Peter pecu ngngwa mpau jüja kilung ga lütge, mina kekiee ngngwa ngkwa kebam ngaulu. 28 Pa penui dage rangdi, "Jewme ge heleuh kedame de ngngwa kekangbau mede mige de mie redau kecu hezai kemak nnui ci bam. Dede Ih migede de keherabe lie mede mcikemakbe lie qu kelak Tinggwang acu keulia dida. 29 Ciziemne nnui acu lang kegaidau, Ih mlaidi mene gwang luda. Cine Ih nnui dade keteula, daiziemne acu qu gaino?" 30 Cidau Cornelius keligai, "Lang mdaine dwa aipau tingsiak ga, Ih a ki ga bamcum tingdau kekie teibam ge; ainie, mipei ge pai rebaaha kecu bahlwe a dwa ga saplu. 31 Pa rangdi, ‘Cornelius n kekie nah kegahme de kepeu n mapeudung reca Tinggwang dwaga hang cangbam dida. 32 Cine, Joppa gage mina kangge de langgai lo, delwe Simon Peter lie qu kelabe de qulo. Pa zaidi kung ga Simon, teigeuta keteibe kiga bamlie.’* 33 Cine Ih zette midungge de n dage langgai. Nang nzaiyi eh gwang luda. Cu cine, Rampaube ncu rang lulo kebeu sam leune kiengnei zielie, anui pelane aika Tinggwang dwaga gwang bamda."* 34 Ge Peter marang cudi,

"Tinggwang heneuherüt teila kemak kesang lie kecu Ih ci luda. 35 Dede heleuh pelane ga keheibe de pe mie hing nah petaube tei kelame au pa luulu kebuime. 36 Pa Israelme dage samlia kai kegaide, Jisu Khrista, pelane reu Rampaube dade kezuyi samliakeyi teu ledeu kegwangde nnui cibam, 37 John duipum ketei zierang de tei kedicai, Galilee deuceu gade pe bangdwa tei eh Judea deu pelane ga sam rangrwa kegwang de nnui cibam; 38 Nnui Nazarethme Jisu ha, dainzwa Tinggwang pecu Kemci Rabe nah kengkieng le keniaklu bi kecu cibam. Pa makeyi tei gwang nah herakesiabe ne ngngwakela pelane de teingkei beu, kedanemene Tinggwang pecu ngngwa kelane.✝ 39 Anui Jewme deudi ga nah Jerusalem ga Jisu bata teikegai leune zierangmedung da. Penui pecu pwa cross gage gwak eh teitsetdi,✝ 40 dede Tinggwang langcum ne benai pecu kwak cuhlu delwe peu pecu ngaugai, 41 mileune dage ma, dede Tinggwang ne kedet teukela zierangme dage, anui pa ketsai gade ringcuh kelucai pecu ngngwa matyei nah masak kecume dage. 42 Pa anuide mina dage rang ledeu lo nah Tinggwang keringme nah ketsaimedung tutiakbe tei kera kedet kelube pa delie zierang teilu lo aja kaibeu. 43 Caihakecimedung pelane pe zierang teigwang, iciu eh mileune pecu nlum kelume pe zi gade penui maudung gi kelu ngaulu kerane."

44 Peter cidungde rang kebamdau, pe sam kingnei kebamme pelane reu Kemci Rabe gwanglu. 45 Peter de ngngwa kegwang kenlumme hegeurum kelame pelane penui ma canghdi, kedanemene Kemci Rabe mapeu Gentileme reu gage de ruigai kebeune. 46 Kedanemene penui aipau Gentilemedung helet kedadung gade marang eh Tinggwang de twa kebam siu kelune. Ge Peter keligai, 47 "Anui nzwa mina aidungde de Kemci Rabe ngau luda, mi keheibe de mina aidungde de peu duipum teidi melu kerane kaam lubui ni?" 48 Cine pa penuide Jisu Khrista zi gade duipum tei lulo aja kaibeu. Pecai penui pecu tingbazie kiee kemak ge penuide ngngwa bamlo kiedi.