Luke 8

Relei tsaikedi ge nah maketeei pui ge

40 Cu Jisu nligwang ge hemaabe penui suiyi eh pecu ngngwalu, kedanemene penui peciakne pecu kwa kebamne. 41 Ge ainie, cika mige pezi Jairus lie kecu ge bamla, nah pa synagogue ga muiteume ge. Nah pa Jisu pi ga keumie eh pecu peki ga gwanglo pedade pe nggia kiedi, 42 kedanemene pe napui mmi kereiekena nage rünsangne bamge, pa tsaina bamdi. Pa gwang kezeu dau, mina maabe pecu nyia titi ladi.

43 Cu cika mipui ge mmi kereiekena hejai lwa la kedi pui ge la, pa pe mabam pelane doctorme dage mpetdi,*Laisiukecime samkiePe mabam pelane doctorme dage mpetdi de kecu de aika ge kaimi lakbi kesuisam luma. dede migede pecu tei mmilu tadi. 44 Pa pecaile de pecu gwanglwe pe pairi deugai, nah hejai kelwa de kaam zette di. 45 Ge Jisu rangdi, "Cau acu deu no?" Mina peciakne melie dige, Peter rangdi, "Kedibo, mina maabe ncu twagwa la nah penui ncu nyia titi la." 46 Dede Jisu rangdi, "Mige acu deulie kedanemene ada de kengkieng mpet kedi Ih cibam di delu." 47 Mipuibe pa mbai gai kelak ngaudi ge, pa mbeu eh gwang pe dwaga keumie di. Mina peciakne kebam gade daitei eh pa pecu deubi nah dainzwa eh pa yi zette lu dibi kecu pa ndugai. 48 Ciu eh pa pe dage rangdi, "A napoi, n kenlum ne ncu teihemi luda. Lungciep gade tetlu."

49 Pa marang kesap dau, mige synagogue reu kedibe ki gade gwang eh ranggai, "N napui tsai dida, keledeube de tei keherei si talu." 50 Dede Jisu aide siulu ge, pa sam keli eh peda cu, "Ngngi so; nlumkelu gwale, nah pa yilu zie." 51 Pa cipau kiga gwanglu ge, Peter, John nah James nah henanabe pui penai pe pei de gwale peu mi kedade pecu ngngwa lüt ma. 52 Cu mina peciakne hap nah pecu hei bam, dede pa rangdi, "Hap so, kedanemene pa au tsai ma, dede zip bam lu." 53 Dede penui pa tsai kedi ci kebam ne, pecu nuidi. 54 Dede pa, pe ba teulwe qu eh ranggai, "Henabo, cuhlu!" 55 Ciu eh pe rabe nligwanglu, delwe pa zette cuhlu, nah pa penuide peu pecu matyei kera peulo rangbeu. 56 Cu pe pui pe pei penai swagahdi, dede tei kedidung de mina dage rang helo pa penuide kaamdi.