1 ताहराअ पौलुस आन सिलास अम्फिपुलिस आन अपुल्लोनियामेहें फिरताज थेस्सलनीकेमेहें आया, जिहीं यहुदी वालाआं एक आराधनालय ओतो. 2 पौलुस तियाआ रितीइ परमाणे तिहीं गोयू, आन तीन आरामोअ दिही जाआं वसनोम रोत तियांअरी गोठी कोअयी; 3 आन तियाआ अर्थ फोड़ कोइत समजाड़तुतो के ख्रिस्ताआ दुख वेठीइलो, आन मोल्याम रोत जिवीत उठीइलो, याअ गरज ओती; आन "ओज ईसु जियाअ आंय तुमुहूं गोठी कोतापोहो, ‘ख्रिस्त’ होये." 4 तियांमेर्‍याआ थोड़ाक माअहूं भरिवसू कोअयू आन तें पौलुस आन सिलासोअरी जुड़ात गोये. आन डाहटे युनानी आन वारुज हाजला घराणाअ बायहीं बी ओती जियीं देवोअ भक्ती कोअयी.

5 पोन यहुदी माअहें जोरोम आवित ऊगार माअहूंमेहें रोत थोड़ाक गुंडा माअहुंहूं तियांअरी लेत लेदा, आन गर्दी टिग वालित कोइत गावोमेहें दोंगु माताड़ा वोल्या, आन यासोनोअ कोओपोअ देत कोइत तियांहां माअहुंउं सामने लेत आविइलाअ कोशित कोअयी. 6 पोन ते तियांहां ने मिल्या, तिहीं वाअहीं ते ओं आअड़ीइतेज यासोन आन थोड़ाक विश्वासी पायहोहो गांवोंअ पुढार्‍योंअ सामने ओडीत लेत गोयान कोयो, "जियां कोलीही उलटीफुलटी कोई देदीही, तें माअहें इंहीं बी आवित लागेहे."

7 यासोने तियांहां सोताआ कोअमेहें हाद्ये. एं आखेज एहें कोतेहे के ईसु राजा होये, आन कैसरोअ नियमोहों विरोद कोअतेहे 8 तियां माअहुंहूं आन गावोंअ पुढार्‍योहों ओं उनाड़ीत कोइत बिवाड़ी देदा. 9 याअकाजे तियां यासोन आन थोड़ाक माअहोंहों जामिन लेत कोइत सोड़ी देदे.

10 विश्वासी पायहों ताब्बुड़ राताम रात पौलुस आन सिलासोहो बिरीया मोकली देदा; आन ते तिहीं पोतीत कोइत यहुदीया वालाआ आराधनालयोमेहें गोया. 11 ए माअहें ते थेस्सलनीके मेर्‍याआ माअहोंअ रोत खुब हाजे ओते, आन तियां वोडी तलबे वाअहीं वसन स्विकार्‍य, आन हारेक दिही वसन वासित जे गोठी पौलुसे कोयीते ते कांय बोराबर होय के नाहां तों तापासतेते. 12 तियाहा काजे तियांमेर्‍येए डाहटे जोएं, आन युनानीमेएं जाअखीलेहे जोएं वोडा घराणाआं बोईंन माट्यों विश्वास कोअयू. 13 जेहेलाम थेस्सलनीकेवालां यहुद्याहां मुंदू गोयू के पौलुस बिरीयामेहें बी देवोअ वसन कोतापेहे, ताहां तिहीं बी आवित कोइत माअहुंहूं उरी सोढव्यी आन भान्गड़ माताड़े वोल्ये. 14 ताहराअ विश्वासी पाही ताबुड़ पौलुसोहो दोर्‍याअ टेकोपोअ जायतेहें काजे मोकली देदू; पोन सिलास आन तिमथ्य तिहींज रोत गोया. 15 पौलुसोहो पोताड़नारा विश्वासी तियाहा एथेन्स जाआं लेत गोया; आन सिलासे ना तिमथ्य तियाआ जागे वेगा आवे तेहें काजे ते पौलुसोअ आदेश लेत कोइत निहींया.

16 जेहेलाम पौलुस एथेन्स होयरोमेहें तिमथ्या आन सीलासोहो वाट जोवतुतो, तेहेलाम तो गांवोंमेहें मुर्तीन मुर्ती पालीत कोइत तियाहा आत्मामेहें जुदो दुख लागो. 17 तियाहा काजे तो यहुदीइ आराधनालयोमेहें यहुद्याहां आन बिगर यहुद्याहां जें देवोअ भगत, बाजारोम आवनारा जानारा माअहोंअरी दाड़ख्युउ वादावादी कोअया कोअतुतो.

18 ताहराअ इपिकुरी आन स्तोईकी जाणकारो मेर्‍याआ थोड़ाक जोओं वादावादी कोआ वोल्या, आन थोड़ाक जोओं कोयो, "ओ सोकनारु की सोकेहे?" पोन बिहीरा कोयो, "ओ बिहीरा देवोअ परसार कोअनारु जेहें लागेहे," काहाके तो ईसुउ आन मोल्याम रोत जिवीत उठीइलाअ हाजी बातमी कोतापतुतो. 19 ताहराआ तियां पौलुसोहो तियांअरी अरियुपगुस टेकड़ीपोअ लेत जात फुशो, "आमू जाईंत सेकताहा, के ए नोवी शिक्शा जे तु कोतापेहे, की होय? 20 काहाके तू जे आमुहूं ओजाण्यी गोठी कोतापेहे, तियाहा काजे आमुहूं जाईंलोअ होय के याअ अर्थ की होये." 21 याअकाजे के एथेन्सवाले आन जिवण्ये जें तिहीं रोतेते, नोवी नोवी गोठी कोअलाअ आन उनाइलाआ सोड़ीत बिहीरो कीज काम ने कोअतेते.

22 ताहरुउ पौलुस अरियुपगुसोअ विसमेहें उबू रोत कोइत कोयो, "ए एथेन्सवालां, तुमू हारेक गोठीमेहें देवोहो खुब माननारे माअहें होय एहेलोहो माहूं देखाअहे. 23 काहाके आंय तुमाआं होयरोमेहें फिरता फिरता जेहेलाम तुमाआं भक्ती कोइलाअ जागाहा पाल्यो, तेहेलाम एक एहेलोह देवान्यो बी देख्यो, जिहीं पोअ लेख्योतो, ‘ओजाण्या देवोअ काजे.’ तियाहा काजे जियाहा तुमू नाहां ओलखीइते पोन भक्ती कोअतेहे, तियाआ बाप्तिमेहें आंय तुमुहूं कोत आपोहो. 24 जिये देवे धरती आन तियाआ आखी वस्तुहू बोणायी, तो होरगो आन धरतीइ मालिख होय आन आथो वाअहीं बोणावल्या मंदिरोमेहें नाहां रोतू; 25 आन नाहां तियाहा काविंहीं वस्तुउ कमी कोत मोनवीइ आथोअ सेवा लेतू, काहाके तो ताम सोताहाज आखाहा जिवन, हाह आन आखोज आपत्लू.✝17:25 यश 42:5; प्रेशित 7:48 26 तिये एका माअहूं वाअहीं पुरी मोनवीइ जात पुरी धरती पोअ रोय तेहें काजे बोणावयीही; आन तिये तियांआं वेल आन तियांआं रोअलाअ जागाअ हींव ठरवी देदीही. 27 याअ कोअते के, तें देवोहो होदीत पाले, आन केहेंनेत तो तियांहां जोड़े, तेबी तो आपामेर्‍याआ कोडा रोत सेटे कायनाहां. 28 कोडे तेबी कोयोहो,

"‘काहाके आपू तियामेहें जिवतेहे, सालते फिरतेहे आन टिकीत रोतेहे.’ तुमाआं केताहा तेबी कवी जाआं कोयोहो के, ‘आपू ताम तियाआज पोर्‍ये होये.’

29 "तियाहा काजे आपू देवोअ पोर्‍ये होय, तेबी होना, सांदी नेत डोणोअ बोणावल्यी मोनवीइ कलाकारी आन कारागिरी वाअहीं कोड़ल्या रुपोहो देव कोत समजीइलोअ आपाआ काजे बोराबर कायनाहां. 30 तिहींज वाअहीं माहें देवोहो ने ओलखीइतेते, तियी वेलेएहें देवे ध्यान ने देदो, पोन ओमे हारेक जागे बादा माअहुंहूं मोन फिरावीलाअ आदेश आपेहे. 31 काहाके तिये एक दिही एहेलुहू ठरव्युहू के, जिहींमेहें तिये नेमल्यू एक माटी ईसु वाअहीं तो दुन्याअ न्याय निवाडु सतीपणो वाअहीं कोए; आन जियाहा तिये मोल्याम रोत जिवाड़ीत कोइत ए गोठ आखा माअहूं पोअ पुरावू कोइत देखाड़ी देदुहू."

32 मोल्याम रोत जिवित उठीइलाअ गोठ उनाइत कोइत थोड़ाक ताम पौलुसोहो ओंहां वोल्या, आन थोड़ाक जोओं कोयो, "ए गोठ आमू तापोअ रोत एकदू दिही उनाअहूं." 33 तियाहा काजे पौलुस तियांआं विसमेहें रोत निहीत गोयू. 34 पोन थोड़ेक माअहें तियाअरी जुड़ात गोये, आन विश्वास कोअयू; तिहींमेएं दिओनिसियुस जो अरियुपगुस होयर पोन्साअ सदस्य ओतू, आन दामारिस नावोअ एक बायी ओती, आन तियांअरी फाशेए बी माअहें ओते.