1 Yesu Kilisito awelili kiwelekwa kya Daudi, ukolu wa Abulahamu. Hau ndiwa uwelile ukolu ghaki.

2 Abulahamu amlelili Isaka, na Isaka akamlela Yakobu, na Yakobu akamlela Yudasi na walongo ghaki, 3 Yudasi hilahila akamlela Pelesi na Zela hagha nyongo ghao awelili Tamali, na Pelesi akamlela Heziloni, na Heziloni akamlela Rami, 4 Lami akamlela Aminadabu, na Aminadabu akamlela Nashoni, na Nashoni, akamlela Selemani, 5 Selemani akamlela Boazi, na nyongo ghaki Boazi awelili Lahabu, Boazi na Lutu wakamlela Obedi, na Obedi akamlela Yese.

6 Na mweni Yese akamlela Nkosi Daudi, na Daudi akamlela Selemani, nyongo ghaki Selemani awelili mhumbu wa Ulia kwa lipindi lila, 7 Selemani akamlela Lehoboamu, na Lehoboamu akamlela Abiya na Abiya akamlela Asa, 8 Asa akamlela Yehoshafati, na Yohoshafati akamlela Yolamu, na Yolamu akamlela Uzia, 9 Uzia akamlela Yosamu, na Yosamu akamlela Ahazi, na Ahazi akamlela Hezekia, 10 Hezekia akamlela Manase, na Manase akamlela Amoni, na Amoni akamlela Yosia. 11 Yosia akamlela Yekonia na walongo ghaki, lipindi lya kuhamisilwa haku ku Babeli.

12 Badili gha Wayahudi kuhamisilwa Babeli, Yekonia akamlela Shealitieli na Shealitieli akamlela Zelubabeli, 13 Zelubabeli akamlela Abiudi na Abiudi akamlela Eliakimu na Eliakimu akamlela Azoli, 14 Azoli akamlela Sadoki na Sadoki akamlela Akimu na Akimu akamlela Eliudi, 15 Eliudi akamlela Eliazali na Eliazali akamlela Matani na Matani akamlela Yakobu, 16 Yakobu akamlela Yusufu mngwana wa Malia nyongo ghaki Yesu, na Yesu ndiwa angukemwa Kilisito.

17 Hinu, kuwelili na viwelekwa ikumi na njechi kuhuma Abulahamu mbaka Nkosi Daudi, kangi kuhuma lipindi lya Daudi mbaka lipindi lya Wayahudi pawahamisilwa ku Babeli kuwelili na viwelekwa vighangi ikumi na njechi. Na lipindi lya Wayahundi mbaka lipindi lya kuwelekwa Kilisito kangi kuwelili na viwelekwa vighangi ikumi na njechi.

18 Hinu, kuwelekwa kwa Yesu kilisito kuwelili nagha, Malia nyongo ghaki paawelili kumalongelelo gha kuhetwa na Yusufu, ila pambila gha weni kuwonja handa mngwana na mhumbu, Malia akawoneka yiwa kana ndumbu kwa uwesa wa Mpumulo wa Sapanga. 19 Kwaikiva Yusufu awelili mundu mmaha, akapala kughola luhala kwa kuhyeta kumpughanyisa Malia kuulongolo gha wandu, hinu akalamula kuleka kumposa kwa kifisu. 20 Paawelili akali anguuwachilila mghalu hau, Mpumulo wa Sapanga akamuhumila kundotu, akamlongela, "Yusufu, mwana wa Daudi, ukotoho kutila kumposa Malia aweli mhumbu ghako, kwaikiva kumila mata haku ni kwa uwesa wa Mpumulo wa Sapanga, 21 hayu ateliwopola Mwana mlumi, kwaikiva mweni ndiwa atewalokola wandu ghaki kuhuma kusambi syauna wenga utempegha lihina Yesu".

22 Hinu, hagha hyogha yahumilili ili litimili lila lilando Bambu alongelili kwa kupitila mlota wa Sapanga. 23 Mlota ailongile, "Uloli, bikila atewela na ndumbu, atemlela mwana mlumi, na mweni atekemwa Emanueli," imanyisa, "Sapanga pamonga na twenga."

24 Hinu Yusufu paayimukili mlughonu akaghola handa vila mtumikila wa kundumba wa Sapanga kamlongela, akamtola Malia aweli mhumbu ghaki. 25 Ila mweni akaleka kuwonjana nayu mbaka paiwopola mwana ghaki, na Yusufu akampegha mwana hayu lihina lya Yesu.