1 Yesu paayomolili kulongela milando hila, akahuka Galilaya, akayenda Yudasiya, kumwambu gha lweni Yolidani. 2 Wandu watangala wamkovekelili kula, na mweni akawalamisa wala wenikuwela wavina haku.

3 Mafalisayo wamonga wakamhikila, wakamkonya kwa kumtegha, "Ghuli, ni maha mngwana kumleka mhumbu ghaki kwa likosa lolosi?"

4 Yesu akawayanga, "Ghuli msomili ng'ogha ku Mayandiko gha Sapanga amlumbili mundu mlumi na mdala? 5 Hinu Sapanga akalonga, ‘Kwaikiva gha nagha mlumi atemleka tati ghaki na nyongo ghaki, na atekovekelana na mdala ghaki, na weni waivili watewela higha mmonga.’ 6 Nagha, weni ng'ogha waivili kangi ila ni higha mmonga. Hinu, kila akikonganisili Sapanga, mundu akotoho kukilekanisa."

7 Ila weni wakamkonya, "Kwakyani, Musa atulaghilili mdala umyandikili lihamba lya kulekana?"

8 Yesu akawayanga, "Musa alongili nagha kwaikiva gha ukamala gha mioyu ghao. 9 Ningulonga nagha mhumbu ghako kaghola ngongola ng'ogha, ungupalwa ng'ogha kumpegha lihamba lya kumleka ili umposi mdala mghangi. Ikiva uteghola nagha, ungughola ngongola."

10 Wavulwa ghaki wakamlongela Yesu, "Ikiva mighalu yeni ndiwa hai ni mbaa kuleka kuposa."

11 Yesu akawalongela, "Mavulo hagha yangughola lihengu kwa amonga gha wandu hela na ng'ogha kwa kila mundu. Ila wala weni kutangwa na Sapanga. 12 Kwaikiva kuwela na uyambuso wekaweka wa kumghola mundu akotoho kuposa: Waghangi ni kwaikiva waweleka mbendi, waghangi wakiva mbendi kwa kugholwa na wandu, na waghangi walamula weni kuleka kutola mdala kwaikiva gha Unkosi wa Sapanga. Mweni kuwesa kupokela mavulo hagha na apokeli."

13 Hinu amonga gha wandu wakamyeghela Yesu wana wasokombi ili awavikili mawoku na kuwahighila. Ila wavulwa ghaki pawalilolile hali wakawalemesa wandu wakotoho kuwayegha wana wasokombi. 14 Yesu akalonga, "Muwaleki wana wasokombi wahiki kwa nenga, mkotoho kuwalemesa, kwaikiva Unkosi wa Kundumba ni wa wandu weni kuwela handa wana hagha."

15 Mweni, akawavikila mawoko, hinu akahuka mahala pala.

16 Mundu mmonga akamhikila Yesu, akamkonya, "Mvula, nigholi kindu kyani kya maha ili mbati ukomu wa machuwa yayendelela bila mwihu?"

17 Yesu akamyanga, "Kwa kyani ungungonya nenga nilongeleli lilando maha? Sapanga weka yaki ndiwa mweni kuwoneka na hau umaha. Ila paupala kuyingila kuukomu, ukoli lilaghilo."

18 Yula mundu akamkonya, "Lilaghilo liki?" Yesu akamyanga, "Ukotoho kukoma, ukotoho kutola mhumbu wa myaku, ukukotoho kuhija, ukotoho kulongela milando gha uhwangi, 19 watundamili tati ghako na nyongo ghako, na mpali myako handa ungujipala mweni."

20 Yula msongolo akalonga, "Havi vyogha ninguvikola, nigholi kyani kangi?"

21 Yesu akamlongela, "Ikiva ungupala uwoneki upungula ng'ogha na chochosi, uyendi ukawusi vindu ghako na uwapeghi wakapuku mapesa, na wenga utewela na ngoko kundumba, badili gha hagha uhiki unikovikeli."

22 Yula msongolo paayughanilili ghala, akayenda zyaki akiva na mang'ung'uliku, kwaikiva awelili mnahisa nesu.

23 Hinu Yesu akawalongela wavulwa ghaki, "Chakaka ninguwalongela itewesekana kwa ugangamalu mundu mnaisa kuyingila ku Unkosi wa Kundumba. 24 Kangi ninguwalongela, ni yuyughu ngamiya kuphita kulilanga lya sindanu, kupiti kwa mnaisa kuyingila ku Unkosi wa Sapanga."

25 Wala wavulwa pawayughanila nagha walikangasili nesu, wakamkonya, "Ni ghani hinu atewesa kulokoka?"

26 Yesu akawalola, akalonga, "Kwa mundu mghalu hau uwesekana ng'ogha, ila kwa Sapanga mighalu hyogha inguwesekana."

27 Hinu Petelo akayanga, na "Twenga tuleka kila kindu na tukakovekela, tutepokela kyani?"

28 Yesu akawalongela, "Ninguwalongela chakaka, Mwana wa Mundu paatehika kutama kukikalilo kyaki kya ukulu kya maha ku mlima wogha wa hyonu, mwenga mnikovekelili mtetama kuvitamilo ikumi na ivili mkiyalamula makabila ikumi na ivili gha Izilaeli." 29 Na kila mmonga alekili lighuta lyaki au mlongu au mhacha au tati au nyongo au wana au matawa kwaikiva gha nenga, atepokela miyanja imia kupiti, na kupokela ukomu wa machuva yayendelela bila mwihu. 30 Ila weni kuwela wa mtumbulo watewela wa mwihu, na weni kuwela wa mwihu watewela wa utumbulo.