1 Yesu paayomolili kulonga yala hyogha, akawalongela wavulwa ghaki, 2 "Mngumanya yiwa kuulongolo gha machuwa maivili tutewela na mhambu wa pasaka, na Mwana wa Adamu ateyeghwa kwa wahakata ghaki ili ahakilwi."

3 Lipindi lila watambika wakulu na wagogolu wa wandu wakonganili pamonga kulighuta lya Mtambika Mkulu, lihina lyaki Kayafa. 4 Wakaghola mghalu wa kumkamula Yesu kwa kifisu na kumkoma. 5 Ila wakalamula mghalu hula ukotoho kugholeka lipindi lya mhambu wa pasaka, ili kukotoho kuhumila maghasu paghati gha wandu.

6 Yesu paawelili ku Besania ukaya kwa Simoni, awelili na ukalawa, 7 mdala mmonga akamhikila akiva na supa yenikugholwa kwa liganga lyenikukemwa alabasita yeni kumema manungilo gha mapesa yatangala, akamuhikila pala alikalili kulyegha mulyo, akamyitila yala manungilo kumutu. 8 Wavulwa ghaki pawayalolili ghala wakahyoma, wakalonga, "Kwa kyani tunguyaghamisa vindu nagha? 9 Manungilo hagha yangawesili kuuswa kwa mapesa yatangala, na kuwapegha wakapuku mapesa hagha."

10 Yesu amanyili mawachilo ghao, akawalongela, "Kwakyani mngumghasa hayu mdala? Hayu kanigholela mghalu wa maha nesu. 11 Wandu wakapuku wapabaha machuwa hyogha pamonga na mwenga, ila nenga nitewela ng'ogha na mwenga machuwa hyogha. 12 Hayu nyongo anguniyandala nenga kwaikiva gha masiko ghangu. 13 Ninguwalongela chakaka, kokosi mumlimawogha hai Habali Maha itetangaswa, mghalu hau augholile nyongo hayu utelongelwa kwa kumkumbwike mweni."

14 Hinu, Yudasi Isikalioti mmonga wa wala ikumi na ivili, akayenda kwa watambika wakulu, 15 akawalongela, "Mtenipegha kindu kyani ikiva nitewayeghela Yesu kwa mwenga?" Wakampegha vipandi ikumi itatu vya lidini lya feza, 16 na kuhumila pala Yudasi akawela anguhaka fwasi maheli gha kumhyuka Yesu.

17 Lichuwa lya utumbula pambila gha mhambu wa mibumunda itayilwi ng'ogha simika, wavulwa ghaki wamyendilili Yesu wakamkonya, "Ungupala tukuyandalili kugha mulyo wa mhambu wa Pasaka?"

18 Yesu akawayanga, "Myendi kumbwani kwa mundu mtenu na haku mkamlongeli, ‘Mvula kalonga nagha, lisaa lyangu lihika kala, niteilyegha Pasaka pamonga na wavulwa ghangu kuukaya ghako.’"

19 Wavulwa wakaghola handa Yesu awalaghilili, wakayandala mulyo wa Pasaka.

20 Paihikili lumihi, Yesu pamonga na wavulwa ghaki ikumi na ivili wakatama pahi na kulyegha mulyo. 21 Pawawelili wakilyegha, Yesu akalonga, "Ninguwalongela chakaka, mmonga wa mwenga atenihyuka."

22 Wavulwa ghaki wakang'ung'ulika nesu, wakatumbula kukonya mmonga mmonga, Bambu! "Ghuli ni nenga?"

23 Yesu akayanga, "Yula angutavika libumunda mulibakuli pamonga na nenga, ndiwa hayu atenihyuka. 24 Mwana wa Adamu anguyenda zyaki handa iyandikiliwi ila atenyokolwa mundu yula atemhyuka Mwana wa Adamu Ingawelili maha kwa mweni angawelekili ng'ogha"

25 Yudasi, akiwela mweni ndiwa apalili kumhyuka, akamkonya, "Mvula! Ghuli ni nenga?" Yesu akayanga, "Wenga uilongile."

26 Pawawelili wakilyegha, Yesu akatola libumunda, akamshukwile Sapanga, akametula, akawapegha wavulwa ghaki akilonga "Mtoli mlyeghi, hau ni higha ghangu."

27 Hinu akatola kitekelu kya divai, akashukwile, akawapegha akilonga, "Mnyweghi wogha, 28 hau ndiwa mwahi wa nenga weni kulangiha yiwa lilaghanu lya nenga ni lya chakaka mwahi weni kumwahika kwaikiva gha wandu watangala ili kuwahumisila sambi. 29 Ninguwalongela, nitenywegha ng'ogha kangi divai gha sabibu mbaka lichuwa lila nitenywegha divai hyonu pamonga na mwenga kuunkosi wa Tati ghangu."

30 Pawayomolili kuyimba uyimbu, wakahuka wakayenda kulitumbi lya Mizeituni.

31 Hinu Yesu akawalongela, "Uhiku wa lelu, mwenga wogha mtenileka kwaikiva iyandikwa, nitemtova mhungaji, na mwenga wogha mtetula mbilo na kunileka." 32 Ila badili gha nenga kuhinduka, "Nitewalongolela kuyenda Galilaya."

33 Petelo akayanga, "Hata ikiva wandu wogha watekuleka, nenga nitekuleka ng'ogha."

34 Yesu akamlongela Petelo, "Chakaka ningukulongela, uhiku hau yambila njogholu kaghuta ng'ogha, utenikanila miyanja itatu."

35 Ila Petulo akalonga, "Hata ikawela ingupalwa kuhwegha pamonga na wenga, nitekukanila ng'ogha." Na wavulwa ghangi wogha wakalonga hila hila.

36 Hinu Yesu akayenda pamonga na wavulwa ghaki kukitawa Getisemani, akawalongela wavulwa ghaki, "Mtami baha na nenga ninguyenda kula kuyupa." 37 Akawatola Petelo na wana waivili wa Zebedayu, Yesu akatumbula kuwela na mang'ung'uliko na kunyengemala. 38 Hinu akawalongela, "Niwela na mang'ung'uliko makulu mmoyu hata pabehi gha kuhova. Mtami baha mkotoho kuwonja."

39 Hinu, akayenda kuulongolo mayaghani, akaguwila mtima, akayupa, "Tati ghangu, ikiwela inguwesekana, kitekelu kya mahakilo haki kinihuki, ila ikotoho kuwela handa nipala nenga, ila handa ungupala wenga."

40 Akawayendela wala wavulwa, wala awalolili wawonja, Akamlongela Petelo, "Ndiwa kulonga muwesa ng'ogha kutama mihu ili muweli pamonga na nenga hata lisaa limonga? 41 Mtami mkotoho kuwonja ila kuyupa ili mkotoho kuyingila kumayesu. Kwaikiva Mpumulo ungupala ila higha ulepelela makakala."

42 Akayenda kangi lyanja lya ivili, "Akayupa wenga Tati ghangu, handa inguwesekana ng'ogha kuhyeta mahakilo hagha makulunga hinu ugholi handa ungupala wenga." 43 Akawayendela kangi, akawalola wawonja, kwaikiva wawelili na luwonu.

44 Hinu, akawaleka, akayenda kangi kuyupa lihanja lya itatu kwa milando hilahila. 45 Hinu akahuya kwa wavulwa ghaki, na akawalongela, "Mkali mkawonja na kupumulila? Mloli, lisaa lihika kala Mwana wa Adamu angukamulwa na kuyeghwa kwa wandu wahakata. 46 Myinuki tuyendi, uloli anguhika yula atenihyuka nenga!"

47 Yesu paawelili angulongela na weni, Yudasi mwenikuwela mmonga wa wala ikumi na waivili, akahika akiwela angukovekelana na lipinga likulunga likiwela na mipanga na vimbonga wenikuyeghwa na vilongosi wa watambika na vilongosi wa Wayahudi. 48 Yula apalile kumhyuka Yesu, awelili kawapegha kala kilangihi akilonga, "Yula nitemjambusa kwa kumkusukila ndiwa mumkamule."

49 Hinu Yudasi akamyendela Yesu, akamlongela, "Habalee, Mvula!" na akamkusukila.

50 Yesu akamlongela, "Ghanja, ughole kila ukihikila kukighola."

Pala wala wandu wakamyendela, na kumkamula Yesu na kumuwopa. 51 Na mmonga paghati gha wala wawelili pamonga na Yesu paalola vila, akakola lipanga lyaki, akauhomola na kumtova mhusutu wa Mtambika Mkulu, akamhinja lipulikilo. 52 Yesu akamlongela, "Uhuyisi lihimbi lyaki mumhaku ghaki, kwaikiva yeyose angutumila lipanga, atehova kwa lipanga. 53 Ghuli, mmanya ng'ogha yiwa ninguwesa kumluwa mtanga Tati ghangu na mweni akawesa kuniyeghela kwa kuloposela mapinga yapiti ikumi na ivili gha watumikila ghaki wa kundumba kwa Sapanga? 54 Ila handa paniteghola nagha yatetimilaghuli Mayandiko yala yenikulonga ingupalwa ihumili nagha?"

55 Lipindi lila Yesu akawalongela lila lipinga lya wandu, "Mnguhika kungamula na mihimbi pamonga na vimbonga handa vila nenga ni mpokola? Machuwa hyogha niwelili ku Lighuta lya Sapanga nikivula, na mnikamula ng'ogha! 56 Ila hagha hyogha yahumila ili ghala wayandikile walota kweni Mayandiko gha Sapanga yapati kutimila."

Hinu watumikala wogha wakamleka, wakabhutuka.

57 Hinu wala wandu wamkamulili Yesu wakamyegha ukaya kwa Kayafa mwenikuwela mtambika mkulu, pala walikungulile wavula wa laghililo na vilongosi wa Wayahudi. 58 Petelo amkovekelili kwa utali mbaka mulyugha lya lighuta kwa Mtambika mkulu, akayingila mghati pamonga na wagholokela ili awese kulola mighalu itegholeka. 59 Hinu, watambika wakulu na njengakaya hyogha wakahakula kilangihi kya uhwangi kwa Yesu ili wapati kumkoma, 60 ila wapata ng'ogha kihighilisu chochose, pamonga na kuhika wahighilisa watangala wa uhwangi. Kuulongolo ghaki badili gha ghala wakahika walangihi waivili, 61 wakalonga, "Mundu hayu ailongile, ‘Ninguwesa kuyaghamisa Lighuta lya Sapanga na kuchenga kangi kwa lichuwa machuwa itatu.’"

62 Mtambika mkulu akagholoka, akamkonya Yesu, "Ghuli, wenga kwahela kya kuyanga kwa kila wangulongela wandu hagha?" 63 Ila Yesu atamili nuu. Mtambika Mkulu akamlongela, "Ningukulapila kwa lihina lya Sapanga ghako, utulongeli yiwa wenga ndiwa Kilisito, Mwana wa Sapanga."

64 Yesu akamlongela, "Wenga uilongile! Ila ninguwalongela, kuhumila hinaa mtemlola Mwana wa Mundu kalikala upandi wa kuliyila wa yula Bambu Mweni Makakala, na akihika kunani gha mahindu gha kundumba."

65 Ndiwa Mtambika mkulu akalalula nguu zyaki, akalonga, "Hayu kalighu! Tungulindila uhighilisu ghani? Hinaa myoghanila mwaweni malighu ghaki. 66 Mwenga mnguliwachila kyani?"

Weni wakamyanga, "Angupalwa ahovi!"

67 Hinu wakamuhunyila mata kuwuso, wakamtova ndwangisa. Ghangi wakiva wangumtova mimbandi, 68 wakalonga, "Ulote hinaa, wenga kwa mlota ng'ogha, ni ghani kakutova!"

69 Petelo awelili kalikala panji mlyugha. Hinu, mtumikila mmonga mdala Mtambika Mkulu, akamyendela, akalonga, "Wenga uwelili pamonga na Yesu wa Galilaya."

70 Petelo akalema kuulongolo gha wogha akalonga, "Nimanya ng'ogha hata kila ungukilongela." 71 Paawelili akihuka panji kuhika kumlyangu, mtumikila ghangi mdala amlolile, akawalongela wandu wawelili pala, "Hayu mundu awelili pamonga na Yesu, Mnazaleti."

72 Petelo akalema kangi kwa kilapo, "Nimmanya ng'ogha mundu hayu."

73 Kuulongolo mayaghani, wandu wawelili pala wakamuyendela Petelo, wakamlongela, "Kwa chakaka, wenga hilahila ni mmonga wa weni, kwaikiva vila ungulongela ni handa weni."

74 Ndiwa Petelo akatumbula kujilapila akilonga, "Ningulapa yiwa kila ningukilonga ni chakaka! Handa ningulongela uhwangi Sapanga anidumuli mawoku! Nimmanya ng'ogha mundu hayu!" Bwitu njogholu akatova lilowi. 75 Petelo aikumbwiki milando alongelilwi na Yesu, "Pambila njogholu kukuwa lilowi, utenikanila mihanja miitatu," akahuma panji, na kulila kwa lusungu.