1 Hinu, Mafalisayo na wavula wa laghililo lya Sapanga ampeghili Musa wakahika kuhuma ku Yelusalemu, wakamuyendela Yesu, wakamkonya, 2 "Kwakyani wavulwa ghako wangupingika malaghililo tupokelili kuhuma kwa vilongosi wa twenga wa dahile? Wangukuwa ng'ogha mawoko vila ingupalwa pambila gha kulyegha!"

3 Yesu akawayanga, "Kwakyani na mwenga mngupingika malaghililo gha Sapanga, ila mngughola mavulo gha mwenga weka? 4 Kwaikiva Sapanga ailongile, ‘Uwatundamili wa tati ghako na nyongo ghako,’ na ‘mundu yoyosi mweni kumlighu tati ghaki au nyongo ghaki, angupalwa akomwi.’ 5 Ila mwenga mnguvula yiwa mundu pakawela na hindu gha kumtanga tati ghaki au nyongo ghaki, ila akalonga, ‘Kindu haki ni kya Sapanga,’ 6 hinu, unguwesa ng'ogha kumtundamila tati ghako kwa kumpegha kindu haki! Havi ndiwa mngupughanya lilando lya Sapanga kwa kukovekela mavulo gha mwenga weni. 7 Mwenga wambindingu! Mlota Isaya alotili vila ingupalwa yala yatehumila kwa mwenga! 8 Sapanga angulonga, ‘Wandu hagha wangunitundamila kwa milando hela, ila mumioyu ghao iwela kutali na nenga. 9 Kunitundamila kwa weni kunguwatanga ng'ogha chochosi, kwaikiva mavulo ghao yayandalwa na wandu hela wakilonga ni gha Sapanga.’"

10 Yesu akalikema lila lipinga lya wandu, akalilongela, "Myughanili, na mmanyi! 11 Kindu kingumghola mundu akotoho kujumilwa kuulongolo gha Sapanga, ng'ogha kila kiyingila kumlomo, ila milando yeni kuhuma kumlomo. Haki ndiwa kingumghola mundu akotoho kujumilwa kuulongolo gha Sapanga."

12 Hinu wavulwa ghaki wakamyendela, wakamlongela, "Ghuli, ungumanya yiwa Mafalisayo wahyomili pawayughanila milando ghako?"

13 Ila mweni akawayanga, "Kila kyeni kukulilwa ng'ogha na Tati ghangu, kitetupulwa. 14 Muwaleki hagha ni vilongosi wangalimihu, wanguwalongosa wangalimihu. Na paikawela angalimihu angumlongosa angalimihu myaki, wogha waivili watedubukila mlyohu."

15 Petelo akalonga, "Utulongeli ungumanisa niki mlandano hau."

16 Yesu akalonga, "Na mwenga mmanya ng'ogha mlandano hau? 17 Ghuli, mmanyang'ogha yiwa kila kimyingila mundu mumlomu kinguyenda mumtima na kuulongolo kinguhumiswa panji kinguwela ndaka? 18 Ila mighalu yenikuhuma mumlomu inguhuma mmoyu, na haki ndiwa kingumghola mundu akotoho kujumilwa kuulongolo gha Sapanga. 19 Kwaikiva mmoyu yanguhuma mawachilo mahakata yeni kumlongosa mundu kukoma, ungongola, kutola mdala au mlumi wa myako, wihi, ulangihi wa uhwangi na malighu. 20 Hagha ndiwa yangumghola mundu akotoho kujumilwa kuulongolo gha Sapanha. Ila kulyegha mulyo ukaleka kukuwa mawoku haku kunguwesa ng'ogha kumghola mundu akotoho kujumilwa kuulongolo gha Sapanga."

21 Yesu akahuka mahala pala na akayenda kumimbwani pabehi na Tilo na Sidoni. 22 Hinu nyongo mmonga wa lipinga lya wandu wa Kaanani akamuhikila, akalila, akilonga, "Bambu, Mwana wa Daudi, uniwoneli luhungu! Biti ghangu angughaswa na lihoka."

23 Ila Yesu amyangili ng'ogha. Hinu, wavulwa ghaki wakamyendela, wakamlongela, "Amlongeli ayendi zyaki kwaikiva angutukovekela kuhyetu kunu akitutovela lilowi."

24 Yesu akawayanga, "Nilaghilwa hela kuwalokola wandu wa mlima wa Izilaeli weni kuyaghamila handa kondolu."

25 Bahala yula nyongo akahika, akimtundamilila manung'una, akalonga, "Bambu, undangi."

26 Yesu akamyanga, "Maha ng'ogha kutola mulyo wa wana na kuwadangila waghalu."

27 Hayu nyongo akayanga, "Ni chakaka, Bambu, ila hata ghalu wangulyegha vyenikuhighala na kuguwa pahi kuhuma kumesa gha Bambu ghao."

28 Bahala Yesu akamyanga, "Nyongo, kukwinila ghako ni kukulu, hinu, ugholelwi handa ungupala." Yula biti ghaki akalama lipindi lilalila.

29 Yesu akahuka pala akayenda mmbalimbali mwa lihiwa Galilaya, akakwela mlitumbi, akatama pahi. 30 Wandu watangala nesu wakamhikila wakiwayegha wavina na kuwavika kuulongolo ghaki, wangali kulola, walemafu kutyanga, wangali kulonga, na ghangi wogha wenikuwela wavina, mweni Yesu akawalamisa. 31 Lipinga lila lya wandu walikangasili nesu pawalolili angalikulonga akilonga, wenikuwela walemafu wa maghulu wangutyanga, na wangali kulola wangulola, wandu wakamyinula Sapanga mweni kutundamilwa na wandu wa Izilaeli.

32 Hinu, Yesu akawakema wavulwa ghaki, akalonga, "Ninguwawonela luhungu wandu hagha kwaikiva wawela na nenga kwa machuwa itatu, na wawelili ng'ogha na mulyo. Na nenga ningupala ng'ogha kuwataula kunu wakiwela na njala, kwaikiva watewesa kuhyunga mnjila."

33 Wavulwa ghaki wakamlongela, "Mahala haku wangulikala ng'ogha wandu, ghuli, tutepokela kugha mulyo wa kuwakwila wandu watangala hagha wogha?"

34 Yesu akawakonya, "Mvile na mibumunda mininga?" Wakamyanga, "Mibumunda isaba na vihomba vya mayaghani vinung'unanung'una."

35 Hinu, Yesu akawalongela wandu watami pahi. 36 Akaitola hila mibumunda isaba na vila vihoba, akamyupa Sapanga, akavimetula, akawapegha wavulwa, na weni wakawapegha wandu. 37 Wogha wakalyegha, wakayukuta hinu wavulwa wakakungula vila vihighalili, wakamemesa vibeja isaba. 38 Wandu walyeghili wawelili walumi ielfu inne, wakileka kuvalanga wadala na wana.

39 Hinu, Yesu akawataula wandu, akakwela whatu, akayenda kumuji wa Magadani.