1 Yesu na wavulwa ghaki pawawelili pabehi gha kuhika Yelusalemu, wakahika Betifage kulitumbi lya Mizeituni, ndiwa akawalaghila wavulwa ghaki waivili, 2 akawalongela, "Myendi mbaka kukimbwani kyeni kuwela kuulongolo gha mwenga na mtemlola punda kawopwa na mwana punda kawopwa mmbali ghaki. Muwawopoli na muwayeghi kwa nenga. 3 Na paikawela mundu yeyosi kawakonya kwa kyani mnguwatola, mumlongeli, ‘Bambu anguwapala,’ na mweni atewalekesela muwahuyisi njenji."

4 Mghalu hau uhumilili ili ghala yalongilwi na mlota wa Sapanga yatimili.

5 "Walongeli wandu wa Sayuni,

nkosi ghako anguhika hinaa!

Ni mlungwana kanguhika akiwela kalikala kunani gha mbunda, avili na mwana ghaki msokombi."

6 Hinu, wala wavulwa wakayenda wakaghola handa Yesu awalaghilili. 7 Wakamyegha yula mbunda na mwana ghaki, wakayanjasa nguu zyau kunani ghao na Yesu akatama kunani ghaki. 8 Lipinga likulunga lya wandu likayanjasa nguu zyao mnjila, na wandu waghangi wakadumula viputila vya mibiki wakayanjasa mnjila. 9 Lila lipinga lya wandu lyeni kumlongolela na lila lyenikumkovekela likaguta lilowi, "Asifilwi Mwana wa Daudi! Ahighilwi hayu anguhika kwa lihina lya Bambu! Asifilwi Sapanga kunani!"

10 Yesu pawelili anguyingila ku Yelusalemu, wandu wogha wa mmbwani wakawela na holu, wandu wakakonyana, "Hayu ni ghani?"

11 Wandu kulila lipinga wakalonga, "Hayu ni Yesu, yula mlota kuhuma ku Nazaleti mmbwani wa Galilaya."

12 Hinu, Yesu akayingila kuliugha mlighuta lya Sapanga, akawawinga panji wandu wawelili wanguwusa na kuhemela hindu mghati mwa lighuta lya Sapanga, akaghalambula mesa sya wala wawelili wangupeghana mapesa, na vitamilo vya wala wawelili wanguwusa ngunda. 13 Akawalongela, "Iyandikwa ku Mayandiko gha Sapanga, lighuta lyangu litekemwa lighuta lya kuyupila. Ila mwenga mghola yiwa mbaku gha wapokola."

14 Wangalikulola na walemafu waghangi wakamyendela kula mlighuta lya Sapanga, na mweni Yesu akawalamisa. 15 Hinu watambika wakulu na wavula wa laghililo pawayalolili makangasu ayagholili Yesu, na kangi wana wanung'una pawawelili wanguguta lilowi mlighuta wakilonga, "Asifilwi Mwana wa Daudi," Wakahyoma. 16 Hinu wakamlongela, "Ghuli, unguyughanila ng'ogha haki wangukilongela?" Yesu akawayanga, "Hina, ninguyughanila! Ghuli mpatili ng'ogha kusoma Mayandiko hagha?

‘Kuhuma kumilomo gha wana wanung'una na wanachali wenga Sapanga ungusifilwa?’"

17 Hinu, akawaleka akahuma panji gha mmbwani na kuyenda Besania, akaghonja kula.

18 Yesu pawelili anguhuya kumbwani malawila pee, akawela na njala. 19 Aliwonili libiki lya mtini limonga mmbali gha njila, akaliyendela, ila kalola ng'ogha chochosi bali mahamba hela. Hinu, akaulapila, "Ukotoho kulela kangi matungula machuva hyogha bila mwihu!" palapala hula mtini ukanyala.

20 Wavulwa pawalolili ghala wakalikangasa wakalonga, "Kwakyani mtini hau unyala bwitu?"

21 Yesu akawayanga, "Chakaka ninguwalongela, ikiva mtewela na ukwinila na mkawela ng'ogha na holu mnguwesa kughola nagha na hata mkililongela litumbi hali, ‘Utupuki na ukataghwi mmbahali,’ itewela nagha. 22 Hilahila pamkawela na ukwinila, chochosi mtekiluwa, mtepokela."

23 Yesu ayingilili mlighuta lya Sapanga, akawela anguvula. Pawelili anguvula, watambika wakulu na wagogolo wa wandu wakamkonya, "Ungughola mighalu hagha kwa uweso wa ghani? Ghani kakupegha uweso hau?"

24 Yesu akawayanga, "Na nenga nitewakonya lilando limonga, na paikawela mteniyanga, hinu na nenga nitewalongela ningughola mighalu hai kwa uweso wa ghani. 25 Ubatisu wa Yohanauhumili kugha? Ghuli, uhumili kundumba au kwa wandu?"

Wakatumbula kukonyana weni kwa weni na kulonga, "Patutelonga uhumili kundumba atetukonya, hinu kwakyani muukwinila ng'ogha?" 26 Na patutelonga, "Uhumili kwa wandu, tungutila lipinga lya wandu kwaikiva wogha wangujumila yiwa Yohanani mlota wa Sapanga." 27 Hinu, wakamyanga, "Tumanya ng'ogha!" Na mweni Yesu akawalongela,

"Na nenga kangi nitewalongela ng'ogha ningughola mighalu hai kwa uweso wa ghani."

28 "Mwenga mnguliwachila niki, mundu mmonga awelili na wana waivili walumi. Akamlongela yula wa mtumbula, ‘Mwana ghangu, lelu uyendi ukagholi lihengu kukitawa kya mizabibu.’ 29 Yula mwana ghaki akamyanga, ‘Nema!’ Ila kuulongolu akaghalambula mawachilo ghaki, akayenda kughola lihengu. 30 Yula Tati akamlongela mwana ghaki wa ipili hila hila, na mweni akamyanga, ‘Ena tati!’ Ila kayenda ng'ogha kulihengu. 31 Ghuli, ni ghani paghati gha hagha wavili kaghola vila apalili Tati ghaki?"

Wakamyanga, "Yula mwana wa utumbula."

Hinu, Yesu akawalongela, "Chakaka ninguwalongela, wakungula usulu na waghola ngongola watelongola kuyingila kuunkosi wa Sapanga yambila gha mwenga. 32 Kwaikiva Yohanaahikili kwa mwenga akawalangiha njila gha maha, ila mwenga mumkwinila ng'ogha, bali wakungula usulu na waghola ngongola wakamkwinila. Hata badili gha kulola hagha hyogha mleka ng'ogha mahakata na kumhyukila Sapanga."

33 Yesu akalonga, "Mhyoghanili malandano ghangi. Mundu mmonga mweni litawa atukutulili misabibu, akalitindililila likuta, akahimba lyowu lya kugholela divai, na akachenga kindangawala kya kugholokelela, hinu akalikodisa kwa watukutula na mweni akatumbula mwanja mbaka mlima wa kutali." 34 Lipindi lya mabenu palihika, akawalaghila watumikila ghaki kwa wala watukutula, ili watoli lihomosu lyaki lya mabenu. 35 Wala watukutula wakawakamula wala watumikila, mmonga wakamtova, na ghangi wakamkoma na ghangi kangi wakamtova maganga. 36 Yula mundu akawayegha kangi watumikila waghangi, watangala kupiti wala wa lyanja lya utumbula. Wala watukutula wakawagholela hilahila. 37 Mwihu ghaki akamyegha mwana ghaki kunu akililonga, "Watemtundamila mwanaghangu." 38 Ila wala watukula pawamlolili mwana ghaki wakalongelana weni kwa weni, "Hayu ndiwa mlihi, tumkomi ili tutoli ulihi ghaki!" 39 Hinu, wakamkamula, wakamuhumisa panji gha lila litawa lya mizabibu, wakamkoma.

40 Yesu akakonya, "Hinu, lipindi mweni litawa lya mizabibu paatehika, atewagholela kyani wala watukutula?"

41 Weni wakamyanga, "Atewakoma wogha wahakata, na lila litawa atewapegha watukutula waghangi wa kumpegha lihomosu lyaki lya mabeno lipindi lya mabeno."

42 Yesu akawalongela, "Ghuli, msoma ng'ogha mghalu hau ku Mayandiko?"

Yeni kulonga, "Liganga walilemili wachenga,

hinaa liwela liganga lya maha lya kitamilo.

Bambu ndiwa agholili mghalu hau,

na lyeni ni lya kukangasa nesu kwa twenga!"

43 "Kila ningukimaanisa ni haki," "Unkosi wa Sapanga utehumiswa kwa mwenga na kupeghwa wenikuwela Wayahudi ng'ogha hula unguwesa kulela matungula." 44 Hilahila akalonga, "Yeyosi ateguwila kunani gha liganga hali atedumuka vipandi vipandi, na yula ateguwilwa na lyeni, litemhyagha."

45 Watambika wakulu na Mafalisayo pawayughanilili hila milandano ghaki Yesu, wakamanya yiwa awelili anguwalonga weni. 46 Wakahakula njila gha kumkamula ila wakatila lila lipinga lya wandu kwaikiva wandu wammanyili Yesu yiwa ni mlota wa Sapanga.