1 Yesu akayingila muwhatu, akahubhuka lihiwa Galilaya na kuhika kummbwani ghaki Kapelnaumu. 2 Lipindi lila lila wakamyeghela mundu mmonga mweni kupola higha, akiwela kawonjeswa mlihinda. Yesu paalolili kukwinila kwau, akamlongela yula mundu mweni kupola, "Ujipeghi moyu mwana ghangu, sambi syako silekeselwa."

3 Wamonga wa wavula wa laghililo wakatumbula kulongelana, ghuli, "Mundu hayu angumlighu Sapanga ng'ogha?"

4 Ila Yesu amanyili mawachilo ghao, akalonga, "Kwakyani mnguwachila mahakata? 5 Ni kyani kivile kiyuyuhu nesu. Kulonga, ‘Ulekeselwa sambi syako,’ au kulonga, ‘ugholoki, utyangi?’ 6 Hinu, ningupala mmanyi yiwa Mwana wa Mundu kanauweso kumlima wogha wa kuwalekesela wandu sambi." Na hinu akamlongela yula mundu mweni kupola, "Ugholoki, utoli lihinda lyako, uyendi ukaya ghako."

7 Mundu yula akagholoka, akayenda ukaya ghaki. 8 Wandu wogha kulila lipinga pawalola ghala, wakalikangasa na kutila, wakamtundamila Sapanga mweni kuwapegha wandu uweso wa ndambu hila.

9 Yesu ahukili pala, na paawelili akiyenda zyaki, akamlola mundu mmonga akemilwi Matayu, katama kumahala wangutumila kukungula usulu. Hinu, Yesu akamlongela, "Unikovekeli."

Mweni Matayu akagholoka, akamkovekela.

10 Yesu paawelili ukaya katama kulyegha mulyo, wakungula usulu watangala na weni sambi wakahika wakatama pamonga na mweni na wavulwa ghaki. 11 Mafalisayo pawayalola ghala, wakawalongela wavulwa ghaki, "Kwa kyani mvula wa mwenga angulyegha pamonga na wakungula usulu na weni sambi?"

12 Ila Yesu paayughanila ghala, akalonga, "Wandu wakomu wangupala ng'ogha mlamisa, ila wala weni kumpala mlamisa ni wala wavina. 13 Myendi mkajivuli hai milando ingumanisa nini, ‘Ningupala umaha, na ng'ogha hupo.’ nihika ng'ogha kuwakema wandu wa maha, ila weni sambi."

14 Hinu wavulwa wa Yohana Mbatisa wakamyendela Yesu, wakamkonya, "Twenga na Mafalisayo tunguwopa lipindi litangala, kwa kyani wavulwa ghako wanguwopa ng'ogha?"

15 Yesu akawayanga, "Ghuli, wakemilwi kumhambu wangupalwa kulumbilila lipindi Bambu wa mhambu kapamonga na weni? Ila lipindi litehika pala bambu wa mhambu atehusiwa kwa weni, na baha ndiwa lipindi watewopa mulyo."

Kinyakunyaku kunguu 16 Kwahela mundu kangusonela kinyakunyaku kya hyonu kunguu ihakala, kwaikiva kila kinyakunyaku kitelakatuka kuhuma kuhai nguu na kulakatuka kwa nguu hai kutewela kukulu nesu kupiti haku mtumbulo. 17 Kangi kwahela wandu wanguvika divai hyonu kumhaku wa ngosi uhakalili. Pawaghola nagha, mhaku hau utebaluka na divai hai iteyitika, na mhaku hau uteyalamika, ila wandu wanguvika divai hyonu mumhaku wa hyonu, na vyogha viivili divai na mhaku vitebaluka ng'ogha na divai iteyitika ng'ogha.

18 Hinu Yesu pawelili akilonga hagha, mkulu mmonga Myahudi akahika, akamtundamila na kulonga, "Mhinja ghangu kahova hinaa Bambu. Pepayi tuyende ukamvikili liwoko lyako na mweni atelama."

19 Yesu akahuka pamonga na wavulwa ghaki, na mweni akamkovekela.

20 Lipindi lilalila nyongo mmonga, mvina wa ligholovela kwa lipindi lya machuva ikumi na ivili, akamkovekela Yesu kuhyetu, na akayavisa luviniku lya nguu ghaki. 21 Agholili nagha kwaikiva aliwachilili mmoyu ghaki, "Paniyavisa hela lihabiti lyaki nitelamiswa."

22 Hinu, Yesu akaghalambuka akamlola, akamlongela, "Ujipeghi moyu biti ghangu! Ukwinila ghako ukulamisa." Nyongo yula akawela mkomu lipindi lilalila.

23 Hinu Yesu akayingila ukaya kwa yula mkulu. Na paawalola walumbilila wakikuwa filimbi, 24 akalonga, "Mhuki baha! Mhinja hayu kahova ng'ogha kawonja hela." Na weni wakamheka. 25 Hinu lipinga lya wandu palihumisilwi, Yesu akayingila mghati, akamkola yula mhinja liwoko, na mweni akayimuka. 26 Mghalu hula ukalandala nesu kumlima hula wogha.

27 Yesu akahuka mahala pala, na paawelili anguyenda, wangali kulola waivili wakawela wakimkovekela kunu wakitova lilowi wakulonga, "Mwana wa Daudi, utuwoneli luhungu!"

28 Yesu pakayingila ukaya, wala wandu waivili wakamyendela, na mweni akawakonya, "Ghuli, mngunikwinila yiwa ninguwesa kuwagholela mghalu hau?"

Na weni wakamyanga "Hina, Bambu."

29 Bahala Yesu akawayavisa mihu ghao, akalonga, "Na iweli nagha kwa mwenga handa kukwinila kwa mwenga." 30 Na mihu ghao ikawoposolewa. Mweni Yesu akawavikila mkasu, "Mkotoho kumlongela mundu yeyosi mhalu hau."

31 Ila weni wakahuka, wakatangasa habali zya Yesu kumlima hula wogha.

32 Wandu pawawelili wanguhuka, wamonga wakamyeghela Yesu mundu mmonga awelili kanguwesa ng'ogha kulongela na mwenikuwela na lihoka. 33 Ila bahala yula lihoka paahumisilwi, mundu yula mwenikuwela kanguwesa ng'ogha kulonga akatumbula kulonga kangi. Wandu wakalikangasa na kulonga, "Mghalu handa hau tuulola ng'ogha ku Izilaeli!"

34 Ila Mafalisayo wakawela wakilonga, "Anguwawinga mahoka kwa uwesa wa mkulu wa mahoka."

35 Yesu akatyangila mimbwani na vimbwani vyogha, akavula kumaghuta gha kukonganika Wayahudi akilongela Habali Maha gha Unkosi wa Sapanga, na kulamisa wavina wogha na ulepelelu wa ndambu wekaweka. 36 Hinu, paawalolili wandu, mapinga kwa mapinga, awawonilili luhungu kwaikiva wawelili wavina na wawelili wamanya ng'ogha kya kughola handa kondolu wenikuwela ng'ogha na mhungaji. 37 Pala akawalongela wavulwa ghaki, "Kuwela na mabeno matangala gha kuyayegha, ila waghola lihengu ni mayaghani. 38 Hinu mumluwi Bambu wa mabenu awayeghi waghola lihengu wabeni mabenu ghaki."