1 Yesu paaghulukili mlitumbi, mapinga yatangala ya wandu yamkovekelili. 2 Hinu, akahika mundu mmonga mweni ukalawa, akahika na akamtundamila manung'una na akalonga, "Bambu, paupala unguwesa kunighulula!"

3 Yesu akamyavisa kwa liwoku lyaki na kulonga, "Ningupala! Ughululiki." lipindi lilalila yula mundu akalama ukalawa ghaki. 4 Hinu Yesu akamlongela, "Mghalu hau ukotoho kumlongela mundu yeyosi, ila uyendi ukajilangihi kwa watambika, na kuwapegha litambiku lilaghililwi na Musa kuwahighilisila yiwa ulama."

5 Yesu paawelili anguyingila kummbwani wa Kapelinaumu, mtovangondo mkulu mmonga akamyendela, akamluwa mtanga, 6 akilonga, "Bambu, mtumikila ghangu kawonja mukindanda ukaya, kana uvina wa kupola vikongonu na kangulwala nesu."

7 Yesu akamlongela, "Niteyenda nimlamisi."

8 Hayu mtovangondo mkulu akamlongela, "Bambu, nenga ningupaliwa ng'ogha wenga ukayingila ukaya kwa nenga kwa ukulu ghako, ila ulonge hela lilando, na mtumikila wa nenga atewela mkomu. 9 Kwaikiva, hata nenga ni mundu wa pahi gha ulongosi wa mlongosa ghangi, na niwela na watovangondo pahi ghangu. panimlongela mmonga, ‘Uyendi!’ na mweni kanguyenda, na ghangi, ‘Uhiki!’ mweni kanguhika na mtumikila wa nenga, ‘Ugholi kindu haki!’ na mweni kangughola."

10 Yesu paayughanilili ghala, akalikangasa, akawalongela wandu weni kuwela wakimkovekela, "Chakaka ninguwalongela, mbata ng'ogha kulola mundu yoyosi ku Izilaili mweni ukwinila handa hau. 11 Hinu, ninguwalongela yiwa wandu watangala watehika kuhuma kula kuhumila lijuwa na kula kuhongela lijuwa, weni watelikala na kulyegha pamonga na Ibulahimu na Isaka na Yakobu ku Unkosi wa Sapanga. 12 Ila Waizilaeli watangala wenikupalwa kuwela kweni hau Unkosi wa kundumba watedangwa panji, mlwisa, haku kutewela na kililo na kuhyagha malinu." 13 Hinu Yesu akamlongela yula mtovangondo mkulu mlumi, "Uyendi ukaya, na iweli handa ukwinilile." Na mtumikila ghaki akawela mkomu lipindi lilalila.

14 Yesu akahika ukaya kwa Petelo, na akamlola nyongo mkwahanu wa Petulo kawonja mkindanda, anguhemka nesu. 15 Hinu, Yesu akamyavisa yula nyongo liwoku, na ulwala ukamleka akatandamuka na akagholoka, na akatumbula kuwatelekela.

16 Palihongili lijuwa, wandu watangala wenikukolwa na mihoka, wakayeghwa kwa Yesu na mweni akawahumisa wala mihoka kwa kulongela weka, na kulamisa wavina wogha. 17 Hagha hyagha yagholekili ili litimile lila lilongeliwi na Isaya mwenikuwela mlota wa Sapanga, "Mweni baha atolili ulepelelu wa twenga, na kupapa mavina gha twenga."

18 Yesu paalolili lipinga lya wandu limtindila, akawalongela wakovekela ghaki wahubhuki kumwambu gha lihiwa. 19 Mvula mmonga wa laghililo lya Musa akamyendela, Yesu akamlongela, "Mvula, nenga nitekukovikela kokosi kula unguyenda."

20 Yesu akamyanga, "Mbweha wawela na mbangu, na mbongu wawela na fijaka, ila Mwana wa Mundu kahela mahali pakupumulilila."

21 Hinu mkovekela ghangi paghati gha wavulwa ghaki akamlongela, "Bambu, unileki huti nikamsiki tati ghangu."

22 IIa Yesu akamlongela, "Unikovikeli! Uwaleki wahovili wawasiki wandu ghao wahovile."

23 Yesu akakwela whatu mkulu, na wavulwa ghaki wakayenda pamonga na mweni. 24 Pawawelili wakiyenda bwitu liyegha likulunga likahumila mlihiwa, hata mawimbi ghakatumbula kugubika whatu. IIa Yesu awelili kawonja lughonu. 25 Wavulwa ghaki wakamyendela, wakamyimusa wakilonga, "Bambu, utulokoli, tunguyaghamila!"

26 Yesu akawalongela, "Mwenga wandu weni kukwinila mayaghani, kwa kyani mngutila?" Hinu, akayimuka, akalikalipila liyegha na lila lihiwa, likaponga nesu.

27 Wandu wakalikangasa, wakalonga, "Mundu hayu ni wa ghuli? Hata lihoka na mawimbi vingumyitikila!"

28 Yesu pahikili mlima wa Wagelasi, kumwambu gha lihiwa galilaya, wandu waivili weni kukolwa na mahoka wakihuma kumamambi wakakongine na mweni. Wandu hagha wawelile wakalipa nesu mbaka ikawaghola amonga gha wandu watili kutyanga kunjila hila. 29 Hinu hagha wandu pawamlolile Yesu wakatumbula kutova lilovi, "Ungupala kyani kwa twenga, wenga Mwana wa Sapanga? Ghuli, uhika kutuhakili pambila gha lipindi livikilwi?"

30 Pabehi na mahala pala pawelili na lipinga likulunga lya mighuluwi likihungwa. 31 Hinu, wala mahoka wakamluwa Yesu, "Pautuhumisa hamu, hinu utuleki tuyingili kwa mighuluwi hila."

32 Yesu akawalongela, "Myendi!" Hinu wakawahuka wandu wala, wakawayingila mighuluwi. Lipinga lyogha lya mighuluwi likahuluka mbaka kula kumghuluko mkali, likadubukila mlihiwa, hinu mighuluwi hyogha ikahova mmasi.

33 Ila wala wawelili wakiwahunga wala mighuluwi wakabhutukila mmbwani. Haku wakalonga habali zyogha na mighalu hila iwakolili wala wandu wawelili wakolwa na mihoka. 34 Hinu, wandu wogha kummbwani hula wakahuma, wakamyendela Yesu, na pawamlola, wakamluwa ahuki kumlima ghao.