1 Lichuwa lilalila, Yesu akahuka kulila lighuta, akayenda na kutama mmbali gha lihiwa Galilaya. 2 Lipinga likulunga lya wandu likalikungula kumtindila, hata ikamghola ayingili na kutama muwhatu. Kunu wandu wogha wakigholoka mmbali gha lihiwa. 3 Ndiwa Yesu akawalongela milando itangala kwa milandano, akilonga,

"Mkulila ahukili kuyenda kukulila mbeyu zyaki. 4 Paawelili akikulila mbeyu kulitawa, mbeyu zighangi ziguwili mnjila, na wambongu wakahika wakazilyegha. 5 Zighangi ziguwili kumaganga pala pawela ng'ogha na lutupi lutangala. Zikawoneka kumela kwa kuloposela kwaikiva kuwelili ng'ogha na utali mkulunga wa lutupi kuyenda pahi. 6 Lijuwa palihomolili zikalungula, na kwaikiva ziwelili ng'ogha na mikigha mitali zikahova. 7 Zimonga zikamela na mibiki gha mihomi, na yeni mihomi ikakula na kuitindila. 8 Na zimonga ziguwili mmuhanga wamaha, zimelili, na zikalela zimonga mbunji imia, na waghangi mbunji isitini na zimonga mbunji iselasini."

9 Hinu Yesu akawalongela, "Mweni mapulukilo gha kuhyoghanilila na ahyoghanili!"

10 Wavulwa ghaki wakamyendela, wakamkonya, "Kwakyani ungulonga na wandu kwa milandano?"

11 Yesu akawayanga, "Sapanga kawawesesa mwenga mmanyi ghala gha mkifisu ku Unkosi ghaki, ila weni wapeghwa ng'ogha uweso wa kuyamanya hagha hyogha." 12 Kwaikiva, yula mwenikuwela na hindu atepokela na kuyongeselwa, ila yula mwenikuwela ng'ogha na hindu, hata kila akikola atepokolwa. 13 Ningulongela na weni kwa milandano, kwaikiva wangulola ghala ningughola ila wangujighola wangulola ng'ogha, na wanguyughanila ghala ninguvula ila wangumanya ng'ogha. 14 Kwa weni yatimila kala yala ayalongile mlota wa Sapanga Isaya,

"Kuhyoghanila mtehyoghanila, ila mtemanya ng'ogha,

kangi kulola mtelola, ila mtemanya ng'ogha."

15 Kwaikiva mioyu gha wandu hagha iwela mitopa,

wanguhyoghanila ng'ogha kwa mapulukilo ghao,

na wagubika mihu ghao.

Ili wakotoho kulola kwa mihu ghao,

wakahyoghanila kwa mapulukilo ghao,

wakamanya kwa mioyu ghao, wakamhyukila Sapanga,

"Na mweni kawalamisa."

16 "Ila mwenga, mhekeleli kwaikiva Sapanga kawatanga mwenga mloli. Mweni kawatanga mwenga mhyoghanili na kumanya ujumbi ghaki." 17 Chakaka ninguwalongela, walota wa Sapanga na wandu watangala wa maha wapalili kulola hagha mnguyalola, ila wayalola ng'ogha na kuhyoghanila yala mnguyayoghanila ila wayoghanila ng'ogha.

18 "Myughanili mahimulilo gha yula ayendili kukulila mbeyu yiwa yangumaanisa niki. 19 Mundu yeyosi paahyoghanila lilando lya Unkosi wa Sapanga na akasindwa kumanya. Ni handa zila mbeyu ziguwili mnjila, yula mhakata kanguhika na kutola kila kivikilwi mmoyu ghaki. 20 Mbeyu hila yenikukulilwa mmaganga ni mlandano wa mundu anguhyoghanila lilando lila na bwitu akalipokela kwa kiheku. 21 Ila kwaikiva kahela mikegha mitali mghati mwaki, lingulikala kwa lipindi lihupi hela. Lipindi papahumila lung'ai au maghaso kwaikiva gha lilando hali, bwitu angutenyuka moyu. 22 Hila mbeyu iguwili paghati gha libiki lya mihomi, ni mlandano wa yula mundu anguhyoghanila lilando, ila holu gha mlima wogha hau na hindu ghaki hyogha kutindila lilando lila, na mweni angulela ng'ogha matungula. 23 Hila mbeyu ikulililwi ku mhanga wa maha ni mlandano wa mundu yula anguhyoghanila lilando lila na kulimanya, na mweni angulela matungula, imonga imia, ghangi isitini na ghangi iselasini."

24 Yesu akawalongela mlandano ghangi, "Unkosi wa kundumba ungulandana na mundu akulili mbeyu maha kukitawa kyaki. 25 Ila wandu pawawonja, mhakata ghaki akahika, akakulila pungapunga paghati gha mpunga, na kuhuka. 26 Hinu mpunga paimela na kutumbula kuyalula, na misapi ikatumbula kuloleka . 27 Watumikila wa yula mweni kitawa wakamyendela, wakamlongela, ‘Mkulu tukulili mbeyu maha kukitawa kyaku, ghuli pungapunga ihumila kugha?’ 28 Mweni akawayanga, ‘Mhakata ndiwa agholile nagha’ Hinu watumikila ghaki wakamkonya, ‘Ghuli, ungupala tuyendi tukayatupuli?’ 29 Ila mweni akalongela, ‘Mkotoho kuyatupula, kwaikiva lipindi pamtupula pungapunga mnguwesa kutupula na mpunga pamonga. 30 Mvileki vikuli pamonga mbaka lipindi lya mabenu. Hinu lipindi hali nitewalongela wandu wa kubena. Mtumbuli kukungula pungapunga na mviki malundila ili yanyanywi lyoto. Ila mpunga ukungulwi na mkaviki kungoku ghangu.’"

31 Yesu akawalongela mlandano ghangi, "Unkosi wa kundumba ungulandana na mbeyu gha haladali yenikutolwa na mundu mmonga na akayenda kukulila kulitawa lyaki. 32 Yeni ni isokombi kupiti mbeyu zyogha, ila paimela kala inguwela ngulunga kupiti hila imelili hyogha. Na kangi ingukula na kuwela libiki. Hata mbongu wa kunani wanguhika na kuchenga vijaka kumiputila ghaki."

33 Yesu akawalongela mlandano ghangi, "Unkosi wa kundumba ungulandana na simika aitolili nyongo mmonga, akaihanganya na ukowa wa nganu midebi miivili na mayaghani, na yeni simika ikaghola ukowa wogha ututumi."

34 Yesu awalongelili wandu hagha hyogha kwa milandano. Kawalongela ng'ogha kindu chochosi kwa kuleka kutumila mlandano. 35 Ili lilando lilongilwi na mlota wa Sapanga litimili,

"Nitelonga na weni kwa milandano,

nitevivika lipala vyogha vihighilwi kuhuma kulumbwa kwa mlima wogha."

36 Hinu Yesu akawataula wala wandu, akayenda kuukaya kuyingila kulighuta awelili angulikala. Wavulwa ghaki wakamuyendela, wakamlongela, "Utulongeli ingumaanisa niki hula mlandano wa mipungapunga kulitawa."

37 Yesu akawalongela, "Mtukutula wa zila mbeyu zya maheli ni Mwana wa Mundu." 38 Lila litawa ni mlima wogha. Zila mbeyu zya maheli ni wandu wala wenikumyitikila Sapanga. Ila yala mapungapunga ni wandu wenikumyitikila ng'ogha Sapanga. 39 Mhakata mwenikukulila hila mipungapunga ni lihoka. Mabeno ni mwihu wa lipindi, na wandu wa kubena ni watumikila wa kundumba wa Sapanga. 40 Mapungapunga vila yangukungulwa na kunyanywa lyoto, ndiwa itewela kumwihu gha lipindi. 41 Mwana wa Mundu atewalaghila watumikila ghaki wa kundumba kwa Sapanga na weni watekungula kuhuma kuunkosi ghaki, kila kindu kyeni kuyambusa sambi na waghola mahakata wogha, 42 hagha watumikila wa kundumba wa Sapanga watewatagha kutanuli lya lyoto, na kula watelila na kuhyagha malinu kwaikiva gha kutama. 43 Ndiwa, wala wa maha wateng'ala handa lijuwa kuunkosi wa Tati ghao. Mweni mapulukilo gha kuyoghanilila na ahyoghanile!

44 "Unkosi wa kundumba ungulandana na unaisa uhighilwi mkitawa. Mundu mmonga pakaulola, akauhigha. Kangi akahekelela nesu na akalamula kuyenda kuwusa vyogha vya ukaya ghaki, na akalihemela litawa lila."

45 "Kangi, unkosi wa kundumba ungulandana na mghola biasala mmonga mweni kuhaka lulu ghamaheli." 46 Paapatili lulu imonga yeni mapesa yatangala, akayenda, akawusa vyogha vila kawela navyu, akahemela lulu hila.

47 "Hilahila, unkosi wa kundumba ungulandana na wafu utaghilwi mlihiwa na wawopola, na weni ukawomela homba wekaweka. 48 Paumemili, wandu wakaukukula kumuhanga, wakatama, wakahaghula homba wa maha wakawavika mghati gha vibeja ghao, na wala wa maha ng'ogha wakawatagha. 49 Ndiwa itewela kumwihu wa lipindi, watumikila wa kundumba wa Sapanga watehumila, watewalekanisa wandu wahakata na wandu wamaha, 50 Watumikila wa kundumba wa Sapanga, watewatagha wala wahakata kulitanuli lya lyoto. Kula watalila na kuhyagha malinu."

51 Yesu akawakonya, "Ghuli, munguyamanya hagha hyogha?" wakamyanga, "Hina."

52 Na mweni akawalongela, "Hinu, kila mvula wa laghililo lya Sapanga ampeghili Musa mwenikuwela mvulwa wa Unkosi wa Kundumba angulandana na mundu mweni ngoko akahumisa mghati ghaki hindu hyonu na hindu gha dahile."

53 Yesu paayomulili kulonga milandano hila akahuka mahala pala, 54 akayenda ukaya ghaki, akawavula wandu kulighuta lya kukonganika Wayahudi hata wakalikangasa, wakalonga, "Hayu apatili kugha malangu hagha yatangala na uwesu hau wa kughola makangasu? 55 Ghuli, hayu ng'ogha yula mwana wa mhongola mibau? Ghuli, nyongo ghaki ng'ogha yula angukemwa Maria, na walongo ghaki ng'ogha wala kina Yakobu,Yusufu, Simoni na Yudasi? 56 Ghuli, wahaja ghaki, wabaha ng'ogha wakilikala na twenga? Hinu, apatili kugha hagha hyogha?" 57 Hinu, wakamkanila. Ila Yesu akawalongela, "Mlota wa Sapanga anguwesa ng'ogha kutundamilwa kumlima ghaki, ila mahala ghangi anguwesa kutundamilwa!" 58 Hinu mweni kaghola ng'ogha makangaso yatangala kula kwaikiva wandu wa kula wamkwinilili ng'ogha.