1 Yesu akalonga kangi na weni kwa kutumila milandano, 2 "Unkosi wa kundumba ulandine na nkosi amyandalilile mwana ghaki mhambu wa uposo." 3 Akawalaghila watumikila ghaki kuwakema wala wawelili wakemwa kumhambu, ila wala wakemilwi walemili kuhika. 4 Hinu akawalaghila kangi watumikila ghangi, akalonga, "muwalongeli wala wakemilwi kumhambu mhambu ghangu uyandalwa kala, nihinja kala ng'ombi dumi na ng'ombi wanung'una wakamala ng'ogha weni kunonela." 5 Ila weni wahika ng'ogha, wakayenda zyao, mmonga kulitawa lyake na mghangi kumahengu ghaki, 6 wamonga gha weni wakawakamula wala watumikila ghaki wakawatova na kuwakoma. 7 Yula nkosi akahyoma, akawalaghila watovangondo ghaki ili wakawakomi wala wakoma wandu na kuuyalamisa mmbwani ghao kwa lyoto. 8 "Hinu akawalongela watumikila ghaki, mhambu wa uposo uyandalwa kala ila wala wakemilwi kulyegha wayitikilile ng'ogha kuyenda." 9 Hinu myendi, "kunjila na wogha wala mtewalola muwakemi wahiki kumhambu." 10 Wala watumikila wakahuka, wakayenda mnjila, wakawakungula wandu wogha wawalolile, wahakata na wamaha. Mlighuta lya mhambu kukamema wahenja.

11 "Nkosi paayingila kuwalola wahenja akamlola mundu mmonga akiva kavala ng'ogha nguu zya mhambu wa uposo. 12 Nkosi akamkonya, ‘Ghanja, uyingilighuli hamu ukiva uvala ng'ogha nguu zya mhambu?’ Ila mweni akatama nuu. 13 Hinu nkosi akawalongela watumikila, ‘Mumuwope maghulu na mawoko mkamtaghi panji mulwiha, kula atelila na kuhyagha malinu.’"

14 Yesu akayomola kwa kulonga, "Wandu weni kukemwa ni watangala, ila weni kuhaghulwa ni mayaghani."

15 Hinu Mafalisayo wakayenda zyao, wakakonyana wagholi niki ili wamkamuli Yesu kwa milando ghaki. 16 Hinu, wakawalaghila wavulwa ghao pamonga na kipinga kya Helode. wakamkonya, "Mvula, tungumanya yiwa wenga ni mundu wa maha, na unguvula njila gha Sapanga gha wandu kughola ghala gha maha, na ungumtila ng'ogha mundu yoyosi, kwaikiva ungulola ng'ogha ukulu wa mundu. 17 Hinu utulongeli, tungupalwa kuhipa usulu kwa nkosi Kaisali? au ng'ogha?"

18 Ila Yesu amanyili lukani lwa weni lihakata akawalongela, "Mwenga wandu wa mbindingu kwa kyani mngunitegha? 19 Mnilangusili ligwala lya kuhipa usulu."

Na weni wakamlangusila ligwala. 20 Hinu, Yesu akawakonya, "Wusu na lihina hai ni vya ghani?"

21 Wakamyanga, "Ni gha nkosi kaisali."

Hinu Yesu akawalongela,"Hinu, gha Kaisali mumpeghi Kaisali, na gha Sapanga mumpeghi Sapanga."

22 Pawayughanilili nagha wakalikangasa wakamleka wakayenda zyao.

23 Lichuwa lilalila, wamonga wa Masadukayu wala wangulonga wahovili wanguhinduka ng'ogha wamyendelili Yesu. 24 Hinu, wakamlongela, "Mvula, Musa atulongilili mundu amposili mdala pakahova na kaleka ng'ogha mwana, ni lasima mlongu ghaki amposi hayu mdala ahovitiliwi, ili ampatili mlongu ghaki wana. 25 Hinu, pawelili na walongo isaba paghati gha twenga. Yula wa mtumbulo akaposa mdala, akahova akawela ng'ogha na mwana, akamlekela mlongu ghaki yula mdala. 26 Ikawela hilahila kwa mlongu waivili, na waitatu, mbaka waisaba. 27 Mwihu wa hyogha yula mdala na mweni akahova. 28 Hinu ghuli, lichuwa lila lya uhinduki, yula mdala atewela mhumbu wa ghani? Paghati gha walongo wala isaba, kwaikiva wala wogha wawelili wamposa yula mdala."

29 Yesu akawayanga, "Mwenga mghola maha ng'ogha kwaikiva mmanya ng'ogha Mayandiko gha Sapanga na hata makakala gha Sapanga. 30 Kwaikiva wahovili pawatehinduka wateposa ng'ogha wala kuposwa, watewela handa watumikila wa kundumba wa Sapanga. 31 Ila kwa hula mghalu wa wandu kuhinduka, msomili ng'ogha yala awalongilile Sapanga? Akilonga, 32 ‘Nenga ni Sapanga wa Ibulahimu, Sapanga wa Isaka na Sapanga wa Yakobu!’ Hinu mweni ng'ogha Sapanga wa wahovili, bali ni Sapanga wa wavile wakomu." 33 Wala wandu watangala pawahyoghanila nagha wakalikangasa nesu kwa mavulo ghaki.

34 Mafalisayo pawayughanila yiwa Yesu awelili kawanyamalisa Masadukayu, hinu weni wakalikungula pamonga. 35 Mmonga, wa mafalisayu mweni kumanya laghililo, akamkonya Yesu kwa kumyesa, 36 "Mvula, ni laghililo ghani likulunga kupiti amuli zyogha?"

37 Yesu akamyanga, "‘Mpali Bambu Sapanga ghako kwa moyu ghako wogha na kwa mpumulo ghako wogha pamonga na malangu ghako hyogha’. 38 Hali ndiwa laghililo likulunga na lya utumbulo. 39 Na gha ipili ingulandana na hai. ‘Mpali myako handa ungulipala mweni’. 40 Malaghilo hyogha gha Musa na mavulo gha walota yangupapwa na hagha malaghililo maivili."

41 Mafalisayo pawalikungula pamonga, Yesu akawakonya, 42 "Mnguliwachila kyani kwa habali gha Kilisito mkombola? Mweni ni mwana wa ghani?"

Weni wakamyanga, "Mweni ni mwana wa Daudi."

43 Yesu akawalongela, "Inguwesaghuli hinu Daudi akilongoswa na Mpumulo wa Sapanga kumkema Yesu Bambu, akilonga,

44 ‘Bambu amlongilili Bambu ghangu,

Utami upandi ghangu wa kuliyila,

mbaka pala paniwasinda wahakata ghako.’ 45 Hinu, ikiva Daudi angumkema kilisito ‘Bambu,’ hinaa inguwesekanaghuli Kilisito aweli mwana wa Daudi?"

46 Kwahela mundu yeyosi awesili kumyanga Yesu lilando. Na kuhuma lichuwa lila kwahela mundu ayesili kumkonya lilando.