1 Kulipindi hali, Yesu awelili angutyanga kumitawa gha nganu lichuwa lya kupumulila. Hinu wavulwa ghaki wakakolwa na njala, wakatumbula kubena mihoji gha nganu, wakalyegha mbunji zyaki. 2 Mafalisayo pawalolili yala, wakamlongela Yesu, "Uloli, wavulwa ghako wangughola mghalu weni kukaniswa kugholwa Lichuwa lya Kupumulila."

3 Yesu akawayanga, "Ghuli, msomili ng'ogha vila aigholile Daudi pamonga na wayaki lipindi pawawelili na njala? 4 Mweni ayingilili kulighuta lya Sapanga akalyegha hila mibumunda iyandalililwi kwaikiva gha lihengu lya Sapanga. Kangi akawapegha na wayaki hila mibumunda. Ila ni kihyetu na laghililo lya Musa hila apeghilwi na Sapanga yiwa yula angupalwa kulyegha ni mtambika weka. 5 Au ghuli, msoma ng'ogha kuhitabu kya laghililo lya Musa yiwa kila lipindi lya lichuwa lya kupumulila watambika wangutenyula laghililo lya Musa mlighuta, ila wanguwachilwa ng'ogha yiwa waghola uhakata? 6 Hinu, ninguwalongela lipala yiwa yula avili mkulu kupiti lighuta lya Sapanga kabaha. 7 Ghuli, mwenga mmanya ng'ogha milando hai ingumaanisa niki? ‘Ningupala luhungu na ng'ogha litambiku,’ handa mngalimanya mngaliwalamula ng'ogha wandu wenikuwela ng'ogha na uhakata. 8 kwaikiva Mwana wa Mundu ni Bambu wa lichuwa lya kupumulila."

9 Yesu akahuka pala, akayingila mlighuta lyau lya kukonganikana Wayahudi. 10 Mula kukawela na mundu mmonga mweni liwoku lipola. Hinu, amonga gha Mafalisayo wakamkonya Yesu, "Ghuli, ni maha kumlamisa mundu lichuwa lya kupumulila?" Wamkonyili nagha wapati njila gha kumsitaki.

11 Yesu akawayanga, "Tulongi mmonga wa mwenga kawela na kondolu ghaki na hayu kadudukila mlyowu; ghuli, atemkola ng'ogha na kumlopola akamuhumisa panji Lichuwa lya Kupumulila? 12 Kwa hinaa, yula ni kondolu ila mundu ni wa maha nesu kupiti kondolu, Hinu ni maha kughola kindu maheli lipindi lya kupumulila." 13 Ndiwa akamlongela yula mundu, "Ulangihi liwoku lyako." Akalangiha na lyeni likalama likawela likomu handa lya ipili.

14 Ila Mafalisayo wakahuma panji, wakalongelana vila watemyalamisa Yesu.

15 Yesu akamanya yiwa Mafalisayo wawelili wanguyandala ndambu gha kumkoma, akahuka mahala pala. Wandu watangala wakamkovekela, akawalamisa wavina wogha, 16 kunu akiwakanisa wakotoho kuwalongela wandu yiwa mweni ni ghani, 17 ili yala alongili Sapanga kwa njila gha mlota Isaya yagholeki, 18 "Uloli mtumikila wa nenga nimhaghulili, mpalwa ghangu mwenikunighola nihekileli mmoyu. Nitevika mpumulo ghangu kunani gha mweni, na mweni atetangasa ghala ningupala wandu wagholi kumlima wogha." 19 Mweni atewela ng'ogha na utatala wala kutova lilowi, na hata lilowi lyaki liteyoghanilwa ng'ogha mnjila. 20 Lidengi lipundangilwi atedumula ng'ogha, wala utambi unguhumisa lyosi utejimika ng'ogha, mbaka pala paateghola utoso gha ghala yenikupalwa yagholeki. 21 Kupitila mweni wandu wa milima hyogha watewela na litumaini nayu.

22 Hinu pala wandu wakamyeghela Yesu mundu mmonga angalikulola na awelili angali kulonga kwaikiva akolilwi na lihoka.Yesu akamlamisa na mweni akawesa kulonga na kulola. 23 Lipinga lyogha lya wandu walikangasili likalonga, "Ghuli, hayu Mwana wa Daudi ng'ogha?"

24 Ila Mafalisayo pawayughanila hagha, wakalonga, "Mundu hayu anguwahumisa mahoka kwa uweso wa Mkulu wa mahoka."

25 Yesu amanyile kila wawelile wangukiwachila, akawalongela, "Unkosi wowosi hula weni kupaghanyika kumapanga maivili yeni kungingamana, utewesa ng'ogha kuyendelela, na mmbwani wowosi au walongo wowosi wapaghanyikili mapinga mapinga yeni kungingamana, wateguwa." 26 Paikawela Lihoka lingumvinga Lihoka, hali lingulingingama lyeni. Hinu, unkosi ghaki uteyendelela ng'ogha. 27 Mwenga mngulonga yiwa nenga ninguwawinga mahoka kwa uweso wa Mkulu wa mahoka, ghuli, wavulwa wa mwenga wanguwawinga kwa uweso wa ghani? Kwaikiva gha nagha weni ndiwa watelonga yiwa mvile na mahakata au ng'ogha. 28 Ila paikawela nenga ninguwawinga mahoka kwa likakala lya Mpumulo wa Sapanga, hinu mmanyi yiwa Unkosi wa Sapanga uhika kala kwa mwenga.

29 Kangi mundu anguwesa ghuli kuyingila kulighuta lya mundu mweni makakala na kumpokola hindu ghaki, bila kutumbula huti kumuwopa yula mundu mweni makakala? Na baha ndiwa atewesa kumpokola hindu ghaki.

30 "Yeyosi mweni kuwela ng'ogha mbandi ghangu anguningingama, na yeyosi mweni kukungula ng'ogha na nenga kanguyandasa wandu." 31 Kwaikiva gha nagha, ninguwalongela, kila uhakata ikiva wa kughola au kulonga wandu watelekeselwa ila yula atemlighu Mpumulo wa Sapanga atelekeselwa ng'ogha. 32 Sapanga atewalekesela wala watelongela milando mihakata kihyetu na nenga, Mwana wa Mundu. Ila Sapanga atewalekesela ng'ogha wandu wenikulongela milando mihakata kihyetu na Mpumulo wa Sapanga hinaa na hata haku kuulongolo.

33 Hinu Yesu akalongela, "Mngupalwa kughola mibiki iweli maha ili mpokeli matungula gha maha. Paikawela muwela na mibiki gha maha ng'ogha, mtetungula matungula gha maha ng'ogha. Mteimanya mibiki yiwa gha ghuli kukovekelana na matungula yahumila kulibiki lila." 34 Mwenga kiwelekwa kya njoka! Kwa kyani mnguwesa kulonga mighalu gha maha ikiva mwenga ni waghola sambi? Kwaikiva mundu angulonga kukovekelana ghala yamema kumoyu ghaki. 35 Mundu wa maha angulongela milando gha maha kuhuma kumoyu ghaki gha maha, na mundu muhakata angulongela mighalu mihakata inguhuma kumoyu ghaki.

36 "Hinu, ninguwalongela, lichuwa lya kuutoso wandu watepalwa wayangi kila milando mihakata wailongelili. 37 Kwaikiva kwa milando ghako utewoneka yiwa uwela ng'ogha na mahakata kuulongolo gha Sapanga, na kwa milando ghako utetoswa."

38 Hinu wamonga wa wavula wa laghililo na Mafalisayo wakamlongela Yesu, "Mvula, tungupala kulola kilangihi kuhuma kwa wenga."

39 Hinu Yesu akawayanga, "Kiwelekwa kihakata kyeni kuwela ng'ogha na umaha!" Mngupala kilangihi, mtepokela ng'ogha kilangihi badili ghaki kila kilangihi kya Yona mwenikuwela mlota. 40 Vila Yona kalikala machuwa itatu mumtima wa homba mkulu, ndiwa na mweni Mwana wa Mundu atelikala mghati mwa mlima machuwa itatu pamuhi na uhiku. 41 Wandu wa Ninawi wategholoka lipindi lya utoso naweni watekitosa kiwelekwa haki. Kwaikiva Waninawi walekili mahakata na kumuhuyila Sapanga kwaikiva wayoghanilili matangaso gha Yona, na mlole baha pavile na mkulu apiti Yona. 42 Malikia wa kusini atehumila lipindi kiwelekwa haki kingutoswa, na mweni atekilongela yiwa kiwela na mahakata. Kwaikiva mweni atyangili kuhuma kutali, akahika kuyughanila milando gha maha gha Selemani, na baha pawela na mkulu kupiti Selemani!

43 "Lihoka palihumiswa kuhuma kwa mundu, lingutindila tindila mluvagha likihakula mahala pakupumulilila ila anguwesa akasindwa kulola mahala, 44 hinu anguilongela, ‘Nitehuya ukaya kwa nenga kula nihukili.’ Ila panihuya na kupalola kulikala lipala, papyahililwa na kuyandalwa maha. 45 Hinu linguyenda kuwatola mahoka waghangi isaba, wahakata kupiti mweni, na wogha wanguhika na kumyingila hayu mundu. Na mundu hayu hinaa anguwela mhakata nesu kupiti vila kawela dahile. Ndiwa itewela kwa wandu hagha wahakata."

46 Yesu paawelili akali angulongela na lipinga lya wandu, nyongo ghaki na walongo ghaki wagholokili panji wakipala kulongela na mweni. 47 Hinu, mundu mmonga akayenda na kumlongela, "Lola, nyongo ghako na walongo ghako wangukulindila panji, wangupala kulongela na wenga."

48 Ila Yesu akamkonya mundu yula, "Ghuli, nyongo ghangu ni ghani? Na walongo ghangu ni wakinaghani?" 49 Hinu akayinula liwoku lyaki upandi wa wavulwa ghaki, akalonga, "Hagha ndiwa nyongo ghangu na walongo ghangu! 50 Kwaikiva yeyosi angughola vila angupala Tati ghangu wa kundumba, hayu ndiwa mhaja ghangu, mhacha ghangu na nyongo ghangu."