1 "Mkali mihu mkotoho kughola matendu maha kuulongolo gha wandu lli wawaloli. Kwaikiva pamghola nagha mtewela ng'ogha na hupo kuhuma kwa Tati wa mwenga wa kundumba."

2 Hinu paumtanga mundu mkapuku, ukotoho kulitangasa. Ukotoho kughola handa wambindingu wangughola kumaghuta gha kukonganika Wayahudi. Chakaka ninguwalongela, wandu hagha wapokela kala hupo ghao. 3 Ila wenga paumtanga mundu kapuku, ugholi kwa kifisu, hata mundu yoyosi akotoho kumanya, 4 umtangi mundu bila wandu kumanya, na Tati wa wenga yula angulola ghala gha mkifisu, atekupegha hupo.

5 "Pamyupa, mkotoho kughola handa wambindingu. Weni wangupala kuyupa wakiwela wagholoka kumalighuta gha kukonganika Wayahudi na kumbembi zya mnjila ili wandu wawaloli. Chakaka ninguwalongela, hagha wapokela kala hupo ghao. 6 Ila wenga pauyupa, uyingili mkyumba kyaku, utati mlyango, na hinu umluwi Tati ghako wa mkifisu, na mweni atekupegha hupo ghako."

7 Mwenga pamyupa, mkotoho kulongela milando yenikuwela ng'ogha gha maha handa wandu wammanya ng'ogha Sapanga. Weni wanguliwachila yiwa wateyughanilwa kwaikiva gha milando itangala wailonga. 8 Mkotoho kuwela handa weni. Kwaikiva Tati wa mwenga angumanya kila mngukipala pambila gha kumuyupa. 9 Hinu, nagha ndiwa mngupalwa kuyupa,

"Tati wa twenga mweni kulikala kundumba,

lihina lyako lisifilwi."

10 Unkosi ghako uhike,

yala unguyapala ndiwa yagholeki,

kundumba hilahila haku kumlimawogha.

11 Utupeghi lelo mulyo wa kila lelo.

12 Utulekiseli sambi tusighola,

handa na twenga vila tungulekesela mahakata ghala wangutugholela wandu waghangi.

13 Ukotoho kututaya mmayesu,

ila utulokoli na yula mhakata,

Kwaikiva unkosi ni wa wenga, na makakala na ukulu hata machuwa hyogha bila mwihu.

14 "Kwaikiva pamuwalekesela wandu mahakata ghao, Tati wa mwenga wa kundumba hilahila atewalekesela na mwenga." 15 Ila pamleka kuwalekesela waghangi weni kuwakosela, na mweni Tati wa mwenga atewalekesela ng'ogha sambi sya mwenga.

16 "Pamuwopa kulyegha mulyo, mkotoho kulangiha handa vila wangughola wambindingu, weni kughalambula wuso wawoneki wangulumbilila. Wapati kuloleka na wandu yiwa wawopa. Chakaka ninguwalongela yiwa weni wapata kala hupo ghao." 17 Ila wenga pauwopa, upakali mutu ghako mahuta, na kukula wusu ghako, 18 ili mundu yeyosi akotoho kumanya yiwa unguwopa, ila umanyiki na Tati ghako wa mkifisu hela na mweni atekupegha hupo.

19 "Mkotoho kujivikila ngoko haku kumlimawogha haku kweni sondu na kutu weni kuwesa kukongonyola, na mwihi kuyingila na kuhija." 20 Mjivikili ngoko kundumba haku sondu na kutu wanguwesa ng'ogha kukongonyola, wala wahija wanguwesa ng'ogha kuyingila na kuhija. 21 kwaikiva pala ngoko ghako iwela, ndiwa na moyu ghako utewela.

22 "Limbamba lya mhigha ni lisu, hinu lisu lya wenga paliwela likomu, mhigha ghako wogha utewela na mhana." 23 Ila paikawela lisu lyako likomu ng'ogha, na higha ghako hyogha itewela kulwiha. Hinu ikiva mhana weni kuwela mhigha ghako ni lwisa, hinu hali lwisa litewela totolo.

24 "Kwahela mundu anguwesa kutumikila mabambu waivili. Kwaikiva atemhyomela mmonga na kumpala hayu waivili, au atekonganika na mmonga na kumpughanya yula ghangi. Muwesa ng'ogha kumtumikila Sapanga na unaisa pamonga."

25 Kwa nagha, ninguwalongela yiwa mkotoho kughasikila ngalilu gha mwenga, yiwa mtelyegha niki au kunywegha niki, au mtevala niki, ghuli, ngalilu ni gha kughasikilwa ng'ogha kupiti mulyo, na mhigha wa kughasikilwa kupiti nguu? 26 Muwaloli mbongu wa kunani, hagha wangukulila ng'ogha na kubena au kuvika ngoko, ila Tati wa twenga wa kundumba anguwapegha mulyo. Ghuli, mwenga wakughasikilwa ng'ogha kupiti hagha wambongu? 27 Ni ghani paghati gha mwenga kwa kughasika nesu anguwesa kuyongesa lipindi lya ukomu ghaki?

28 "Na kwa kyani mghasikili nguu? Mloli ulua wa kumihitu vila ungunemulila. Na ungughola ng'ogha mahengu au kuisonelela nguu zyaki." 29 Ila ninguwalongela, hata nkosi Selemani mweni na unaisa ghaki wogha apatili ng'ogha kuvwaliswa maha handa mamonga gha uluwa hau. 30 Hinu ikiva Sapanga anguyavwalisa nagha manyahi gha mlitawa, yala tunguyalola lelo na kilau yangudangwa kulyoto, ghuli, atewavwalisa ng'ogha mwenga weni ukwinila msokombi?

31 "Hinu, mkotoho kughasikila, tutelyegha kyani? Na tutenywegha niki? Au tutevwala niki?" 32 Wandu wammanya ng'ogha Sapanga wangughasikila hagha hyogha. Tati wa mwenga wa kundumba angumanya yiwa mngupala vindu havi vyogha. 33 Hinu, mhakuli huti unkosi wa Sapanga na kulikala kwa kukovekela vila angupala na hagha hyogha mteyongeselwa. 34 Hinu mkotoho kughasikila kilau, kwaikiva kilau itewela na maghaso ghaki gha kilau, kila lichuwa linguwela na maghaso ghaki.